Tau Fifine Pope ne Eke mo Matakainaga Fakaagaaga Mooli

Felisa: Tupu hake au he magafaoa tu tokolalo i Sepania. Ko e tau Katolika e magafaoa haaku mo e malolō tumau a mautolu he lotu. Ti toko 13 he magafaoa haaku ko e tau patele po ke gahua ma e lotu. Ko e patele mo e faiaoga e kasini he matua fifine haaku he aoga Katolika. He mole e mate haana, ne fakalilifu he Pope ko John Paul II a ia he fakamonuina a ia. Ko e tagata gahua mo e tau lapatoa e matua taane haaku, ti gahua e matua fifine haaku he tau fonua. Toko valu a mautolu ko e tau fanau, ti ko e uluaki au.

He 12 e tau haaku, ne kamata e latau fakamotu i Sepania. Mole e latau ti fakafano e matua taane haaku ke he fale puipui ha kua nakai fiafia e fakatufono ke he tau manatu fakapolitika haana. Ne uka e matua fifine haaku ke moua e mena kai ke lata mo mautolu oti. Ati fakafano e ia e tau tehina tokotolu haaku ko Araceli, Lauri, mo Ramoni ke nonofo mo e tau taupou pope he fale pope he taone ko Bilbao. To lahi e mena kai ka moua he tau tehina haaku i ai.

Araceli: He mogoia ne 14 e tau haaku, 12 ha Lauri, mo e 10 ha Ramoni. Ne misi lahi e mautolu e magafaoa. He fale pope, ko e matagahua ha mautolu ke fakameā. Ua e tau he mole, ne fakafano he tau taupou pope a mautolu ke he fale pope lahi i Zaragoza ne leveki e tau tagata momotua. Ne lahi e gahua ha mautolu he fakameā e peito ti mategūgū lahi a mautolu.

Felisa: Mogo ne ō e tau tehina haaku ke he fale pope i Zaragoza, ne fifili he matua fifine mo e agikolo haaku ko e patele he matakavi ia ke fakafano foki au. Manako a laua ke fakamamao au mai he tama taane ne fia loto ki a au. Amanaki au ke fai magaaho he fale pope ha kua fakaalofa au ke he Atua. Ne fano au he tapu he tau aho oti, ti manako foki ke eke mo misionare Katolika ke tuga e kasini haaku i Aferika.

Ka e he fale pope, logona hifo e au kua nakai fai atāina ke taute e tau mena ne manako au ke taute. Nakai fakamafana he tau taupou pope au ke fekafekau ke he Atua he taha motu kehe, tuga ne amanaki au ki ai. Ti taha e tau he mole, liu au ki kaina mo e leveki e agikolo haaku ne patele. Taute e au e tau gahua kaina ma haana, ti talahau tokoua e maua e liogi Rosary he tau afiafi takitaha. Fiafia foki au ke taute e tau keu he fale tapu mo e fakatapulu e tau mena fakatai ko Maria mo e “tau tagata tapu.”

Araceli: He nofo au i Zaragoza, ne taute e au e omonuo fakamua ne lata ke eke mo taupou pope. Fifili mogoia he tau taupou pope ke vevehe a au mo e tau tehina haaku. Ti fakafano e lautolu au ke he fale pope i Madrid, ka e fakafano a Lauri ke he fale pope i Valencia. Nofo ni a Ramoni i Zaragoza. I Madrid, ne taute e au e omonuo ke uaaki haaku ne lata ke eke mo taupou pope. Tokologa e tagata tuga e tau tagata ō aoga mo e tau tagata momotua ne o mai ke nonofo he fale pope. Kua loga lahi e gahua ke taute. Ti gahua au he fale gagao he fale pope.

Ne amanaki lahi au ke he moui haaku ko e taupou pope. Manatu ni au to lahi e magaaho haaku ke totou mo e fakaako e Tohi Tapu. Ka e momoko au ha kua nakai pihia. Nakai fai tagata ne fakaaoga e Tohi Tapu po ke tutala hagaao ke he Atua po ko Iesu. Fai vala Latini ne fakaako e au, kumikumi ke he tau momoui he “tau tagata tapu” Katolika, mo e tapuaki ki a Maria. Ka e laulahi he tau magaaho, ne gahua lahi a mautolu.

Kamata au ke logona hifo e tupetupe mo e fakaatukehe. Logona hifo e au kua lata au ke gahua tupe ke lagomatai e magafaoa haaku ka e nakai gahua he fale pope ke fakamonuina aki e falu. Ti tutala au ke he takitaki fifine ne leveki hagaao ke he mena nei ti tala age ki ai e manako haaku ke fano kehe. Ka e loka e ia au ki loto he taha poko. Manatu a ia to lagomatai he mena nei au ke nofo.

