Ko e Tohi Mai he Kau Fakatufono
Ke he Tau Matakainaga Fakahelehele:
Ko e ha tautolu a Matua he lagi, ko Iehova, ko e fakafifitakiaga mua ue atu he fakaalofa. Ko e mena ia, ne pehē e Tohi Tapu: “Ko e Atua ko e fakaalofa a ia.” (1 Ioa. 4:8) Pete ni ko Iehova ko e Atua Malolō Ue Atu, ne nakai pehē e Kupu haana, “ko e Atua ko e malolō a ia.” Ne fakavē hokoia e pule haana ke he fakaalofa. Kua futia mooli he mena nei a tautolu ki a ia!
Uhoaki ai, kua nakai fakaohooho e Iehova a tautolu ke fekafekau ki a ia. Nakai pule kelea a ia. Kua manako a ia ki a tautolu ke fekafekau ki a ia ha ko e ha tautolu a fakaalofa mai he tau loto. Ka taute e tautolu e mena nei, kua fakakite e tautolu kua manako a tautolu ke he pule haana ha kua talitonu a tautolu ko e puhala ne pule a ia kua hako mo e fakaalofa. Kua kitia maaliali e mena nei mai he kamataaga he fakamauaga tala tuai he tagata.
He nakai fakaohooho a Atamu mo Eva ke omaoma ki a ia, ne age e Iehova ki a laua e magaaho ke taute e laua e fifiliaga. Ane mai ofania mooli e laua a Iehova mo e loto fakaaue ke he tau mena ne taute e ia ma laua, to liga fakaheu e laua e tau lagatau ha Satani ke totoko.
Fai magaaho he mole, ne pehē a Mose he tau kupu fakamavehe haana ke he motu ko Isaraela: “Kitiala, kua tuku atu e au ki mua hau ke he aho nai ko e moui mo e monuina, ko e mate foki mo e malaia.” (Teu. 30:15) Ne ha ha he tau tagata e atāina ke fifili e puhala ne manako ke momoui ai a lautolu. Pihia foki ni, ne pehē a Iosua ke he tau Isaraela: ‘Kaeke foki kua kelea kia mutolu ke fekafekau kia Iehova, ti fifili la e mutolu ke he aho nai, po ko hai ke fekafekau ki ai a mutolu.’ Ne tali atu e tau tagata ki a Iosua: “Kia mamao ia mautolu ke tiaki e mautolu a Iehova, ke fekafekau ai ke he tau atua kehe.” (Iosua 24:15, 16) Pihia foki e logonaaga ha tautolu he vahā nei. Ha kua fakaalofa a tautolu ki a Iehova, kua “mamao” mo tautolu ke tiaki a ia.
I loto he fakapotopotoaga Kerisiano, kua maama mitaki e tautolu e kakano ke atāina. Pete ni kua kotofa ke he tau motua ke fakatonu mo e akonaki foki, kua nakai kumi a lautolu ke pule lahi ke he tau momoui po ke tua he falu. Ne tohia he aposetolo ko Paulo: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia; ha ko e tua kua tumau ai a mutolu.”—2 Kori. 1:24.
Ko e fiafia ha ia ke taute taha mena ha kua manako a tautolu ke taute, ka e nakai ha ko e fakaohooho ke taute! Kua uiina e Iehova a tautolu ke taute taha mena mitaki mai he loto fakaalofa. Ko e aoga he mena ia kua kitia mai he tau kupu omoomoi ha Paulo: “Kaeke foki kua tufatufa e au haku a tau mena oti ke fagai aki e tau tagata nonofogati; kaeke foki ke tuku atu haku a tino ke huhunu ka e nakai fai fakaalofa au, kua nakai aoga e tau mena ia kia au.”—1 Kori. 13:3.
Kua fiafia lahi mooli a Iehova—mo e ko e fakahekeaga—ke kitia e tau miliona he tau matakainaga kua fekafekau ki a ia ha ko e fakaalofa mai he tau loto katoatoa ha lautolu!
Kua fakaalofa hofihofi a Iehova ke he tau fekafekau oti haana, putoia ki ai a mutolu oti ma tau fanau mo e tau fuata ne kua fakakite e fakaalofa ki a Iehova ka e nakai ke he lalolagi mo e tau manako lotokai ke he tau mena i ai. Kia mauokafua kua fakaalofa hofihofi foki a mautolu ki a mutolu.—Luka 12:42, 43.
Ha ko e fakaalofa ki a Iehova, ne fakaaoga e mutolu 1,748,697,447 e tulā ma tau matakainaga mo e tau fuata oti ke fakapuloa e tala mitaki. Ha kua omoomoi he fakaalofa, ne toko 7,782,346 ne fakalataha ke he gahua he fonua he lalolagi katoa. Kua fiafia lahi a tautolu ha kua toko 268,777 a lautolu ne foou, putoia e tokologa he tau fuata mui ne kua fakamailoga ha lautolu a tukuleleaga ki a Iehova ha kua papatiso ke he vai. Ko e kakano he mena nei kua 5,168 e evalesi ne papatiso he tau matahiku faahi tapu takitaha. Kua aamotia mooli e tau loto ha mautolu ha ko e mena nei!
He magahala nei he fakaotiaga, ko e tau tagata he Atua kua lali ke kautu mai he tau lekua loga, tau paleko, tau favaleaga, tau gagao ti taufetului e falu mo e momotua he tau tino. Ka kua eketaha a tautolu ke ua “tukumuli” po ke “fakalolelole.” Fakaalofa lahi mahaki atu a mautolu ki a mutolu.—Hepe. 10:39; 2 Kori. 4:16
Ha mutolu a tau matakainaga,
Kau Fakatufono he Tau Fakamoli a Iehova