Fifitaki ke he Tau Perofeta—Hosea
1. Ko e heigoa e hūhū kua liga hūhū hifo e koe ki a koe ni?
1 ‘Ko e heigoa kua makai au ke toka hifo ke fekafekau ki a Iehova?’ Liga hūhū hifo e koe e hūhū ia he manamanatu fakahokulo ke he lahi mahaki he mitaki mo e fakaalofa hofihofi noa haana. (Sala. 103:2-4; 116:12) Ne makai a Hosea ke taute e tau mena ne poaki age e Iehova, pete he lata a ia ke fai mena ka toka hifo.toka hifo e mena. Fifitaki fēfē e tautolu a Hosea?
2. Mumuitua fēfē a tautolu ke he fakafifitakiaga mitaki ha Hosea he fakauka he gahua fakamatala?
2 Fakamatala he Tau Aho kua Kelea Ai: Ko e fekau ha Hosea kua fakamatapatu ke he magafaoa hogofulu he kautu ha Isaraela, ne kua teitei galo e tapuakiaga mooli. Ko e Patuiki ko Ierepoamo II ne taute e tau mena kelea ki mua ha Iehova mo e matutaki e tapuaki punua povi ne kamata e Ierepoamo I. (2 Patu. 14:23, 24) Ko e tau patuiki ne tutū hake ne matutaki ai ke lolelole fakaagaaga he kautu he magafaoa hogofulu he ato fakahiku ke moumou he 740 F.V.N. Ka e pete e malolō e tapuakiaga fakavai, ne fekafekau fakamooli a Hosea ko e perofeta kavi ke 59 e tau. Kua eketaha pihia foki nakai a tautolu ke fakamatala he tau tau takitaha, pete he fehagai mo e fakateaga po ke totokoaga?—2 Timo. 4:2.
3. Fakakite fēfē he moui ha Hosea e fakaalofa hofihofi noa ha Iehova?
3 Hagaaki ke he Fakaalofa Hofihofi Noa ha Iehova: Ne poaki a Iehova ki a Hosea ke “fai hoana ke he fifine faivao.” (Hosea 1:2) Pete kua fanau e ia mo e hoana haana ko Komeri e tama taane, ne mailoga ai kua fanau foki e Komeri tokoua e tama kehe. Ko e fakamakai ha Hosea ke fakamagalo e hoana haana kua fakakite e lahi he fakaalofa hofihofi noa ha Iehova ke he tau Isaraela ne nakai omaoma he mogo ne fakatokihala a lautolu. (Hosea 3:1; Roma 9:22-26) Kua makai nakai a tautolu ke tuku kehe e tau manako ha tautolu ke maeke ke fakailoa e fakaalofa hofihofi noa ha Iehova ke he tau tagata oti kana?—1 Kori. 9:19-23.
4. Ko e heigoa falu mena ka liga toka hifo e tautolu ke fekafekau ki a Iehova?
4 Ko e falu fekafekau ha Iehova kua toka hifo ha lautolu a tau feua aoga ke maeke ke fakalahi e magaaho ke he gahua he fonua. Ko e falu kua fakatumau ke nonofo tokotaha po ke nakai fanau ke tutuli e tau mena he Kautu. Ka manamanatu ke he moui ha Hosea, liga manatu hifo a tautolu, ‘Nakai fakaai au ke taute e tau mena tuga ne taute e ia.’ Pete ia, he tupu fakahaga e loto fakaaue ha tautolu ke he fakaalofa noa ha Iehova, mo e falanaki ke he agaaga tapu haana ma e malolō, to liga fakaaoga e ia a tautolu ke he tau puhala ne nakai manamanatu a tautolu na maeke, tuga ni a Hosea.—Mata. 19:26; Filipi 2:13.