Mataala ke he Tau Matahele he Tiapolo!

“Ala mai . . . he hele he tiapolo.”—2 TIMO. 2:26.

TO TALI FĒFĒ E KOE?

Ko e heigoa e kumikumiaga fakatagata kua latatonu kaeke kua hihiga a koe ke hūhū toko fakakelea hagaao ke he falu?

Mai he tau fakataiaga ha Pilato mo Peteru, ko e heigoa haau ka fakaako mai he nakai mahala ke he matakutaku mo e peehiaga?

Kalo kehe fēfē a koe mai he logonaaga molea e agahala?

1, 2. Ko e heigoa e tau matahele he Tiapolo ka fakatutala a tautolu ki ai he vala tala nei?

KUA tatao he Tiapolo e tau fekafekau ha Iehova. Ko e foliaga haana kua nakai ni ke tamate a lautolu, tuga e feua he tagata takafaga ne tamate e matafī haana. Ka ko e matapatu foliaga he Tiapolo ko e tapaki moui e fī haana mo e fakaaoga e tagata kua latatonu ke he kitiaaga haana.—Totou 2 Timoteo 2:24-26.

² Ke moua moui e fī, ko e tagata ne taute e hele kua liga fakaaoga e tau matahele kehekehe. Liga lali a ia ke moua e manu ka hau ke he mena tokanoa ti maeke a ia ke tapaki aki e kave afo. Po ke liga fakaaoga e ia e matahele galo ne fakataki aki mo e fakaofo aki e manu. Fakaaoga he Tiapolo e tau matahele pihia ke tapaki moui aki e tau fekafekau he Atua. Ka manako a tautolu ke kalo neke putoia, kua lata ia tautolu ke mataala mo e muitua ke he tau fakamailoga hataki he fakakite ko e taha he tau matahele ha Satani kua tata mai. Ko e vala tala nei to fakatutala ke he puhala ka puipui a tautolu ke he tolu e matahele kua fai kautūaga he fakaaoga he Tiapolo. Ko e tau mena nei ko e (1) tau vagahau nakai tautaofi, (2) matakutaku mo e peehiaga, mo e (3) molea e agahala. Ko e vala tala ne toe to fakatutala ke he ua e matahele ha Satani.

TAMATE E AFI HE VAGAHAU NAKAI TAUTAOFI

3, 4. Ko e kaumahala ke tautaofi e tau alelo ha tautolu ka fua ke he heigoa? Talahau e fakatai.

³ Ke kitia e tau manu ne fakamumuli, liga tugi he tagata takafaga e matakavi he ulu akau ke moua e tau manu he lali a lautolu ke fehola. He puhala fakatai, to manako e Tiapolo ke tugi e fakapotopotoaga Kerisiano. Ka kautū a ia, to taaki kehe e ia e tau tagata mai he huaga haohao mitaki ia ke he pule haana. Liga gahua fakalataha fēfē a tautolu mo ia ti mokulu ke he hele haana?

⁴ Kua fakatatai he tutaki ko Iakopo e alelo ke he afi. (Totou Iakopo 3:6-8.) Ka kaumahala a tautolu ke tautaofi e alelo ha tautolu, maeke ia tautolu ke tamata e afi velagia fakatai he fakapotopotoaga. Liga tupu fēfē e mena nei? Manamanatu ke he mena nei ne hoko: He fakapotopotoaga Kerisiano, ko e fakailoaaga ne taute kua kotofa tuai e matakainaga fifine pauaki ke eke mo paionia tumau. He mole e feleveiaaga, tokoua e tagata fakailoa ne fakatutala ke he fakailoaaga nei. Taha ne fakakite e fiafia mo e tau manatu mitaki ma e paionia foou. Ko e taha kua tuahā ke he tau logonaaga he paionia mo e manatu kua kumi matalahi ni a ia he fakapotopotoaga. Ha e fe he tau tagata fakailoa tokoua ia kua manako a koe ke eke mo kapitiga haau? Nakai uka ke kitia a ia kua liga tugi e fakapotopotoaga puhala he vagahau haana.

