Mavehe Kia he Atua e Maukoloa ki a Koe?

‘Manako e Atua ke maukoloa a koe—tau motokā he fale motokā, kautū e pisinisi. Talitonu ki a ia he hafagi e pesi haau, ti age ki a ia e tau tupe kua maeke ia koe.’

PIHIA e ogo ne fakaohooho he falu matakau lotu i Parasili, he talahau he nusipepa ne lolomi i ai. Ko e ogo ne uta fakahokulo he tokologa. Hagaao ke he kumikumiaga ne taute he Tau Faahi Kaufakalataha hagaao ke he tau tagata ne totoku ko e Kerisiano, ne talahau he mekasini Time: “Ne 61 e pasene ne talitonu kua manako e Atua ke mautū e tau tagata. Mo e 31 e pasene . . . ne talia kaeke ke age e koe e tau tupe haau ke he Atua, to fakamonuina he Atua a koe he foaki fakaloga atu e tau tupe.”

Ko e tau taofiaga pehēnei, ne fa fakahigoa ko e mautū fakalotu, ne tupu lahi mahaki he tau motu i Latini-Amerika, tuga a Parasili, ti tafe atu e tau tagata ke he tau lotu ne mavehe ko e tau monuina ke he tau koloa mai he Atua. Ka e mavehe mooli kia he Atua e maukoloa ki a lautolu kua fekafekau ki a ia? Muhukoloa oti kia e tau fekafekau he Atua he vahā fakamua?

Kua mooli i loto he Tau Tohiaga Tapu Heperu, ne fa moua e tautolu e monuina he Atua kua matutaki mo e mautū ke he tau koloa. Ma e fakatai, ia Teutaronome 8:18, totou e tautolu: “Manamanatu a koe kia Iehova hau a Atua, ha ko ia ni ne ta atu e malolo kia koe ke moua ai e koloa.” Ne fakamafana e mena nei ke he tau Isaraela ka omaoma a lautolu ke he Atua, to eke e ia a lautolu mo motu mautū.

Ka e kua e tau tagata takitaha? Ko e tagata fakamooli ko Iopu ne loga lahi mahaki e tau koloa, ti mole e fakamativa e Satani a ia, ne liuaki age e Iehova e muhukoloa ha Iopu “kua takiua.” (Iopu 1:3; 42:10) Ne maukoloa foki a Aperahamo. Pehē e Kenese 13:2 kua ‘maukoloa lahi a ia ke he tau manu, mo e tau ario, mo e tau auro.’ Magaaho ne kauauloa e tau patuiki tokofā he Faahi Uta mo e tapaki e nefiu ha Aperahamo ko Lota, ne “[fakamalolō] ai e ia hana tau tagata fakaako, ko lautolu ne fanau ke he hana kaina.” (Kenese 14:14) He 318 e “tau tagata fakaako” ne maeke ke fakaaoga e tau kanavaakau tau, kua liga tokologa lahi mahaki e magafaoa ha Aperahamo. Ha kua maeke a ia ke leveki e magafaoa lahi pihia kua fakakite mai ko ia ko e tagata ne mua atu e muhukoloa, mo e loga foki e fuifui mamoe mo e fuifui manu.

E, tokologa e fekafekau fakamooli he Atua he vahā fakamua—ko Aperahamo, Isaako, Iakopo, Tavita, Solomona, ko e falu ni a ia—ne maukoloa. Ti kua kakano kia e mena nei to fakamaukoloa he Atua e tau tagata oti ka fekafekau ki a ia? He taha faahi, mooli kia ka mativa e taha tagata kua nakai fakamonuina he Atua a ia? To fakatutala e vala tala ka mui mai ke he tau hūhū nei.

Maukoloa ne Moua Mai he Atua

KAEKE ke fakamooli a koe ke he Atua, to fakamonuina nakai e ia a koe aki e maukoloa? Liga, ka e nakai ko e maukoloa ne amanaki a koe ki ai. Manamanatu ki a Maria, ko e matua fifine ha Iesu. Ne fina atu e agelu ko Kaperielu ki a ia ti pehē “kua ofania” he Atua a Maria mo e to fanau e ia e Tama he Atua. (Luka 1:28, 30-32) Ka e nakai muhukoloa a ia. He mole e fanau ia Iesu, ne foaki e Maria e poa he “[ua e] na kulukulu, po ke ua e punua lupe,” ko e poa fa mahani ne taute he tau tagata nonofogati ki a Iehova.—Luka 2:24; Levitika 12:8.

