Tau Matua​—Lagomatai e Fanau ha Mutolu ke “Fakailoilo . . . ke Moua Ai e Moui”

1, 2. Ko e ha ne liga tupetupe falu matua ka manako e tau fanau ha lautolu ke tukulele a lautolu ki a Iehova ti papatiso?

KUA totou afe he tau tagata fakaako Tohi Tapu ne tukulele a lautolu ki a Iehova ti papatiso. Tokologa ko e tau fanau fuata ne feaki hake he kupu mooli ti kua fifili e puhala mitaki lahi mahaki he moui. (Salamo 1:1-3) Kaeke ko koe ko e matua Kerisiano, liga amanaki atu a koe ke he aho ka papatiso e tama haau.​—Fakatatai 3 Ioane 4.

² Ka e tupetupe agaia a koe. Liga kitia e koe e falu fanau ne papatiso ka e he mogo fakamui kamata ke fakauaua ko e momoui ke he tau tuaga he Atua ko e mena lata mooli nakai ma lautolu. Falu ne toka e kupu mooli. Liga tupetupe foki a koe neke kamata e tama haau ke fekafekau ki a Iehova ti galo e fakaalofa fakamua haana ma e kupu mooli. Liga eke e tama haau ke tuga e falu Kerisiano i Efeso he senetenari fakamua. Pehē a Iesu hagaao ki a lautolu: “Kua toka e koe hau a fakaalofa fakamua.” (Fakakiteaga 2:4) Lagomatai fēfē e koe e tama haau ke tumau e fakaalofa haana ke malolō mo e tupu ke moua e moui? (1 Peteru 2:2) Fakaako mai a tautolu he fakafifitakiaga ha Timoteo.

“KUA ILOA E KOE E TAU TOHI TAPU”

3. (a) Eke fēfē a Timoteo mo Kerisiano, ti ko e heigoa ne taute e ia ke he tau mena ne fakaako e ia? (e) Ko e heigoa e tau mena tolu he fakaakoaga ne fakakite e Paulo ki a Timoteo?

³ Ne fina atu fakamua e aposetolo ko Paulo ki Luseta he tau 47. Liga ko e fuata mui a Timoteo he mogoia ti iloa e ia e tau fakaakoaga ha Iesu. Ne fakagahua e ia e tau mena ne fakaako e ia, ti ua e tau he mole ne kamata e fenoga haana mo Paulo. Kavi ke he 16 e tau he mole ai, ne tohi e Paulo ki a Timoteo: “Kia tumau a koe ke he tau mena kua ako ai e koe, mo e iloa tonuhia e koe, ha kua iloa e koe a ia ne fakaako atu ai kia koe, Tali mai foki he vaha tote kua iloa e koe e tau Tohi Tapu [tau Tohiaga Tapu Heperu], kua maeke ke fakailoilo a koe ke moua ai e moui ke he tua ha ha ia Keriso Iesu.” (2 Timoteo 3:14, 15) Mailoga e mena ne talahau e Paulo hagaao ki a Timoteo (1) kua iloa e ia e tau Tohi Tapu, (2) iloa tonuhia e ia e tau mena ne fakaako e ia, mo e (3) fakailoilo ke moua ai e moui ke he tua ha ha ia Keriso Iesu.

4. Ko e heigoa kua fakaaoga e koe ke fakaako aki e tau fanau ikiiki haau? (Kikite fakatino he kamataaga.)

⁴ Ko e matua Kerisiano, kua manako a koe ke he tama haau ke iloa e Tohi Tapu, putoia ai mogonei e tau Tohiaga Tapu Heperu mo e tau Tohiaga Tapu Heleni Kerisiano. Maeke foki e tau fanau ikiiki ke fakaako hagaao ke he tau tagata mo e tau mena tutupu he Tohi Tapu. Foaki he fakatokatokaaga ha Iehova e loga he tau tohi, tau porosua, mo e tau vitiō ke fakaaoga he tau matua ke lagomatai aki e tau fanau ha lautolu. Ko e heigoa he tau mena nei kua moua he vagahau haau? Lata e tama haau ke iloa e tau mena i loto he Tohi Tapu ke maeke ke atihake e fakafetuiaga malolō mo Iehova.

“ILOA TONUHIA”

5. (a) Ko e heigoa e kakano he “iloa tonuhia”? (e) Iloa fēfē e tautolu kua iloa tonuhia e Timoteo e tala mitaki hagaao ki a Iesu?