Ne fakatoka he tau taupou pope au mai he poko, ka ko e mogo ne mailoga e lautolu kua manako agaia au ke toka e fale pope, ti liu a lautolu loka au ki loto he poko. He mole e lagatolu e taute e lautolu e mena nei, pehē a lautolu to maeke au ke fano kaeke tohi e au: “Ko e fano fai au ha kua manako au ke fekafekau ki a Satani ka e nakai ke he Atua.” Ofo lahi au. Ne manako lahi mahaki au ke fano, ka e to nakai tohi e au e tau kupu ia. Fakahiku, pehē au kua manako au ke tutala ke he patele, ti tala age e au e mena ne tupu. Moua e ia e fakaatāaga mai he pisopo ke liu fakafano au ke he fale pope i Zaragoza. He fai mahina i ai, ne fakaatā au ke fano. Nakai leva he mole, ne toka foki e Lauri mo Ramoni e fale pope.

KO E TOHI NE VEVEHE A MAUTOLU

Felisa: Fai magaaho he mole, ne faitaane au ti nofo i Cantabria, ko e magamotu i Sepania. Tumau agaia au ke fano he tapu. He taha Aho Tapu he fale tapu, ne vale fakaleolahi e patele, “Onoono ke he tohi ē!” Ne fakakite e ia ki a mautolu e tohi The Truth That Leads to Eternal Life. Pehē a ia, “Ka fai tagata ne atu e taha lagaki ki a koe, tamai ki a au po ke liti ke he vao!”

Nakai fai tohi pihia au, ka e loto au ke he taha. Fai aho mogoia he mole, tokoua e fifine ne o mai ke he fale haaku. Ko e Tau Fakamoli a Iehova a laua, ti foaki e laua e tohi ia ki a au. Ne totou e au he pō ia ni. Mogo ne liliu mai e tau fifine, hūhū e laua ki a au kua manako nakai au ke fakaako e Tohi Tapu, ti talia e au.

Kua manako tumau au ke fakafiafia e Atua. Ti fakaako e au e kupu mooli hagaao ki a Iehova, mo e kamata au ke hokulo e fakaalofa ki a Ia. Ne manako au ke tala age ke he tau tagata oti hagaao ki a ia. He 1973, ne papatiso au. Ka maeke, lali tumau au ke tutala ke he magafaoa haaku hagaao ke he kupu mooli. Ka ko e magafaoa haaku, mua atu ke he tehina haaku ko Araceli ne fakamakamaka kua hepe e mena haaku kua talitonu ki ai.

Araceli: Ha kua kelea lahi e puhala ne taute aki au he fale pope, ne ita au ti nakai fiafia ke he lotu haaku. Ka e tumau ni au ke fano he tapu he tau Aho Tapu, ti liogi e au e liogi Rosary he tau aho oti. Manako agaia au ke maama e Tohi Tapu, ti ole au ke he Atua ke lagomatai mai au. Talahau mogoia e Felisa ki a au e tau mena haana ne kua fakaako. Ha kua fiafia lahi a ia ke he mena ne talitonu a ia ki ai ne manatu au kua heketia a ia. Nakai talia e au e tau mena ne talahau e ia.

Fakamui, liu au ki Madrid ke gahua ti faitaane. He tau tau kua mole, mailoga e au ko e tau tagata ne ō tumau he tapu ne nakai momoui fakatatau ke he tau fakaakoaga ha Iesu. Ati fakaoti e fano tapu haaku. Kua nakai liu au ke talitonu ke he “tau tagata tapu” po ke afi tote, ti manatu au kua nakai maeke e patele ke fakamagalo e tau agahala. Tiaki foki e au e tau mena fakatai he lotu haaku. Ailoa e au ko e hako nakai e mena haaku ne taute. Ne momoko e logonaaga haaku, ka e tumau au ke liogi ke he Atua: “Manako au ke iloa a koe. Lagomatai au!” Manatu e au e Tau Fakamoli a Iehova ne nokonoko lagaloga he gutuhala haaku, ka e ai hafagi e au. Nakai falanaki au ke he ha lotu.

Nofo e tehina haaku ko Lauri i Falani, ti nofo a Ramoni i Sepania. Kavi ke 1980, ne kamata a laua ke fakaako e Tohi Tapu mo e Tau Fakamoli a Iehova. Mauokafua au, ke tuga a Felisa, nakai mailoga e laua kua loga e pikopiko kua fakaako e laua. Fakamui ne feleveia au mo Angelines ko e taha he tau katofia haaku, ti eke a maua mo tau kapitiga tata. Ko e taha he Tau Fakamoli a Iehova foki a ia. Lagaloga e hūhū a Angelines mo e taane haana ki a au kaeke kua manako au ke fakaako e Tohi Tapu mo laua. Mailoga e laua pete ne talahau e au kua nakai manako au ke he tau mena fakalotu, ne manako lahi au ke iloa e Tohi Tapu. Fakamui ti tala age e au ki a laua: “Mitaki. Talia ni e au ke fakaako mo mua ka fakaaoga e au e Tohi Tapu haaku!” Fai Tohi Tapu Nácar-Colunga a au.

