‘Kua Fakakite Atu Ai e Koe ke he Tau Tama Mukemuke’

Manako nakai a koe ke iloa e tala mooli hagaao ke he Atua​​—ko hai a ia, ko e heigoa e tuaga haana, mo e ko e heigoa e finagalo haana? He haana Kupu, ko e Tohi Tapu, ko Iehova ko e Atua kua fakakite e tala mooli katoa hagaao ki a ia ni. Ka e nakai ko e ha tagata noa ni kua maeke ke totou e Tohi Tapu ti maama katoatoa e tala mooli ia. Ko e ha? Kakano ko e moua e tala mooli fakaagaaga ia ko e mena lilifu; nakai moua he tau tagata oti. To fakatutala a tautolu ke he mena ne talahau e Iesu hagaao ke he mena nei.​​—Totou Mataio 11:25.

Ko e kupu tohi ia ne kamata aki e tau kupu: “Ko e magaaho ia ni kua tala age ai a Iesu.” Ti ko e mena ne amanaki a Iesu ke talahau kua liga ko e tali ke he mena ne tupu laia. Ko e mole laia e akonaki e ia e tau tagata nakai omaoma he tolu e maaga Kalilaia ne taute ai e ia e tau mana malolō. (Mataio 11:20-24) Liga manamanatu a koe, ‘Maeke fēfē ha tagata ke kitia e tau mana ha Iesu mo e nakai talia e tau tala mooli ne fakaako e ia?’ Ne nakai omaoma e tau tagata ha ko e aga kafilo he tau loto ha lautolu.​​—Mataio 13:10-15.

Ne iloa e Iesu, ke maama e tau tala mooli fakaagaaga he Tohi Tapu, kua lata ke ua e mena ka moua e tautolu: Ko e lagomataiaga he Atua mo e hako e aga he loto. Ne fakamaama e Iesu: “Hoku Matua na e, kua fakaaue au kia koe, ko e Iki he lagi mo e lalolagi, he ufiufi e koe e tau mena nai he tau tagata iloilo mo e loto matala, ka kua fakakite atu ai ke he tau tama mukemuke.” Kitia nakai e koe e kakano he maama e kupu mooli fakaagaaga he Tohi Tapu kua liga manamanatu ki ai ko e mena lilifu? Ko Iehova, ko e “Iki he lagi mo e lalolagi,” ne liga ufiufi po ke fakakite atu e tala mooli hagaao ke he finagalo he pule haana. Ka ko e Atua ne nakai fakahanoa ke he matakupu nei he fakakiteaga. He fakaveaga fe kua fakakite e ia e kupu mooli he Tohi Tapu ke he falu mo e nakai ke he falu?

Ne fiafia a Iehova ke he tau tagata mahani fakatokolalo, nakai fakatokoluga. (Iakopo 4:6) Ne ufiufi e ia e tau tala mooli mai he “tau tagata iloilo mo e loto matala”​​—ko lautolu ne pulotu he lalolagi mo e fakaako tokoluga ne fakaikaluga mo e falanaki ki a ia ni kua logona hifo e nakai lata ke moua e lagomatai he Atua. (1 Korinito 1:19-21) Ka e fakakite atu e ia e kupu mooli ke he “tau tama mukemuke”​​—ko lautolu kua o mai ki a ia mo e tau loto fakamooli, he fakakite e aga fakatokolalo tuga he tama tote. (Mataio 18:1-4; 1 Korinito 1:26-28) Ko e Tama he Atua ko Iesu ne kitia ai e tau tali pihia. Tokologa e tau takitaki lotu ne fakaikaluga mo e tokoluga e tau fakaakoaga ne nakai moua e maamaaga he fekau ha Iesu, ka ko e tau tagata takafaga ika loto fakatokolalo ne moua ai. (Mataio 4:18-22; 23:1-5; Gahua 4:13) He magaaho taha ia, ko e falu kua maukoloa mo e fakaako tokoluga ne fakakite e fakatokolalo mooli ne eke mo tau tutaki ha Iesu.​​—Luka 19:1, 2, 8; Gahua 22:1-3.

Liliu mai a tautolu ke he hūhū ne talahau he kamataaga: Manako nakai a koe ke iloa e tala mooli hagaao ke he Atua? Ka manako, to liga mafanatia a koe ke iloa kua nakai fiafia e Atua ki a lautolu ne onoono ki a lautolu ni kua pulotu fakalalolagi. Ka kua fiafia a ia ki a lautolu kua onoono hifo e tau tagata pulotu fakalalolagi ki ai. Ka fakaako e koe e Kupu he Atua mo e aga hako he manamanatuaga mo e loto, liga ko koe taha kua foaki e Iehova e mena fakaalofa uho ki ai​​—ko e maamaaga he kupu mooli hagaao ki a ia. He maama e kupu mooli ia to lafi e fai kakano ke he moui haau mogonei mo e to takitaki atu ke he “moui tukulagi”​​—ko e moui nakai fai fakaotiaga he lalolagi foou tututonu ne mavehe he Atua ka nakai leva ti hoko mai.a​​—1 Timoteo 6:12, 19; 2 Peteru 3:13.