⁵ Nakai koenaia ke fakaako e tau fanau hagaao ke he tau tagata mo e tau mena tutupu he Tohi Tapu. Manatu na fakaako foki a Timoteo ke “iloa tonuhia.” Iloa e Timoteo e tau Tohiaga Tapu Heperu mai he “vaha tote.” He lahi hake, ne talitonu a ia ko Iesu e Mesia. Kua malolō lahi e tua ha Timoteo ti papatiso a ia mo e gahua misionare mo Paulo.

6. Lagomatai fēfē e koe e fanau haau ke atihake e tua ke he Kupu he Atua?

⁶ Lagomatai fēfē e koe e fanau haau ke atihake e tua tuga a Timoteo, ke maeke foki a lautolu ke “iloa tonuhia”? Fakamua, kia fakauka. Kua lata ke lahi e magaaho ke atihake e tua malolō. Ha kua talitonu a koe ke he taha mena, ne nakai kakano to talitonu pihia foki e fanau haau. Igatia e tama mo e fakaaoga haana ni a ‘lata ke eke’ po ke loto manamanatu ke atihake e tua ke he Tohi Tapu. (Totou Roma 12:1.) Ko e matua, maeke ke lahi e mena haau ka taute ke lagomatai e fanau haau ke fakamalolō e tua ha lautolu, mua atu ka hūhū e lautolu e tau hūhū. Mailoga la e mena ka fakaako e tautolu mai he fakafifitakiaga he taha matua taane.

7, 8. (a) Fakakite fēfē he taha matua Kerisiano e fakauka he fakaako e ia haana tama fifine? (e) Magaaho fe ne kua lata a koe ke fakauka ke he tama haau?

⁷ Ko Thomas ne 11 e tau he tama fifine ne pehē kua fa hūhū age he tama fifine haana e tau hūhū tuga e: “Maeke kia a Iehova ke fakaaoga e tupumainoa ke fakatupu e moui he lalolagi?” po ke “Ko e ha ne nakai putoia a tautolu ke he tau mena he maaga, ma e fakatai he vili ke fakaholo ki mua e tau tuaga?” Falu mogo, ne totoko e ia e manako ke tala age ke he tama fifine haana e mena ke talitonu. Iloa e Thomas ke talitonu he tagata e mena mooli, ne nakai ko e taha e tala mooli lahi ka ko e tau vala ikiiki loga he fakamooliaga.

⁸ Iloa foki e Thomas kua lata a ia ke fakauka ke maeke ke fakaako e tama fifine haana. Lata he tau Kerisiano oti ke fakauka. (Kolose 3:12) Mailoga e Thomas to lata ke fai magaaho mo e loga e fakatutalaaga ke lagomatai e tama fifine ke atihake e mauokafua haana. Lata a ia ke fakamaama ke he tama fifine haana e tau mena ne fakaako mai he Tohi Tapu. Pehē a Thomas: “Mua atu ke he tau mena ne aoga lahi, manako e hoana haaku mo au ke iloa kua talitonu mooli he tama fifine ha maua e tau mena ne fakaako e ia mo e fai kakano ai ki a ia. Ko e mena mitaki lahi ka fai hūhū a ia. To tupetupe mooli au ka talia noa ni e ia ha mena ka e nakai hūhū.”

9. Lagomatai fēfē e koe e fanau haau ke talia e Kupu he Atua?

⁹ Ka fakaako e tau matua mo e mahani fakauka, to nakai leva ti kamata e fanau ha lautolu ke maama e “laulahi, mo e loa, mo e hokulo, mo e tokoluga” he tua. (Efeso 3:18) Fakaako he tau matua e tau fanau ke he puhala kua felauaki mo e tau tau he moui mo e maamaaga ha lautolu. He malolō lahi fakahaga e tua ha lautolu ke he mena ne fakaako, to mukamuka lahi ma lautolu ke lalago e tau taofiaga ha lautolu ke he falu, putoia e tau kapitiga aoga. (1 Peteru 3:15) Ma e fakatai, maeke nakai e fanau haau ke fakaaoga e Tohi Tapu ke fakamaama e mena ka tupu he mate? Iloa nakai e lautolu e fakamaamaaga he Tohi Tapu?a (Kikite matahui tala.) Manatu kua lata a koe ke fakauka ke lagomatai e tama haau ke atihake e tua ke he Kupu he Atua ka e to aoga lahi ai.​—Teutaronome 6:6, 7.