FAKALATAHA HE TOHI TAPU A MAUTOLU HE MOGO FAKAMUI

Felisa: He papatiso au he 1973, kavi ke he 70 e Fakamoli i Santander, ko e taone lahi ha Cantabria. Ne o atu mamao a mautolu ke fakamatala ke he tau tagata oti he tau maaga ne totou teau he magamotu. Ti ō a mautolu he pasi mo e fakamui he motokā, ke o atu ke he taha maaga mo e taha maaga.

He tau tau loga kua mole, ne fakaako e au e Tohi Tapu mo e tau tagata tokologa, ti 11 ia lautolu ne papatiso. Laulahi e tau tagata ne fakaako mo au ko e tau Katolika. Lata ia au ke fakauka ki a lautolu. Tuga ni au, ne lata ia lautolu ke fai magaaho to mailoga ko e tau mena ne talitonu a lautolu ki ai kua hepe. Iloa e au ko e Tohi Tapu ni mo e agaaga tapu ha Iehova ka lagomatai e tagata ke hiki e manamanatuaga haana ti maama e kupu mooli. (Heperu 4:12) Ko e taane haaku ko Bienvenido ko e leoleo he mogo fakamua ne papatiso he 1979, ne kamata e matua fifine haaku ke fakaako e Tohi Tapu, ato nakai leva ti mate a ia.

Araceli: He kamata au ke fakaako e Tohi Tapu mo e Tau Fakamoli a Iehova, ne logona hifo e au kua nakai maeke au ke fakatata atu ki a lautolu. Ka e fai magaaho he mole ti nakai pihia e logonaaga haaku. Nakai ni fakaako he Tau Fakamoli e Tohi Tapu ka e omaoma foki a lautolu ke he tau fakaakoaga ia. Kamata e tua haaku ki a Iehova mo e Tohi Tapu ke tupu, ti logona e au e fiafia lahi. Falu he tau katofia haaku ne mailoga e hikiaga nei ti pehē ki a au, “Araceli, eketaha he puhala ne kua fifili e koe!”

Manatu e au he liogi, “Fakaaue ma Iehova he nakai tiaki mai au mo e foaki ki a au e tau magaaho loga ke moua e mena ne fa e kumi au ki ai​—ko e iloilo mooli he Tohi Tapu.” Ole foki au ke he taokete haaku ko Felisa ke fakamagalo au he talahau e tau mena kelea ki a ia. Tali mai he mogoia, kua nakai taufetoko a maua ka e fiafia a maua ke tutala hagaao ke he Tohi Tapu. Ne papatiso au he 1989 he 61 e tau he moui.

Felisa: Kua 91 e tau haaku mogonei. Mate tuai e taane haaku, ti nakai lahi e mena haaku kua maeke ke taute ke tuga fakamua. Ka e totou agaia e au e Tohi Tapu he tau aho oti, mo e fano ke he tau feleveiaaga mo e gahua ke he fonua ka maeke au.

Araceli: Fiafia au ke tutala hagaao ki a Iehova ke he tau patele mo e tau taupou pope ka feleveia mo au, liga ha ko au taha he mogo fakamua. Loga e tau fakatutalaaga kehekehe haaku mo e falu ia lautolu, ti tokologa ne uta e tau tohi mo e tau mekasini. Manatu tumau e au e taha patele. He lagaloga e tutala mo ia, ne talia e ia e mena ne talahau e au. Ti pehē a ia ki a au: “Ka e fano au ki fe he atu haaku? Ko e heigoa ka talahau he tau tagata tapu mo e magafaoa haaku?” Ne tali atu au: “Ti ko e heigoa ka talahau he Atua?” Mailoga e ia kua hako au, mo e kitia e au kua momoko a ia. Ka e tuga nakai moua e ia e loto malolō ke hiki.

To nakai nimo e au he mogo ne pehē e taane haaku kua manako a ia ke fano mo au he tau feleveiaaga. Ne molea e 80 e tau haana he fina atu a ia ke he feleveiaaga fakamua haana, ti tali mai he mogoia ne nakai misi e ia ha feleveiaaga. Fakaako e ia e Tohi Tapu ti kamata ke fakamatala. Loga e tau manatu fiafia haaku ia maua he gahua tokoua ke he fonua. Ne mate a ia he ua e mahina ato hoko e aho ke papatiso a ia.

Felisa: Mogo ne kamata au ke fekafekau ki a Iehova, ne totoko e tau tehina tokotolu haaku ki a au. Ka e fakamui, kua talia foki e lautolu e kupu mooli. Ko e taha he tau mena anei ne mua kua tupu ki a au. Mole ia, maeke ia mautolu ke fai magaaho auloa he tutala hagaao ke he Atua fakaalofa ha tautolu ko Iehova mo e Kupu haana! Fakahiku ai, kua tapuaki oti a mautolu ki a Iehova.a