Puha Hūhū

◼ Ato talia e tagata fakailoa nakaila papatiso ia ke papatiso, kua lata a ia ke fēfē e fina atu he tau feleveiaaga fakapotopotoaga mo e gahua he fonua?

Ke papatiso ko e fifiliaga uho a ia ka taute he tagata. Ko e mena ia, ato talia e taha tagata ke papatiso, kua lata a ia ke fai maamaaga ke he tau mena kua manako e Atua mai ia ia. Lafi ki ai, kua lata a ia ke fakakite kua eketaha a ia ke moui fakatatau ke he tau puhala he Atua.

Kua poaki ke he tau Kerisiano ke aua neke tiaki e fakapotopotoaga, ti kua lata e tagata fakailoa nakaila papatiso ia ke fitā e makutu ke fina atu he tau feleveiaaga he fakapotopotoaga. (Hepe. 10:24, 25) Lata foki a ia ke fai tali. Liga kua fakalataha foki a ia ke he Aoga Fekafekau Fakateokarasi, pete ni nakai ko e fakatokaaga pauaki anei.

Lafi ki ai, tali he poaki ke he tau Kerisiano ke fakamatala e tala mitaki mo e taute tutaki, kua lata e tagata fakailoa nakaila papatiso ke fina atu tumau he fonua ato papatiso a ia. (Mata. 24:14; 28:19, 20) Fiha e mahina haana ka fano he fonua ato maeke a ia ke papatiso? Kua lata a ia ke fai magaaho ke fakakite e mauokafua haana he eketaha ke fina atu tumau he fonua he tau mahina takitaha. (Sala. 78:37) Ka kua nakai lata ke loa lahi tali mai he magaaho ne kamata a ia ke fakamatala ato hoko ke papatiso, liga he tau mahina gahoa. Lata a ia ke fiha e tulā ka tohi he fina atu he fonua? Nakai fai poakiaga malolō ke he mena nei. Kua lata e tau motua ke manamanatu ke he tau tuaga takitaha he tau tagata fakailoa ti fakalatalata mo e lagotatai.​—Luka 21:1-4.

Ko e tau motua (po ke tau fekafekau lagomatai he tau fakapotopotoaga ne gahoa e tau motua) kua feleveia mo e tagata ne taute ke papatiso kua lata ke manatu na kehekehe e tau tagata takitaha, ti lata ia lautolu ke fifili fakamitaki kua latatonu nakai a ia ke papatiso. To amanaki a lautolu ki a ia ke manako mooli ke eke mo taha he Tau Fakamoli a Iehova mo e ke fakatātā e loto fakaaue haana ke he lilifu ke fakalataha mo e fakatokatokaaga ha Iehova mo e fai vala ke he gahua he fonua. Maama he tau motua kua nakaila motua fakaagaaga a ia po ke moua e tau puhala he tau tagata fakamatala ne kua leva e papatiso. Ka logona hifo he tau motua kua nakaila hokotia a ia ke papatiso, kua lata ia lautolu ke fakailoa age fakamitaki e tau kakano he Tohi Tapu ma e ha lautolu a fifiliaga ti lagomatai a ia ke moua e lagomatai fakaagaaga.