10. Ko e heigoa e vala aoga lahi he fakaakoaga haau?

¹⁰ Ko e fakafifitakiaga mooli ni haau kua aoga foki ke lagomatai e fanau haau ke feaki e tua. Ko Stephanie ko e matua fifine ne tolu e tama fifine ne pehē: “Tali mai he ikiiki lalahi e fanau haaku, ne hūhū hifo au, ‘Tutala nakai au ke he fanau haaku hagaao ke he kakano ne mauokafua au ko Iehova ko e Atua, haana fakaalofa, mo e tututonu haana tau puhala? Kitia maali nakai he fanau haaku kua fakaalofa mooli au ki a Iehova?’ Nakai amanaki au ke he fanau haaku ke iloa tonu ato iloa tonu fakamua e au.”

“FAKAILOILO A KOE KE MOUA AI E MOUI”

11, 12. Ko e heigoa e pulotu, ti iloa fēfē e tautolu kua nakai fakavē ke he motua he tino he tagata?

¹¹ Fakaako e tautolu na moua e Timoteo e (1) maamaaga he tau Tohiaga Tapu mo e (2) mauokafua ke he tau taofiaga haana. Ka ko e heigoa e kakano ha Paulo he pehē a ia ko e tau Tohi Tapu ati maeke a Timoteo ke “fakailoilo . . . ke moua ai e moui”?

¹² Ko e Insight on the Scriptures, Volume 2, ne fakamaama i loto he Tohi Tapu, ko e pulotu kua putoia e “iloaaga ke fakaaoga e iloilo mo e maamaaga he puhala lotomatala ke fakatotoka e tau lekua, kalo kehe po ke mailoga e tau hagahagakelea, moua e tau foliaga pauaki, po ke tomatoma e falu ke taute pihia. Mamao mai he goagoa.” Pehē e Tohi Tapu “kua lili ai e goagoa ke he loto he tama.” (Tau Fakatai 22:15) Ha kua mamao mai e pulotu he goagoa, ko e pulotu ko e taha fakamailoga he motua fakaagaaga. Kua motua fakaagaaga e tagata ha kua matakutaku a ia ki a Iehova ti manako ke omaoma ki a ia, nakai ha kua motua e tino haana.​—Totou Salamo 111:10.

13. Fakakite fēfē e lautolu ne ikiiki kua fakailoilo a lautolu ke moua e moui?

¹³ Ko lautolu ne ikiiki kua motua fakaagaaga ne nakai “hikihikifano, mo e havilia” e tau manako ha lautolu po ke pikitia he falu fuata ikiiki. (Efeso 4:14) Ka ko e ha lautolu a “mahani he ako mua ai” mo e kua “mailoga e tau mena mitaki mo e tau mena kelea.” (Heperu 5:14) Ti taute e lautolu e tau fifiliaga pulotu pete he nakai kitia he tau matua po ke falu tagata lalahi. (Filipi 2:12) Kua latatonu e pulotu ia ma e fakamouiaga. (Totou Tau Fakatai 24:14.) Lagomatai fēfē e koe e fanau haau ke feaki e pulotu ia? Lata a koe ke mailoga kua iloa e lautolu e tau tuaga kua mua ki a koe. Ke he tau mena ne talahau mo e taute e koe, lata a lautolu ke kitia kua lali a koe ke moui fakatatau ke he tau puhala he Tohi Tapu.​—Roma 2:21-23.

14, 15. (a) Ko e heigoa kua lata he fuata kua manako ke papatiso ke manamanatu ki ai? (e) Lagomatai fēfē e koe e fanau haau ke manamanatu fakahokulo ke he tau monuina ne moua mai he omaoma ke he tau matafakatufono he Atua?

¹⁴ Ka e ke lagomatai e fanau haau ke atihake e tua, kua nakai koenaia ke tala age ki a lautolu e mena hako mo e hepe. Lata foki a koe ke lagomatai a lautolu ke fakamaama e tau hūhū tuga e: ‘Ko e ha ne nakai talia he Tohi Tapu e tau mena ne liga kua futiaki ke he tau mata? Iloa tonu fēfē e au ko e tau tuaga he Tohi Tapu kua mitaki tumau ma haaku?’​—Isaia 48:17, 18.