Ha kua mativa a Maria, kakano kia kua nakai fakamonuina he Atua a ia? Nakai pihia, he fina atu a ia ke ahiahi a Elisapeta, ko e magafaoa haana, “kua fakapuke foki he [a]gaga [t]apu a Elisapeta; kua ui a ia, kua leo lahi, kua pehe age Uhoaki a koe [Maria] ke he tau fifine, uhoaki foki e tama ka fanau mai e koe!” (Luka 1:41, 42) Ne moua e Maria e lilifu ke eke mo matua fifine fakatino he Tama fakahele he Atua.

Ne nakai ko e tagata maukoloa foki a Iesu. Nakai ni fanau a ia mo e feaki hake he takatakaiaga mativa ka kua nofogati a ia he moui katoa haana he lalolagi. Ne lagataha e tala age a ia ke he tagata ne manako ke eke mo tutaki: “Na fai ofaga e tau alope, ti fai mena foki ke momohe ai e tau manu lele; ka ko e Tama he tagata nakai fai mena a ia ke mohe ai.” (Luka 9:57, 58) Ka ko e mena ne taute e Iesu Keriso he hifo mai ke he lalolagi nukua maeke ai he tau tutaki haana ke moua e tau monuina mua ue atu. Ne tohi he aposetolo ko Paulo: “Kua fakanofogati a ia ha ko mutolu, kia fakamuhu mena a mutolu ke he hana nofogati.” (2 Korinito 8:9) Fakamuhu mena fēfē e Iesu e tau tutaki haana? Ka e kua mogoia a tautolu he vahā nei?

Ko e Tau Vahega Maukoloa Fēfē?

Kua fa fakatauhele he muhukoloa e tua, ha kua falanaki e tagata maukoloa ke he tau tupe haana ka e nakai ke he Atua. Ne pehē a Iesu: “Ko e mena uka ke hu atu e tau tagata muhu koloa ke he kautu he Atua.” (Mareko 10:23) Maaliali ai mogoia, ko e maukoloa ne foaki e Iesu ke he tau tutaki haana ne nakai ko e tau koloa he tino.

Ko e mooli, na mativa foki e laulahi he tau Kerisiano he senetenari fakamua. Magaaho ne kaiole tupe e tagata ne kulikuli tali mai he fanau, ne tali a Peteru: “Nakai fai ario au, po ke fai auro; ka ko e mena ha ia au, kua ta atu e au kia koe; ko e higoa a Iesu Keriso ko e Nasareta, ati matike a a koe, ti fano.”—Gahua 3:6.

Ne fakakite foki he tau kupu he tutaki ko Iakopo ko e fakapotopotoaga Kerisiano kua ha ha i ai e tau tagata nonofogati. Ne tohi e ia: “Haku a tau matakainaga fakahelehele na e, fanogonogo mai ā; kua nakai kia fifili he Atua a lautolu kua nonofogati ke he lalolagi nai, ko e tau maukoloa ke he tua, ko lautolu ke eke ma lautolu e kautu kua talahaua mai e ia kia lautolu kua fakaalofa kia ia?” (Iakopo 2:5) Lafi ki ai, ne pehē foki e aposetolo ko Paulo ne nakai tokologa e “tau tagata pulotu ke he tau mena he tino” po ke “tau tagata malolo” po ke “tau iki” ne uiina ke eke mo vala he fakapotopotoaga Kerisiano.—1 Korinito 1:26.

