Lagomatai a Lautolu ne Matapouli ke Iloa a Iehova
1. Fakatātā fēfē e Iesu e fakaalofa hofihofi ke he tau tagata matapouli?
1 Nakai leva ti hoko e mate ha Iesu. He toka e ia e maaga ko Ieriko, tokoua e tagata matapouli ne tauhea: “Ko e Iki na e, . . . kia fakaalofa mai a koe kia maua.” Pete ne mamafa lahi e tau kamatamata ne amanaki a Iesu ki ai, ne tu a Iesu kua ui atu ke he tau tagata nei ke o age ki a ia mo e fakamaulu a laua. (Mata. 20:29-34) Maeke fēfē a tautolu ke fifitaki e fakaalofa hofihofi ha Iesu ke he tau tagata matapouli?
2. Maeke fēfē a tautolu ke fakamatala ke he tagata matapouli ne feleveia e tautolu he toloaga?
2 Kia Lagomatai: Ka feleveia a koe mo e tagata matapouli, liga he toloaga, talahau hagaao ki a koe ti foaki e lagomatai. Ha kua fa fakateaga ki a lautolu ne matapouli, liga tuahā e tagata he mogo fakamua. Ka ko e fakakapitiga mo e fiafia mooli haau ka fakamafana a ia. Kia tokaloto foki, na kehekehe e tau vahega matapouli, ti liga mailoga mogoia e lahi he lagomatai kua lata ke foaki. Ka foaki e koe e lagomatai, maeke a koe ke tala age kua taute a koe he gahua fakaako Tohi Tapu. Tala age ki a ia to totou age e koe e kupu tohi tuga e Salamo 146:8 po ke Isaia 35:5, 6. Maeke ia koe ke lagomatai foki a ia he moua mai e tau faila autiō he jw.org.—Kikite puha “Ka Lagomatai e Tagata Matapouli . . . ”
3. Maeke fēfē a tautolu ke kumi a lautolu ne matapouli he fonua ha tautolu?
3 Kumi a Lautolu ne Matapouli: Lavea a tautolu ke feleveia mo e tau tagata matapouli he gahua fakamatala he taha fale ke he taha fale ha kua tokologa ne nakai logona e hagahaga mitaki ke tutala ke he tau tagata kehe ne o mai ke he tau gutuhala ha lautolu. Ko e mena ia, kua lata ke lali eketaha ke kumi a lautolu ia ke fakamatala ki ai. (Mata. 10:11) Fai kapitiga gahua po ke kapitiga aoga nakai a koe ne matapouli? Fakailoilo ke tutala ki a ia. Ka ha ha i ai e aoga ma lautolu ne matapouli he matakavi ha mutolu, age falu tapakiaga autiō ha tautolu ke lata mo e poko toka tohi he aoga. Iloa nakai e koe taha ne fai he magafaoa ne matapouli? Fai fakatokatokaaga nakai he matakavi ha mutolu ne foaki e tau matagahua lagomatai ma lautolu ne matapouli po ke tau fale nonofo ne lagomatai ke he tau tagata matapouli? Fakamaama ke he tagata he magafaoa, tagata tali telefoni, po ke ulufakatonu kua fiafia lahi e Tau Fakamoli a Iehova ke lagomatai a lautolu ne matapouli, ti foaki ke age e tau tapakiaga autiō ha tautolu. Fakakite ki a ia e maveheaga he Tohi Tapu to nakai leva ti utakehe tukulagi he Atua e matapouli. He fakamaama e kakano he ahiahi haau, maeke he mena nei ke hafagi e puhala ma haau ke matutaki mo e tau tagata matapouli.
4. Ko e heigoa e tau fakatonuaga ne fakaako ke he mena ne tupu ki a Janet?
4 Ko e matakainaga fifine matapouli ne higoa ko Janet ne ahiahi e fale ne nonofo ai e tau tagata matapouli. Ne kamata e ia e fakatutalaaga mo e fifine fuata. Tala age a Janet ki a ia, “ne fakamaulu e Iesu e tau tagata matapouli ke fakakite e mena ka taute e ia ma e tau tagata matapouli oti.” Ne tutala a laua ke he Fakakiteaga 21:3, 4, ti fakamaama e Janet e puhala ka fakamooli e maveheaga nei he Kautu he Atua. Ne nonoiki e fifine ti pehē: “Nakaila logona e au e mena nei mai he tuaga he tagata matapouli. Laulahi he tau tagata ne maeke ke kitia ne talitonu kua matapouli e tau tagata ha kua fai mena ne taute e lautolu po ke tau tupuna ha lautolu.” Ne meli hila e Janet ke he fifine e matutakiaga ke he tohi Bible Teach, ti fakaako a laua mogonei ke he Tohi Tapu lagaua he faahi tapu.
5. Pete he nakai maeke a tautolu ke fakamaulu e tau tagata matapouli tuga ne taute e Iesu, ko e fakaalofa kua fakakite e tautolu ke he tau tagata matapouli ka tamai e tau monuina fe?
5 Nakai maeke a tautolu ke fakamaulu e tau tagata ne matapouli tuga ne taute e Iesu, ka e maeke a tautolu ke lagomatai a lautolu oti ne fakapouli he atua he lalolagi nei e tau manatu ha lautolu, pihia mo lautolu ne pouli e tau mata, ke maama e kupu mooli he Kupu he Atua. (2 Kori. 4:4) Ne fakamaulu e Iesu e tau tagata taane tokoua ne tata ki Ieriko ha kua “hofihofi ai e fakaalofa” haana ki a laua. (Mata. 20:34) Ka fakakite pihia e tautolu e fakaalofa ki a lautolu ne matapouli, maeke ia tautolu ke moua e magaaho ke lagomatai e falu ke iloa a Iehova, ko ia ka utakehe tukulagi e matapouli.