Fifitaki ke he Tau Perofeta—Hapakuka
1. Ko e ha kua maeke ia tautolu ke maama e logonaaga he perofeta ko Hapakuka?
1 He fehagai a tautolu mo e tupu ki mua he mahani kelea he lalolagi ne viko takai ia tautolu, maeke ia tautolu ke logona hifo tuga a Hapakuka ne hūhū ki a Iehova: “Ko e ha kua fakakite mai ai e koe kia au e mahani kelea, mo e kitekite a koe ke he matematekelea?” (Hapa. 1:3; 2 Timo. 3:1, 13) He manamanatu fakahokulo ke he ogo ha Hapakuka mo e fakafifitakiaga fakamooli ka lagomatai a tautolu ke mauokafua a tautolu he fakatali ke he aho ke fakafili ha Iehova.—2 Pete. 3:7.
2. Fakakite fēfē e tautolu kua momoui a tautolu ke he mahani fakamooli he vahā nei?
2 Moui he Mahani Fakamooli: He nakai molea e tupetupe ha ko e tuaga kelea lahi he moui, ne fakatumau e mataala mo e gahuahua fakaagaaga ha Hapakuka. (Hapa. 2:1) Ne fakamafana e Iehova e perofeta to fakamooli e kupu Haana he magaaho tonu mo e “to moui e tagata tututonu ke he hana tua.” (Hapa. 2:2-4) Ko e heigoa e kakano he mena ia ma e tau Kerisiano ne nonofo tata lahi mahaki ke he fakaotiaga? Mitaki ke iloa e magaaho he fakaotiaga ka e mua atu ke mauokafua to hoko mai mooli. Fakalagalaga he tua a tautolu ke fakatumau e mataala mo e tuku fakamua e gahua he fonua.—Hepe. 10:38, 39.
3. Ko e ha kua lata ia tautolu ke fakatumau ha tautolu a fiafia he fekafekau ki a Iehova?
3 Olioli ki a Iehova: Ka favale mai a Koku ha Makoku ke he tau tagata ha Iehova, to kamatamata e tua ha tautolu. (Eseki. 38:2, 10-12) Ko e nakai fetataiaki ne moua mai e tuaga uka, pihia foki ki a lautolu ne kautū. Liga gahoa e tau mena kai, liga galo e tau koloa, ti liga nakai mitaki e tau tutūaga he tau momoui. To tali atu fēfē a tautolu ka tutupu e tau mena uka? Na amanaki a Hapakuka to tutupu e tau mena uka, ti eketaha a ia ke fakatumau e fiafia he fekafekau ki a Iehova. (Hapa. 3:16-19) “Ko e fiafia kia Iehova” to lagomatai foki a tautolu ke fakauka ke he tau kamatamata i mua.—Nehe. 8:10; Hepe. 12:2.
4. Ko e heigoa e fiafia ha tautolu mogonei mo e he magaaho i mua?
4 Ko lautolu kua fakahao e Iehova mai he aho he fakafiliaga haana hane hoko mai to matutaki ke fakaako ke he puhala moui he Atua. (Hapa. 2:14) Ko lautolu foki ka fakaliu tu mai to fakaako hagaao ki a Iehova. Pihia foki mogonei, kia fakaaoga e tautolu e tau magaaho oti ke vagahau hagaao ki a Iehova mo e haana tau gahua homo ue atu!—Sala. 34:1; 71:17.