Fifitaki ke he Tau Perofeta—Amosa
1. Ko e ha e fakafifitakiaga ha Amosa kua eke mo punaaga he mafanatia ki a tautolu?
1 Kua fakauaua nakai a koe ke fakamatala he tokolalo e tupumaiaga haau? Ka pihia, maeke a koe ke moua e loto malolō mai he fakafifitakiaga ha Amosa. Ko ia ko e tagata leveki manu mo e gahua vala magaaho, ka e fakamalolō e Iehova a ia ke fakapuloa e fekau uho. (Amosa 1:1; 7:14, 15) Tatai foki he vahā ha tautolu, fakaaoga e Iehova a lautolu ne mahani molū mo e fakatokolalo. (1 Kori. 1:27-29) Ko e heigoa falu fakaakoaga ma e ha tautolu a fekafekauaga ka moua mai e tautolu he perofeta ko Amosa?
2. Ko e ha kua maeke ia tautolu ke tu mauokafua ka fehagai mo e tau totokoaga he fekafekauaga?
2 Tu Mauokafua ka Fakafehagai mo e Tau Totokoaga: He mogo ne logona e Amasia, ko ia e ekepoa tapuaki punua povi he kautu he faahi tokelau he magafaoa hogofulu ha Isaraela e tau perofetaaga ha Amosa, ne talahau fakakelea atu a ia tuga ke pehē: ‘Fano ki kaina! Toka a mautolu! Na fai lotu a mautolu!’ (Amosa 7:12, 13) He ole haana ke he Patuiki ko Ierepoamo ke taofi e gahua ha Amosa, ne fakakeukeu e Amasia e tau kupu he perofeta. (Amosa 7:7-11) Ka e nakai matakutaku a Amosa. He vahā nei, falu takitaki lotu ne kumi lagomatai fakapolitika he lali a lautolu ke favale ke he tau tagata ha Iehova. Pete ia, ne mavehe a Iehova ki a tautolu to nakai fai kanavaakau ka taute ke tau mai ki a tautolu ka kautū tukulagi.—Isaia 54:17.
3. Ko e heigoa e fekau ka ua e vala hane fakapuloa e tautolu he vahā nei?
3 Fakapuloa e Fakafiliaga he Atua mo e Tau Monuina Anoiha: Pete he talahau e Amosa e tau perofetaaga he fakafiliaga ma e kautu he magafaoa hogofulu ha Isaraela, ne fakahiku e ia e tohi he Tohi Tapu ne tū ai e higoa haana, aki e maveheaga ha Iehova ke he fakafoouaga mo e tau monuina loga. (Amosa 9:13-15) Ne fakapuloa foki e tautolu hagaao ke he “aho ke fakafili ai” he Atua, ka ko e taha vala ni anei he “tala mitaki nai he kautu” ne lata ia tautolu ke fakapuloa. (2 Pete. 3:7; Mata. 24:14) Ka moumou e Iehova e tau tagata kelea i Amaketo to tauteute ai e lalolagi ma e parataiso.—Sala. 37:34.
4. Ko e heigoa ati mauokafua a tautolu na maeke ia tautolu ke taute e finagalo ha Iehova?
4 Ko e fakamatala e fekau he Kautu ke he lalolagi ne tokologa kua totoko mai, kua kamatamata mooli e fakamakai ha tautolu ke fakamooli e tukuleleaga ha tautolu mo e ke taute e finagalo ha Iehova. (Ioane 15:19) Pete ia, kua mauokafua a tautolu to fakatumau a Iehova ke foaki mai ki a tautolu e tau mena kua lata ke taute e finagalo haana, tuga ne taute e ia ki a Amosa.—2 Kori. 3:5.