Fifitaki ke he Tau Perofeta—Mika
1. Liga ko e heigoa e hūhū ne manamanatu a Mika ki ai, ka ko e ha e gahua fakamatala haana ne nakai teao noa ai?
1 ‘To hoko mai a fe e fakaotiaga ke he fakatokaaga matahavala nei?’ Liga manamanatu e perofeta ko Mika ke he hūhū pihia foki he fakapuloa e ia e tau fekau he fakafiliaga ha Iehova ke he tau kautu ha Isaraela mo Iuta. Ka kua nakai teao noa e fakamatala haana. He 740 F.V.N., he magahala ne moui ai a Mika, ne fakamooli e tau kupu ha Iehova ki a Samaria. (Mika 1:6, 7) Fai magaaho he mole ne moumou ai a Ierusalema he tau 607 F.V.N. (Mika 3:12) Fifitaki fēfē e tautolu a Mika he tatali atu a tautolu ke hoko mai e tau fakafiliaga ha Iehova he vahā ha tautolu?
2. Puhala fe mo e ko e ha kua lata ia tautolu ke fakauka he fakatali ke he aho a Iehova?
2 Kia Fakauka: Ne tohia e Mika: “Ka ko au, to tatali atu au kia Iehova, to amaamanaki au ke he Atua he haku a fakamouiaga.” (Mika 7:7) Ka kua nakai fakatali noa ni a Mika ke hoko mai e fakaotiaga. Ne lavelave tumau a ia ko e perofeta ha Iehova. He fakatali a tautolu ke he aho a Iehova, kua lata foki ia tautolu ke fakalataha ke he “tau mahani mitaki mo e tau mahani Atua.” (2 Pete. 3:11, 12) Kua fakaatā he fakauka ha Iehova e tau tagata takitaha ke fai magaaho ke tokihala. (2 Pete. 3:9) Ko e mena ia, kia tokaloto e tautolu e tomatomaaga faka-Atua ke fifitaki e fakauka he tau perofeta.—Iako. 5:10.
3. Ko e ha kua lata ia tautolu ke ole ma e agaaga tapu ha Iehova?
3 Falanaki ke he Malolō ha Iehova: Pete kua uka e kotofaaga ha Mika, ne haga a ia ki a Iehova ma e malolō ke taute ai. (Mika 3:8) Kua fakamalolō pauaki a tautolu he Kupu ha Iehova ke falanaki ke he Atua ma e malolō. Kua tuku age fakalahi e ia e malolō ki a lautolu ne lolelole ke maeke ai ke taute ha lautolu a tau kotofaaga fakateokarasi. (Sala. 84:5, 7; Isaia 40:28-31) Kua logona nakai e koe e mena nei he fekafekauaga tapu haau? Ole tumau nakai a koe ki a Iehova ma e lagomatai he agaaga tapu malolō lahi haana?—Luka 11:13.
4. Ko e heigoa e fakafifitakiaga mitaki ne fakatoka he puhala moui ha Mika ma tautolu he vahā nei?
4 He moui katoa ha Mika, ne tuku fakamua e ia e taute he finagalo he Atua. Ne eketaha a ia ke tumau e mahani fakamooli pete he agaagai ia ia e tau mahani fakakeukeu. Pihia foki, kua kamatamata e mahani fakamooli ha tautolu he tau aho takitaha. Ko e mena ia kia fakamalolō ke “o a tautolu ke he higoa a Iehova ha tautolu a Atua tukulagi tukumuitea.”—Mika 4:5.