Ha Tautolu a Puha Fakaako
1. Puhala fe ne tatai e tau tagata fakamatala ke he tau tagata tufuga?
1 Kua fakaaoga he tau tagata tufuga e tau koloa kehekehe. He ha ha i ai falu koloa ne fa fakaaoga ni ke lata mo e tau gahua pauaki, ha ha i ai mogoia falu koloa aoga ne fakaaoga tumau. Ko e tau tagata tufuga lotomatala ne ha ha i ai tumau e tau koloa aoga nei he tau puha gahua ha lautolu, ti ko e tau koloa nei kua lotomatala lahi a lautolu he fakaaoga. Fakamafana he Tohi Tapu e tau Kerisiano takitaha ke fakagahua e tau mena ke he ha lautolu a gahua he fonua ti eke mo “ekegahua nakai fai mena ke mā ai.” (2 Timo. 2:15) Ko e heigoa e koloa ne mua atu e aoga he puha gahua ha tautolu? Ko e Kupu he Atua—ko e matapatu koloa kua fakaaoga e tautolu ke ‘taute tutaki.’ (Mata. 28:19, 20) Ko e mena ia, kua lata ia tautolu ke eketaha ke lotomatala he “fakatokatoka fakahako e kupu moli.” Ka e ha ha i ai foki e tau koloa fakaaoga tumau he puha fakaako ha tautolu ne kua lata he tau Kerisiano oti ke fakamahani ke fakaaoga fakalotomatala ai ke fakaako e kupu mooli ke he tau tagata.—Fakatai 22:29.
2. Ko e heigoa e tau koloa fakaako aoga ha tautolu?
2 Ha Tautolu a Tau Koloa Fakaako Aoga: He nakai ni ko e Tohi Tapu, ko e heigoa e falu koloa kua lata ia tautolu ke fakaaoga? Ko e matapatu koloa ne fakaaoga e tautolu ke fakaako e tau kupu mooli he Tohi Tapu, Ko e Heigoa ne Fakaako Mooli he Tohi Tapu? He oti e fakaako he tohi nei mo e tagata fakaako, fakaaoga e tautolu e “Tapuaki ke he Atua Moli Tokotaha” ke fakaako a ia ke fakagahua e tau matapatu fakaakoaga he Tohi Tapu ke he moui haana he tau aho takitaha. Ko e mena ia, kua lata ia tautolu ke iloa ke fakaaoga e tau tohi ua nei. Lata ke putoia ai foki falu porosua he puha fakaako ha tautolu. Ko e Tala Mitaki Mai he Atua! e taha matapatu koloa ha tautolu ke kamata e tau fakaako Tohi Tapu. Ka fai tagata he fonua ha tautolu ne nakai iloa lahi ke totou po ko lautolu ne nakai loga po ke nakai fai tohi, ti maeke ia tautolu ke fakaaoga foki e Fanogonogo ke he Atua po ke Fanogonogo ke he Atua mo e Moui Tukulagi. Ko e koloa fakaako aoga ke takitaki e tau tagata fakaako ke he fakatokatokaaga ko e porosua Ko Hai kua Taute e Finagalo ha Iehova he Vahā Nei? Ha ha i ai e tau vitiō ne lagomatai ke taute tutaki, tuga e Ko e Ha ne Fakaako e Tohi Tapu?, Ko e Heigoa ne Tupu he Fale he Kautu?, mo e Does God Have a Name?, ko e tau koloa kua lata foki ia tautolu ke mahani ke fakaaoga fakamitaki.
3. Ko e heigoa he tau fufuta Ha Tautolu a Fekafekauaga he Kautu he tau mogo i mua ka lagomatai a tautolu ke taute?
3 Ko e tau fufuta Ha Tautolu a Fekafekauaga he Kautu he tau mogo i mua ka lagomatai a tautolu ke lotomatala ke fakaaoga e falu koloa aoga he puha fakaako ha tautolu. He eketaha a tautolu ke makau he fakaaoga e tau koloa nei, to muitua e tautolu e fakatonuaga omoomoi: “A koe kia koe ni, katoa mo e hau a fakaako atu, kia tumau ki ai; ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.”—1 Timo. 4:16.