Kaeke ko e maukoloa ne age e Iesu ke he tau tutaki haana kua nakai ko e tau koloa he tino, ti ko e heigoa e maukoloa ne age e ia ki a lautolu? He tohi ne fakafano e Iesu ke he fakapotopotoaga i Semurana, ne pehē a ia: “Kua iloa e au hau a tau gahua, mo e hau a matematekelea, mo e hau a nofogati, (ka kua maukoloa ni a koe.” (Fakakiteaga 2:8, 9) Pete he nonofogati e tau Kerisiano i Semurana, ne moua e lautolu e tau koloa ne mua atu e uho ke he ario po ke auro. Ne maukoloa a lautolu ha ko e tua mo e mahani fakamooli ke he Atua. Mua atu e uho he tua ha ko e “mena nakai ha he tau tagata oti kana.” (2 Tesalonia 3:2) Ko lautolu ne nakai moua e tua kua nonofogati mooli ke he fofoga he Atua.—Fakakiteaga 3:17, 18.

Maukoloa ne Fua Mai he Tua

Ko e heigoa mogoia e tau puhala kua mua atu e uho he tua? Ko lautolu ne tua ke he Atua ne aoga mai he “lahi ue atu he hana mahani totonu, mo e hana fakamanavalahi, mo e hana fakauka.” (Roma 2:4) Kua olioli foki e lautolu e “fakamagaloaga he tau hala [ha lautolu]” ha kua tua a lautolu ke he poa lukutoto ha Iesu. (Efeso 1:7) Lafi ki ai, ne moua e lautolu e pulotu ne tamai he “kupu a Keriso” ki a lautolu ne ha ha ai e tua. (Kolose 3:16) He liogi a lautolu ke he Atua mo e tua, “ko e [mafola] foki mai he Atua kua mua ue atu ke he tau mena oti kua manamanatu ki ai” ne leveki ha lautolu a tau loto mo e manamanatuaga, he tamai ki a lautolu e mahani fakalatalata mo e fiafia.—Filipi 4:7.

Ke lafi ke he tau mena aoga oti nei, ko lautolu kua tua ke he Atua ha ko e Tama haana, ko Iesu Keriso, kua moua e lautolu e amaamanakiaga homo ue atu he moui tukulagi. Talahaua ai e tau kupu ha Iesu Keriso: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne [fakagahuahua e] tua kia ia, ka kia moua e ia e moui tukulagi.” (Ioane 3:16) Kua fakamalolō e amaamanakiaga uho ia ka moua he tagata e iloilo tonu he Matua mo e Tama, ha kua pehē foki a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.

Ha ko e tau monuina he Atua ko e tau mena fakaagaaga ia, kua ha ha i ai foki e tau monuina ke he manamanatuaga mo e ke he tino. Tuga e fakatai, ko Dalídio i Parasili. Ato iloa e iloilo tonu he finagalo he Atua, ne fakaaoga hehē e ia e kava. Ne moumou lahi he mena nei e tau fakafetuiaga he magafaoa haana. Lafi ki ai, ne nakai tutū mitaki e tuaga fakatupe haana. Ti kamata a ia ke fakaako e Tohi Tapu mo e Tau Fakamoli a Iehova mo e moua e hikiaga lahi mahaki.

Ne takitaki he iloilo ne moua foou e Dalídio a ia ke tiaki e tau aga hagahaga kelea haana. Ne lahi mahaki e tupu fakaagaaga haana ti pehē a ia, “ne fa mahani au ke fano he taha fale kava ke he taha fale kava; ka kua fano au mogonei he taha fale ke he taha fale.” Kua eke tuai a ia mo fekafekau gahua mau he Kupu he Atua. Nakai ni fakaholo ki mua he mena ia e malolō tino haana ka e pihia foki mo e tuaga fakatupe haana. Ne pehē a Dalídio, “Ko e tupe ne fa fakatau aki e au e tau kava, kua fakaaoga e au mogonei ke lata mo e falu ne manako lagomatai po ke fakatau aki e tau mena kua lata ni mo au.” Ne loga foki e kapitiga mooli haana ha ko e lafi mo e tau tagata ne pihia foki e onoonoaga fakaagaaga. Kua logona e Dalídio mogonei e mafola he loto mo e mahani fakalatalata ne mua atu ke he mena ne liga manamanatu a ia ato iloa e Atua.

