Talahauaga he Tau Tagata ke he Liogi
“Ka liogi au, logona hifo e au tuga ko e Atua he tapa haaku ne totō e lima haaku mo e takitaki au ka fakahahaku.”—MARÍA.
“Mate e hoana haaku he mole e gagao kenesā ke 13 e tau. Manatu e au he liogi ke he Atua he tau aho oti mo e logona hifo kua fanogonogo mooli a ia ke he haaku a mamahi. Logona hifo e au e mafola.”—RAÚL.
“Ko e liogi ko e mena fakaalofa uho he Atua ke he tau tagata.”—ARNE.
Ko e mena fakaalofa uho e liogi ma María, Raúl, Arne, mo e tokologa atu foki. Logona hifo e lautolu he puhala he liogi kua maeke a lautolu ke tutala ke he Atua, fakaaue ki a ia, mo e kumi e lagomatai haana. Talitonu katoatoa a lautolu ke he talahauaga he Tohi Tapu hagaao ke he liogi ke he Atua: “Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.”—1 Ioane 5:14.
Ka e tokologa e tagata ne uka ke talia e talahauaga he Tohi Tapu hagaao ke he liogi. Fakamaama e Steve e logonaaga haana hagaao ke he liogi: “He 17 e tau haaku he moui, tokotolu e kapitiga haaku ne mamate he tau pakia kehekehe. Taha ne mate he pakia he motokā, mo e tokoua ne tomo i tahi.” Ko e heigoa ne taute e Steve? “Liogi au ke he Atua ma e tau tali ke he kakano ne tutupu e tau mena oti nei ka e ai fai tali ne moua e au. Ti hūhū hifo au, ‘Ko e ha ne liogi ai?’” Ko e tau liogi ne tuga kua nakai fai tali ati hūhū e tokologa kua fai kakano mooli nakai ke liogi.
Fai kakano foki ne fakauaua e tau tagata ke liogi. Falu ne talahau ha kua iloa he Atua e tau mena oti, fitā he mailoga e ia e tau manako po ke tau lekua ha tautolu ti nakai lata a tautolu ke tala age ki a ia e tau mena oti.
Falu ne manatu kua fakaheu he Atua ke fanogonogo ke he tau liogi ha lautolu ha ko e tau hehē ha lautolu kua mole. “Ko e lekua lahi mahaki haaku,” he ui e Jenny, “logona hifo e au e fakateaga. Tokihala au he tau mena ne taute ati pehē hifo au kua nakai lata au ke logona he Atua.”
Fēfē e logonaaga haau hagaao ke he liogi? Ka manamanatu po ke fakauaua pihia a koe hagaao ke he liogi, kia mafanatia ke he tau tali atihake he Tohi Tapu. Falanaki a tautolu ke he talahauaga he Tohi Tapu hagaao ke he liogi;a maeke ke lagomatai a koe ke moua e tau tali ke he tau hūhū tuga anei:
Logona mooli nakai he Atua e tau liogi ha tautolu?
Ko e ha ne nakai tali e falu liogi?
Puhala fe ka liogi a koe ti logona?
Lagomatai fēfē he tau liogi a koe?
a Ko e tau liogi he tau fekafekau tokologa he Atua, putoia ai ha Iesu Keriso i loto he Tohi Tapu. Molea 150 e liogi i loto he tau Tohiaga Tapu Heperu, ne iloa ko e Maveheaga Tuai.