poakiaga he Atua, lauia ai e tau poakiaga foou oti ka liga fakakite e Iehova he magahala he afe tau. To fakafili e tau tagata takitaha he fakavē ke he tau mena kua taute e lautolu he magahala he Aho Fakafili.

To foaki he Aho Fakafili ke he tau piliona tagata e magaaho fakamua ke ako hagaao ke he finagalo he Atua mo e ke omaoma ai. Kakano he mena nei, to taute ai e gahua fakaako ne mua ue atu. Mooli ai, ‘to ako ai e lautolu e mahani tututonu kua nonofo ke he atu motu.’ (Isaia 26:9) Pete ni ia, to nakai makai oti ke fakatatau ke he finagalo he Atua. Ne pehē e Isaia 26:10: “Kia ofania a ia ne mahani kelea, ka e nakai ni ako e ia e mahani tututonu; to mahani hepehepe a ia ke he motu tututonu, nakai kitia foki e ia e lilifu a Iehova.” Ko e tau tagata mahani kelea nei to tamate tukulagi a lautolu he magahala he Aho Fakafili.​—Isaia 65:20.

He matahiku he Aho Fakafili, ko e tau tagata ne hao “to liu foki momoui” moolioli ko e tau tagata mitaki katoatoa. (Fakakiteaga 20:5) Ko e Aho Fakafili to kitia ai e liuaki maiaga he tau tagata ke he tuaga mitaki katoatoa he kamataaga. (1 Korinito 15:24-28) Oti ai ti fakahoko e kamatamata fakahiku. To fakatoka mai a Satani he fakahala mo e fakaatā ke lali ke fakahehē e tau tagata ke he magaaho fakahiku. (Fakakiteaga 20:3, 7-10) Ko lautolu ne totoko a ia ka olioli e fakamooliaga katoatoa he maveheaga he Tohi Tapu: “To eke ni e motu ma e tau tagata tututonu, to nonofo muatua ai a lautolu.” (Salamo 37:29) E, ko e Aho Fakafili to eke mo monuina ke he tau tagata tua fakamooli oti kana!

HE TAU hogofulu tau ki mui, ne fakapuloa he tau tagata fakaako Tohi Tapu to fai mena aoga lahi ka tutupu he 1914. Ko e heigoa e tau mena nei, mo e ko e heigoa e fakamooliaga ne tuhi ke he 1914 kua aoga lahi e tau ia?

He fakamau ia Luka 21:24, ne pehē a Iesu: “To taholi foki a Ierusalema he tau motu kehe, ato fakakatoa ai e tau vaha he tau motu kehe.” Ko Ierusalema ko e maaga lahi he motu a Iuta​—ko e tuaga pule he ohi he tau patuiki mai he fale he Patuiki ko Tavita. (Salamo 48:1, 2) Ka ko e tau patuiki nei kua kehe mai he tau takitaki he tau motu. Ne nonofo a lautolu he “nofoaiki a Iehova” mo tau hukui he Atua. (1 Nofoaga he Tau Patuiki 29:23) Ti ko Ierusalema ko e fakatai he pule a Iehova.

Puhala fe mo e i fe, mogoia, ne kamata e pule he Atua ke ‘taholi he tau motu’? Kua tupu e mena nei he 607 F.V.N. he magaaho ne tapaki he tau Papelonia a Ierusalema. Ati tokanoa ai e “nofoaiki a Iehova,” mo e fakatauhele e ohi he tau patuiki ne tupu mai ia Tavita. (2 Tau Patuiki 25:1-26) To tumau tukulagi nakai e ‘taholiaga’ nei? Nakai, ha kua pehē e perofetaaga ha Esekielu hagaao ke he patuiki fakamui ha Ierusalema, ko Setekaia: “Kia uta kehe a e potiki ie, ti aki a e foufou. . . . Nakai tuai ha i ai a ia, ato haele mai a ia, ha ha i ai e tututonu, ti ta atu ai e au kia ia.” (Esekielu 21:26, 27) Ko ia ne ha ha ai e “tututonu” po ke tonuhia ke he foufou faka-Tavita ko Keriso Iesu. (Luka 1:32, 33) To fakaoti e ‘taholiaga’ he magaaho ka eke a Iesu mo Patuiki.

A fe ka tupu ai e magaaho aoga lahi ia? Ne fakakite e Iesu to pule e tau tagata Motu Kehe he magaaho kua fakatoka. Ko e fakamauaga ia Tanielu veveheaga 4 kua toka ai e kei ke iloa e leva he magahala ia. Kua tala mai e miti fakaperofeta he Patuiki ko Nepukanesa ha Papelonia. Ne kitia e ia e akau makimaki ne hio ki lalo. Ti nakai tupu e gutugutu akau ha kua pipi aki e lapatoa mo e apa kula. Ne fakapuloa he agelu: “Ato mole atu fitu e tau hana.”​—Tanielu 4:10-16.