Ko e taha fakatai ke he tau mena ne tutupu he moui nukua hohoko ki a lautolu ne feaki e tua ki a Iehova ko e Atua, ko Renato. Ka kitia e koe e mata fiafia mo e mamali haana mogonei, kua uka lahi ke talitonu na ekefakakelea lahi mahaki e moui haana. He fanau mai laia, ne tiaki he matua fifine haana a ia. Ne toka a ia i loto he kato i lalo he laulau, kua mahakuhaku mo e unoko ti nakaila hehele e pito haana. Ua e fifine ne o hui ai mo e kitia e kato hane lutulutu i lalo he laulau. Ne manatu a laua he magaaho fakamua kua fai tagata ne toka e punua pusi i loto ia. Ka e he kitia e laua ko e tama mukemuke fanau foou, ne uta fakamafiti e laua a ia ke he fale gagao ne tata mai ma e lagomataiaga fakaekekafo.

Taha he tau fifine nei ko e Fakamoli a Iehova, ti tala age e ia ki a Rita, ko e taha Fakamoli hagaao ke he tama mukemuke. Kua lagaloga e matematekelea a Rita he mamate e tau tama to fanau mai, ti taha ni e tama fifine haana. Ne manako lahi a ia ke he tama taane, ti fifili a ia ke hiki a Renato.

Ne tala age tuai e Rita ki a Renato he vahā tote, mena nakai ko ia e matua fifine fanau haana. Ka e leveki e ia a Renato ke he puhala fakaalofa mo e hofihofi ti eketaha a ia ke tō ke he loto a Renato e tau fakaakoaga fakaagaaga. He lahi hake a ia, ne kamata a ia ke fiafia ke he Tohi Tapu. Ne tupu lahi mahaki foki e loto fakaaue haana ke he puhala ofoofogia ne fakahao ai a ia. Puke agaia e tau mata haana he tau hihina mata he tau magaaho oti ka totou a ia ke he tau kupu he salamo ko Tavita: “Ha kua tiaki au he haku a matua tane mo e haku a matua fifine, ti talia ai e Iehova au.”—Salamo 27:10.

He fakakite e loto fakaaue haana ma e tau mena oti kua taute e Iehova ma haana, ne papatiso a Renato he 2002 ti eke mo Kerisiano gahua mau he tau hake. Ne nakaila iloa e ia e matua taane mo e matua fifine fanau haana mo e to liga nakai iloa ai. Pete ia, ne logona hifo e Renato ko e taha he tau mena fakaalofa uho ne moua e ia ko e iloa mo e tua ki a Iehova ko e Matua fakaalofa mo e leveki haana.

Liga kua loto lahi a koe ke moua e fakafetuiaga tata mo e ofania fakalataha mo e Atua, ka fakamuhukoloa mooli e moui haau. Ko e magaaho ke moua e fakafetuiaga pihia mo Iehova ko e Atua mo e haana Tama, ko Iesu Keriso, kua hafagi ke he tau tagata oti kana—maukoloa mo e nonofogati. Liga nakai tamai he mena ia e muhukoloa, ka to fua mai e mafola he loto mo e mahani fakalatalata ne nakai maeke he tau tupe oti he lalolagi ke fakatau aki. Kua mooli ni e tau kupu he Tau Fakatai 10:22: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”

Kua fiafia lahi a Iehova ke he tau tagata ne omai ki a ia: “Ane hagao mai a koe ke he haku tau poaki, po kua tuga ne vailele hāu a [mafola]; mo e tuga ne tau peau he tahi hau a tututonu.” (Isaia 48:18) Ti mavehe e ia ko lautolu ka omai ki a ia mo e loto mo e aga hako to maukoloa lahi mahaki: “Ko e taui he mahani fakatokolalo mo e matakutaku kia Iehova, hanai, ko e koloa, mo e lilifu mo e moui.”—Tau Fakatai 22:4.

[Blurb he lau 6]

Ko e tua ke he Atua ne fua mai e mafola, mahani fakalatalata, mo e fiafia

[Fakatino he lau 5]

Pete he nonofogati, ne fakamonuina lahi he Atua e magafaoa tino ha Iesu