¹⁵ Ka manako e tama haau ke papatiso, lagomatai foki a ia ke manamanatu fakahokulo hagaao ke he tau matagahua ne putoia ke he papatisoaga. Fēfē e logonaaga haana ki ai? Ko e heigoa e tau aoga? Ko e heigoa e tau mena uka? Ko e ha e tau mena aoga ne mua atu ai ke he tau mena uka? (Mareko 10:29, 30) Kua aoga lahi ke manamanatu fakamitaki ke he tau mena nei to papatiso. Lagomatai e tama haau ke manamanatu fakahokulo ke he tau monuina he omaoma mo e tau fua kelea he nakai omaoma. To liga talitonu a ia ko e muitua ke he tau puhala he Tohi Tapu to mitaki tumau ma haana.​—Teutaronome 30:19, 20.

KA TAUFETULUI E FUATA KUA PAPATISO MO E TUA HAANA

16. Ko e heigoa kua lata he tau matua ke taute ka kamata e tama ha laua ne kua papatiso ke lolelole e tua?

¹⁶ Ko e heigoa haau ka taute ka kamata e tama haau ke fakauaua hagaao ke he kupu mooli he mole e papatiso? Ma e fakatai, liga fiafia e tama haau ke he tau mena he lalolagi. Po ke kamata e tama haau ke fakauaua ko e muitua ke he tau matapatu fakaakoaga he Tohi Tapu ko e puhala moui mitaki mooli. (Salamo 73:1-3, 12, 13) Ko e puhala ne tali e koe ka lauia e matutaki haana ke fekafekau ki a Iehova. Eketaha ke nakai tau mo e tama haau hagaao ke he mena nei, pete he tote agaia a ia po ke kua fuata mui a ia mogonei. Ka e eketaha ke iloa e ia kua fakaalofa a koe ki a ia mo e manako ke lagomatai a ia.

17, 18. Ka fakauaua e fuata tote, lagomatai fēfē he tau matua haana a ia?

¹⁷ Ko e fuata tote ne papatiso kua tukulele ki a Iehova. Ko e maveheaga anei ke fakaalofa mo e fekafekau ki a Iehova kua mua ke he tau mena oti kana. (Totou Mareko 12:30.) Onoono a Iehova ke he tukuleleaga ko e maveheaga hokulo lahi ti kua lata ia tautolu ke pihia foki. (Fakamatalaaga 5:4, 5) Fakamanatu ke he tama haau e mena nei. Ka e fakamua, totou mo e fakaako e tau tohi he fakatokatokaaga ha Iehova ne kua foaki ma e tau matua. He puhala totonu mo e ke he magaaho hako, peehi ke he tama haau ko e fifiliaga haana ke tukulele ki a Iehova mo e ke papatiso ko e mena hokulo lahi ka e to tamai ki a ia e tau monuina loga.

¹⁸ Ma e fakatai, moua e koe e fakatonuaga mitaki i tua he tohi Questions Young People Ask​—Answers That Work, Volume 1 he apenetiki “Questions Parents Ask.” Fakatonu ai ke he tau matua kua nakai lata a lautolu ke manamanatu mafiti kua tiaki he fuata mui ha lautolu e kupu mooli ka e lata a lautolu ke kumikumi e lekua mooli. Neke liga ko e peehiaga he atutaha po ke matimati. Po ke logona hifo he tama kua lahi atu e mena ne taute he falu fanau ke fekafekau ki a Iehova ka e nakai pihia a ia. Fakamaama foki he apenetiki ko e tau matalekua nei ne nakai kakano mooli kua nakai talia he tama haau e tau taofiaga haau. Fa mahani ke pihia ha ko e falu mena uka ne fehagai a ia ki ai. Ti foaki he apenetiki e tau manatu ke he puhala ka lagomatai he matua e tama ne fakauaua hagaao ke he kupu mooli.

19. Maeke fēfē he tau matua ke lagomatai e tau fanau ha lautolu ke “fakailoilo . . . ke moua ai e moui”?

¹⁹ Ko e matua, ha ha ia koe e matagahua mo e kotofaaga aoga ke feaki e fanau haau ke he “tau kupu akonaki mo e tau kupu fakamafana [ha Iehova].” (Efeso 6:4) He fakaako e tautolu, kakano e mena nei kua lata a koe ke fakaako e fanau haau ke he mena ne talahau he Tohi Tapu mo e lagomatai a lautolu ke mauokafua ke he tau mena ne fakaako e lautolu. Ka malolō e tua ha lautolu, to fakalagalaga a lautolu ke tukulele e tau momoui ki a Iehova mo e foaki katoatoa ki a Ia. Kia lagomatai he Kupu ha Iehova, haana agaaga, mo e tau laliaga haau e fanau haau ke “fakailoilo . . . ke moua ai e moui.”