Puhala Fe ka Liogi a Koe ti Logona?

LIOGI KI A IEHOVA KO E ATUA PUHALA HE HIGOA HA IESU

“Ko e tau mena oti ke ole atu ai a mutolu ke he Matua ha ko e haku a higoa, to foaki mai e ia kia mutolu.”​—Ioane 16:23.

Fakakite fakamaali he tau kupu ha Iesu kua manako a Iehova ki a tautolu ke liogi ki a ia he higoa ha Iesu Keriso ka e nakai puhala he tau mena fakatai, tau tagata tapu, tau agelu, po ke tau tupuna kua mamate. Ka liogi a tautolu ke he Atua he higoa ha Iesu, fakakite e tautolu kua mailoga e tautolu e matagahua aoga lahi ha Iesu. “Nakai hau taha ke he Matua, ka noa mo au,” he ui e Iesu.​—Ioane 14:6.

TUTALA MAI HE LOTO

“Kia fakatokanoa e mutolu ha mutolu a tau loto ki mua hana.”​—Salamo 62:8.

Ka liogi a tautolu ki a Iehova, lata a tautolu ke tutala tuga ke he matua taane fakahele. He nakai totou mai he tohi po ke fatiaki e taha mena ne ako manatu, lata a tautolu ke tutala fakalilifu ki a ia mai he tau loto.

LIOGI FAKALAGOTATAI MO E FINAGALO HE ATUA

“Kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.”​—1 Ioane 5:14.

He Tohi Tapu, kua tala mai e Iehova ko e Atua ki a tautolu e mena ka taute e ia ma tautolu mo e mena kua manako a ia ke taute e tautolu ma haana. Ke talia he Atua e tau liogi ha tautolu, lata a tautolu ke liogi “ke lata mo e hana finagalo.” Ke taute pihia, lata a tautolu ke fakaako e Tohi Tapu ke iloa mitaki a ia. Ka taute e tautolu e mena ia to fiafia a ia ke he tau liogi ha tautolu.

KO E HEIGOA KA LIOGI HAGAAO KI AI?

Liogi ma e Tau Manako Haau. Maeke a tautolu ke liogi ke he Atua he tau aho takitaha ma e tau manako fakatino​—ko e tau mena kai, tau mena ke tui, mo e tau mena ke nonofo. Liga liogi foki a tautolu ma e iloilo ke taute e tau fifiliaga hako mo e malolō ke fakauka ke he tau kamatamata ha tautolu. Liogi a tautolu ma e tua, fakamagaloaga, mo e lagomatai he Atua.​—Luka 11:3, 4, 13; Iakopo 1:5, 17.

Liogi ma e Falu. Ko e tau matua ne fakaalofa ke he tau fanau ha laua kua fiafia ka fakafeofanaki e tau fanau. Manako foki a Iehova ke he tau fanau haana he lalolagi ke felevekiaki. Latatonu ke liogi ma e ha tautolu a tau hoa, tau fanau, tau magafaoa, mo e tau kapitiga. Kia “liogi ko e taha ma taha,” he tohi he tutaki ko Iakopo.​—Iakopo 5:16.

Talahau e Loto Fakaaue. Hagaao ke he Tufuga ha tautolu, pehē e Tohi Tapu: “He hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.” (Gahua 14:17) Ka manamanatu a tautolu hagaao ke he tau mena oti ne taute he Atua ma tautolu to omoomoi a tautolu ke talahau e tau fakaaue ha tautolu ki a ia he liogi. Lata mooli foki a tautolu ke fakakite e fakaaue ke he Atua he puhala ne momoui a tautolu.​—Kolose 3:15.

KIA FAKAUKA MO E LIOGI TUMAU

Liga momoko a tautolu he falu mogo ha kua nakai moua mafiti e tali ke he tau liogi fakamooli ha tautolu. Kakano kia kua nakai manatu he Atua a tautolu? Nakai pihia! Manamanatu ke he tau mena nei ne tutupu kua fakakite e liga lata ha tautolu ke liogi tumau.

Ko Steve ne totoku he vala tala he kamataaga ne talahau, “Ane mai ai liogi, kua leva e galo e fiafia haaku.” Ko e heigoa ati hiki ai? Kamata a ia ke fakaako e Tohi Tapu mo e fakaako e lata ke liogi mo e fakamakamaka. “Liogi au ke he Atua ke fakaaue ki a ia ma e tau lalagoaga totonu oti ne moua e au mai he tau kapitiga fakahele haaku,” he ui e Steve. “Nakaila fiafia pihia au he tali mai.”

Ka e kua a Jenny ne logona hifo kua fakateaga a ia ke logona he Atua? Pehē a ia, “He tuaga fakateaga lahi haaku, olelalo au ke he Atua ke lagomatai au ke maama e kakano ne logona hifo e au e fakateaga.” Lagomatai fēfē he mena nei a ia? “He tutala ke he Atua kua lagomatai au ke kitia e onoonoaga haana, ke kitia foki pete he fakahala he loto haaku au, ka e nakai pihia e onoonoaga haana. Lagomatai foki he mena ia au ke nakai fakalolelole ka e tumau ke lali.” Ko e fua? “Lagomatai he liogi au ke kitia a Iehova ko e Atua, Matua, mo e Kapitiga mooli, fakaalofa, mo e leveki ka tumau ke lalago mo e lagomatai au ka eketaha au ke lali tumau ke taute e mena ne manako a ia.”

Manamanatu foki ke he mena ne tupu ki a Isabel. He fatu a ia, tala age e tau ekekafo ki a ia to nakai malolō mitaki e tama haana ka fanau. Momoko lahi mahaki a ia. Falu ne tala age ki a ia ke moumou e tama he manava. “Fia mate au he malipilipi e loto.” Ko e heigoa haana ne taute? “Liogi ti liogi au ke he Atua ke lalago mai au.” Fai magaaho ti fanau e ia e tama taane ko Gerard ne nakai malolō e tino. Logona hifo nakai e Isabel kua tali he Atua e tau liogi haana? Ē logona! He puhala fe? “He kitia e au e tama taane haaku kua 14 e tau mogonei hane fiafia e moui pete ne matafatia haana. Mailoga e au ko e tali mitaki lahi a Gerard ke he tau liogi haaku, ko e monuina mua ue atu ha Iehova ko e Atua ne foaki ki a au.”

Ko e tau talahauaga mooli pihia kua omoomoi a tautolu ke manamanatu ke he tau kupu he salamo: “Iehova na e, kua logona tuai e koe e manako he tau tagata matematekelea; kua fakamau e koe ha lautolu a tau loto, kua haga ki ai hāu a na teliga.” (Salamo 10:17) Ko e tau kakano uho lahi ke fakatumau ke liogi!

Loga e tau liogi ha Iesu i loto he Tohi Tapu. Ko e liogi ne iloa lahi ko e liogi ne fakaako e ia ke he tau tutaki haana. Ko e heigoa ka fakaako e tautolu mai i ai?