Kua Hiki Kia e Kupu Tohia he Atua?

Falu tagata ne manamanatu kaeke kua hiki e Kupu tohia he Atua. Talahau he perofeta ko Isaia ko e kupu he Atua “kua tumau ia tukulagi ni.” (Isaia 40:8) Iloa mooli fēfē e tautolu kua hakotika e fakamau he tau maveheaga he Atua?

Ha ha he Atua e malolō ke fakamau e hakotika he Kupu haana. He tau vahā i tuai he mogo ne tohilima e tau lagaki, kua fakaeneene lahi e tau tagata ne tohi ke totou e tau matatohi takitaha he tau tohiaga tapu ke iloa tonu kua nakai fai mena ne lafi, hiki, po ke utakehe. Ka kua nakai mitaki katoatoa e tau tagata tohia ti fai hepehepe ikiiki agaia ne putoia ai.

ILOA FĒFĒ E TAUTOLU KUA MAU AGAIA E FEKAU FAKAMUA HE ATUA I LOTO HE TAU TOHIAGA TAPU?

Kua totou afe e tau lagaki he tau tohi fakamau i tuai he tau Tohiaga Tapu. Ka taha e lagaki kua hepe fakatote, ne fakatatai ai ke he falu lagaki ke iloa tonu ko e kupu mooli.​—Ke iloa atu foki, kikite e vala tala “Has the Bible Been Changed or Tampered With?” he jw.org.

Ma e fakatai, manamanatu ke he tau fakamauaga i tuai ne fakahigoa ko e tau Dead Sea Scroll ne moua he tau ana ne tata ke he Tahi Mate he 1947. I loto he tau tohi tuai nei e tau vala he tau Tohiaga Tapu ne molea e ua e afe tau kua mole. Fakatatai he tau tagata pulotu e tau tohi fakamau tuai nei ke he tau Tohiaga Tapu ha tautolu mogonei. Ko e heigoa ne moua e lautolu?

Moua he tau tagata pulotu ko e tau tala he Kupu he Atua ne ha ha mo tautolu mogonei kua tatai mo e tau tohiaga fakamua.a He kumikumi fakahokulo ke he tau tohi fakamua tuai kua fakamooli ko e tau kupu ne totou e tautolu he tau Tohiaga Tapu ko e fekau fakamua he Atua. Maeke a tautolu ke iloa tonu kua puipui he Atua e hakotika he tau Tohiaga Tapu haana ma tautolu mogonei.

Ti maeke mogoia a tautolu ke totou e Kupu he Atua mo e falanaki katoatoa mo e mauokafua kua hakotika ai. He tokaloto e mena ia, kia kumikumi atu foki a tautolu he vala tala ka mui mai ke he mena ka fakaako e tautolu hagaao ke he Atua he puhala mai he tau perofeta haana.