Ko e Ha kua Nakai Tali he Atua e Tau Liogi Oti?
Ko e ha tautolu a Matua he lagi ko Iehova ko e Atua kua makai mo e fiafia ke logona e tau liogi fakamooli ha tautolu. Ka e ha ha i ai e tau mena ka nakai tali e ia e tau liogi ha tautolu. Ko e heigoa e tau mena nei, ti ko e heigoa kua lata ke tokaloto e tautolu ka liogi? Hanei falu takitakiaga he Tohi Tapu.
“Ka liogi a mutolu, aua neke pola mau ha mutolu a tau kupu.”—Mataio 6:7.
Nakai manako a Iehova ki a tautolu ke fatiaki e tau liogi ako manatu po ke totou mai he tohi liogi. Ka e manako a ia ki a tautolu ke tutala mai he loto. Manamanatu ke he logonaaga haau ka fatiaki he kapitiga e tau kupu agaia ki a koe he tau aho takitaha. Atāina mo e tutala fakamooli e tau kapitiga mitaki. Ka talahau ni e tautolu e tau kupu ha tautolu he liogi kua tala age e tautolu e tau manatu galo ke he Matua ha tautolu he lagi.
“Kua ole atu a mutolu, ka e nakai moua, ha kua ole atu mo e nakai lata.”—Iakopo 4:3.
Maama e tautolu to nakai tali he Atua e tau liogi ka ole a tautolu ma e tau mena ne iloa e tautolu kua nakai manako a ia ke taute po ke moua e tautolu. Ma e fakatai, to tali nakai e Iehova e ole he tagata pelē tupe ke monuina he loga e tau tupe pete ka hataki fakamaaliali e Ia e lotokai mo e taofiaga taulatua ke he tōmafola? (Isaia 65:11; Luka 12:15) Nakai amanaki mooli a tautolu ki a Iehova ke tali e tau liogi pihia! Ke tali he Atua a tautolu ka liogi ki a ia, lata a tautolu ke iloa tonu kua lagotatai e tau ole ha tautolu mo e tau mena ne talahau e ia he Tohi Tapu.
“Ko ia kua haga kehe hana tau teliga mo e nakai fanogonogo a ia ke he fakatufono, kua eke ni mo mena vihiatia hana a liogi.”—Tau Fakatai 28:9.
He tau vahā Tohi Tapu, nakai talia he Atua a lautolu ne tiaki e tau fakatufono tututonu haana. (Isaia 1:15, 16) Nakaila hiki e tau logonaaga haana. (Malaki 3:6) Ka manako ke tali he Atua e tau liogi, kua lata a tautolu ke momoui fakalagotatai mo e tau fakatufono haana. Ka e kua ka hehē a tautolu he mogo kua mole? Kakano kia to nakai fanogonogo a Iehova ki a tautolu? Nakai! To fakamagalo totonu he Atua a tautolu ka liliuina e tau momoui mo e eketaha ke taute e tau mena kua fakafiafia a ia.—Gahua 3:19.