Ko e Tohi Mai he Kau Fakatufono
Ke he Tau Matakainaga Fakahelehele:
“Kua fakaaue a mautolu nakai noa ke he Atua, ha ko mutolu oti kana, kua totoku atu a mutolu ke he tau liogi ha mautolu, Kua nakai noa ha mautolu a manatu ke he gahua ha mutolu ke he tua, mo e fakamalolo ke he fakaalofa, mo e fakauka ke he amaamanaki ke he Iki ha tautolu ko Iesu Keriso, ki mua he Atua, ko e Matua ha tautolu haia.” (1 Tesa. 1:2, 3) Ko e fulufuluola mooli ha ia he tau kupu nei kua fakakite ha mautolu a tau logonaaga hagaao ki a mutolu! Fakaaue a mautolu ki a Iehova ma mutolu mo e gahua mitaki ha mutolu ne taute. Pihia he ha?
He tau kua mole, ne fagahuatia a mutolu he ‘gahua ke he tua mo e fakamalolo ke he fakaalofa’ kua felauaki mo e tau gahua he Kautu. Tokologa ia mutolu ne kumi puhala ke fakalaulahi e gahua fakamatala ha mutolu. Falu ne hiki ke he tau matakavi, pihia mo e falu motu foki ne manako lahi ma e tau tagata fakamatala he Kautu. Falu ne fakalaulahi ha lautolu a gahua he fonua he fai vala he fakamatala ke he toloaga tagata. Tokologa ne fakalagalaga ke paionia fakakū he magahala Fakamanatuaga, he mahina ahiahi mai he leveki takaiaga, po ke matagahua pauaki ia Aokuso 2014. Pete ne kehekehe e tau tutūaga ha mutolu, kitia e mautolu kua gahua loto katoa a mutolu ma Iehova, ti nava atu a mautolu ki a mutolu. (Kolo. 3:23, 24) Ko e ha mutolu a ‘gahua mo e tua fakamooli’ ko e kakano mooli ma mautolu ke fakaaue ki a Iehova!
Kua hokulo foki e loto fakaaue ha mautolu ke he ha mutolu a ‘gahua mo e fakaalofa’ ke lata mo e talagaaga he tau fale fakateokarasi he lalolagi katoa. Manako lahi a tautolu ma e tau fale pihia, ha kua matutaki e numera he tau tagata ha Iehova ke tupu. (Isaia 60:22) Manamanatu la, ko e tapunu he tau tagata fakailoa ha tautolu he tau kua mole ko e 8,201,545, ka ko e evalesi he ha tautolu a tau tagata fakaako Tohi Tapu ko e 9,499,933 he tau mahina takitaha. Ha ko e fua he tupu lahi, loga e la ofisa ne lata ke fakalahi po ke fakafoou. Mooli, kakano e mena nei kua lata a tautolu ke loga atu foki e tau Fale he Kautu! He magaaho taha, lata he tau faahi loga he lalolagi ke fai ofisa fakaliliu matutaki mamao ke maeke e tau tagata fakaliliu ha tautolu ke nonofo mo e gahua ai he matakavi ne vagahau e tau vagahau ha lautolu.
Ti maeke ia tautolu ke hūhū hifo, ‘Ko e heigoa haaku ka taute ke lalago e talagaaga he tau fale nei?’ Falu ha tautolu kua liga maeke ke foaki noa e magaaho ke fai vala he gahua talaga. He fai iloilo talaga a tautolu po ke nakai, ha ha ia tautolu oti e kotofaaga ke foaki e tau koloa uho ha tautolu ma e tau matagahua aoga nei. (Fakatai 3:9, 10) He magahala ne talaga e faituga, ne fiafia e tau Isaraela ke foaki atu ati fakailoa ai ki a lautolu ke mataofi ke ua tamai ha mena. (Esoto 36:5-7) Ko e tau fakafifitakiaga faka-Tohi Tapu mooli pihia kua aamotia ti fakalagalaga e tau loto ha tautolu. Ko e ha mutolu a ‘gahua mo e fakaalofa’ ke he tau faahi pauaki nei he gahua tapu ko e taha kakano ma mautolu ke fakaaue ki a Iehova!
Ha ha ia mautolu e kakano uho ke fiafia he kitia e mautolu e fakauka mauokafua he tau matakainaga ha tautolu. Ma e fakatai, manamanatu ke he tau matakainaga fakahele ha tautolu i Korea Toga. Tali mai he 1950, ne fakahala e tau matakainaga taane fuata ha tautolu he motu ia ke kehekehe e leva he tuku a lautolu ke he fale puipui ha ko e mauokafua ke he ha lautolu a tuuho faka-Kerisiano. Totou atuhau tuai he fakauka e tau matakainaga taane ha tautolu ke he tuaga nei mo e mauokafua. Ko e fakafifitakiaga ha lautolu he fakauka ne atihake e tua ha tautolu!
I Eritrea, tokotolu he tau matakainaga ha tautolu ne tuku he fale puipui ke molea 20 e tau. Ko e falu ne putoia ha tautolu a tau matakainaga fifine mo e tau tama ha lautolu ne tuku he fale puipui ke he magaaho kū. Loga e laliaga ne taute ke fakatoka mai a lautolu, ka e nakai fai ne kautū. Nakai fakahui e tau matakainaga ha tautolu. Ne tumau e fakamooli ha lautolu i lalo he tau tutūaga vihi. Nakai nimo e mautolu a lautolu nei ne fakamooli ke he tau liogi ha mautolu.—Roma 1:8, 9.
Laulahi mooli ia mutolu kua nakai tuku he fale puipui ha ko e ha mutolu a tua. Ka e tokologa ia mutolu hane fahia mai he vahā motua, tau lekua malolō tino, totoko he tau hoa po ke tau magafaoa nakai tua, ti pihia mo e falu paleko fakatagata ne liga ko koe ni ne iloa. Pete he pihia, kua matutaki a koe ke fekafekau fakamooli ki a Iehova! (Iako. 1:12) Nava e mautolu a mutolu. Ko e fakauka fakamanavalahi ha mutolu ko e taha kakano ma mautolu ke fakaaue ki a Iehova.
Ē, ko e ha mutolu a gahua mo e tua fakamooli, gahua mo e fakaalofa, mo e fakauka kua foaki e tau kakano homo ue atu ma mautolu ke “fakaheke atu . . . kia Iehova, ha kua mitaki ni a ia.” (Sala. 106:1) Kua ofania mooli e mautolu a mutolu oti, ti liogi a mautolu to fakamalolō, fakatumau, mo e fakamonuina e Iehova a mutolu ke maeke a mutolu ke fekafekau tukulagi ki a ia.
Ha mutolu a tau matakainaga,
Kau Fakatufono he Tau Fakamoli a Iehova