I loto he Tohi Tapu, kua fakaaoga e tau akau he falu magaaho ke fakatai aki e pule. (Esekielu 17:22-24; 31:2-5) Ti he hio ki lalo e akau fakatai kua fakakite e puhala ne tauhele aki e pule he Atua, tuga ne fakakite mai he tau patuiki i Ierusalema. Ka kua mailoga he fakakiteaga ko e ‘taholiaga nei ha Ierusalema’ kua nakai leva​—ko e magahala he “fitu e tau.” Fiha e loa he tau tau ia?

Ne fakakite he Fakakiteaga 12:6, 14 ko e tolu mo e hafa e tau kua tatai “ke he tau aho ne taha e afe ti ua e teau mo e onogofulu.” Ti ko e “fitu e tau” kua fakalahi ua e loa, po ke 2,520 e aho. Ka ko e tau Motu Kehe kua nakai mataofi mai he “taholi” e pule he Atua ko e 2,520 e aho he mole e moumouaga a Ierusalema. Kitia maali ai mogoia, kua leva lahi e loa he magahala he perofetaaga nei. Fakavē ki a Numera 14:34 mo e Esekielu 4:6, ne tohi i ai “ko e aho taha ko e tau taha ia,” ko e “fitu e tau” to katoa ai e 2,520 e tau.

Ne kamata e 2,520 tau ia Oketopa 607 F.V.N., magaaho ne tō a Ierusalema ke he tau Papelonia ti utakehe ai e patuiki faka-Tavita mai he nofoaiki haana. Ne fakahiku e magahala ia Oketopa 1914. He magaaho ia, ne fakaoti e “tau vaha he tau motu kehe,” mo e eke a Iesu Keriso mo Patuiki he Atua he lagi.a​—Salamo 2:1-6; Tanielu 7:13, 14.

Ti tuga ni he talahau tuai e Iesu, ko e haana a “ha ha hinei” (NW) ko e Patuiki he lagi kua fakamailoga he tau mena tutupu ofoofogia ne mua he lalolagi​—ko e felakutaki, hoge, tau mafuike, mo e tau tatalu. (Mataio 24:3-8; Luka 21:11) Ko e tau mena tutupu ia kua fakakite mai e fakamooliaga malolō lahi ko e 1914 mooli ne fakamailoga e fanauaga he Kautu he Atua he lagi mo e ko e kamataaga he “tau aho fakamui” he fakatokaaga kelea nei.​—2 Timoteo 3:1-5.

KO E mena moui fakaagaaga ne ui ko Mekaeli kua nakai totoku tumau i loto he Tohi Tapu. Ka e ka hagaao ki a ia, kua fai mena tumau a ia ne taute. I loto he tohi a Tanielu, ne tau a Mekaeli mo e tau agelu kelea; he tohi a Iuta, ne taufetoko a ia mo Satani; mo e he Fakakiteaga, ne tau a ia mo e Tiapolo mo e tau temoni haana. He lalago e pule a Iehova mo e tau atu ke he tau fī he Atua, ne fakamooli e Mekaeli e kakano he higoa haana​—“Ko Hai ne Tatai mo e Atua?” Ka ko hai a Mekaeli?

Falu magaaho, kua nakai taha ni e higoa ne iloa ai e tagata. Ke fakatai, ko e matua tupuna ko Iakopo kua ui foki ko Isaraela, mo e aposetolo ko Peteru kua ui ko Simona. (Kenese 49:1, 2; Mataio 10:2) Tatai foki, ne fakakite he Tohi Tapu ko Mekaeli ko e taha higoa ma Iesu Keriso, fakamua mo e he mole e moui haana he lalolagi. Kia fakatutala a tautolu ke he tau kakano faka-Tohiaga Tapu ati hokotia atu a tautolu ke he fakahikuaga ia.

Agelu ne Mua. Ne hagaao e Kupu he Atua ki a Mekaeli “ko e agelu ne mua.” (Iuta 9) Kakano he alaga kupu nei ko e “agelu takitaki.” Mailoga ai kua ui a Mekaeli ko e agelu ne mua. Talahau ai he mena nei kua taha ni e agelu pihia. Ti, ko e alaga kupu “agelu ne mua” kua fakaaoga he Tohi Tapu ke he tagata tokotaha, nakai tokologa. Mua atu foki, kua matutaki a Iesu ke he tuaga he agelu ne mua. Hagaao ke he Iki ko Iesu Keriso ne fakaliu tu mai, ne talahau he 1 Tesalonia 4:16: “Ko e mena