5. Ke tamate e afi he vagahau nakai tautaofi, ko e heigoa e kumikumi fakatagata kua lata ia tautolu ke taute?

⁵ Tamate fēfē e tautolu e afi he vagahau nakai tautaofi? Pehē a Iesu: “Ko e loga he tau mena he loto ke vagahau mai ai e gutu.” (Mata. 12:34) Ti ko e lakaaga fakamua ke kumikumi e tau loto ni ha tautolu. Kalo kehe nakai a tautolu he tau logonaaga kelea ne fakalagalaga e vagahau ke moumou aki? Ma e fakatai, ka logona e tautolu e matakainaga taane kua foli atu ke he falu kotofaaga, talitonu mooli nakai a tautolu ko e tau logonaaga haana kua meā, po ke tuahā a tautolu kua fakaohooho a ia ha ko e manako fakatagata? Ka hihiga a tautolu ke tuahā, kua mitaki ai ke manatu na hūhū toko he Tiapolo e tau logonaaga he fekafekau fakamooli he Atua ko Iopu. (Iopu 1:9-11) He nakai fakauaua ke he matakainaga taane ha tautolu, to mitaki ke manamanatu a tautolu ke he kakano kua hūhū toko a tautolu ki a ia. Fai kakano mitaki mooli kia a tautolu ke aga pihia? Po kua kona e tau loto ha tautolu he aga nakai fakaalofa ne tupu lahi he tau aho fakamui nei?—2 Timo. 3:1-4.

6, 7. (a) Ko e heigoa falu kakano ne liga hūhū toko a tautolu ke he falu? (e) Kua lata ke tali atu fēfē a tautolu ka amuamu mai?

⁶ Manamanatu ke he falu kakano kua liga hūhū toko a tautolu hagaao ke he falu? Liga taha ko e manako ha tautolu ke taute e tau mouaaga ha tautolu ke kitia maaliali. Ti liga lali a tautolu ke tokoluga hake he poka hifo e falu ki lalo. Po ke liga lali a tautolu ke fakagalo e tau kaumahala ni ha tautolu he taute e mena hako. He fakaikaluga, mahekeheke, po ke fakauaua ne fakaohooho a tautolu, to fakahiku ke he moumouaga.

⁷ Liga kua logona hifo ai e tautolu e atāina he vagahau fakakelea hagaao ke he taha tagata. Liga ko tautolu ne lauia teao he vagahau nakai tautaofi haana. Ka tupu e mena ia, he taui atu pihia ne nakai ko e tali. Ko e taute pihia kua fakalagalaga ai ke he afi mo e gahua fakatatau ke he finagalo he Tiapolo, nakai he Atua. (2 Timo. 2:26) Mitaki ki a tautolu ke fifitaki a Iesu he mena nei. He amuamu ki a ia, “nakai amuamu atu ke taui atu.” Ka e maeke a ia ke “tuku atu . . . kia ia kua fakafili fakatonu.” (1 Pete. 2:21-23) Kua mauokafua a Iesu to leveki e Iehova e tau mena tutupu ke he puhala mo e magaaho ni Haana. Kua lata a tautolu ke falanaki pihia ke he Atua. He fakaaoga e tautolu e vagahau ha tautolu ke fakamalolō, kua lagomatai a tautolu ke fakamau e “pipiaga he mafola” he fakapotopotoaga ha tautolu.—Totou Efeso 4:1-3.

HAO MAI HE MATAHELE HE MATAKUTAKU MO E PEEHIAGA

8, 9. Ko e ha ne fakahala e Pilato a Iesu?

⁸ Ko e manu ne puto he matahele ne nakai fai malolō ke hola. Pihia foki, ko e tagata kua mahala ke he matakutaku mo e lauia he peehiaga kua nakai fahia ke tautaofi katoatoa ke he moui haana. (Totou Tau Fakatai 29:25.) Kia fakatutala a tautolu ke he tau fakataiaga ke he tau tagata taane kehekehe tokoua ne fakatokatoka atu ke he peehiaga mo e matakutaku mo e kitia e fakaakoaga ka moua mai e tautolu ia laua.

⁹ Ko e Kovana Roma ko Ponotio Pilato ne iloa na nakai fai agahala a Iesu ti nakai manako a ia ke fakamamahi a Iesu. Ti pehē a Pilato hagaao ki a Iesu kua “nakai eke e ia ha mena ke lata ai ke mate a ia.” Ka e fakahala e Pilato ke tamate a Iesu. Ko e ha? Kua mahala a Pilato ke he peehiaga mai he tau tagata. (Luka 23:15, 21-25) “Kaeke ke vevete atu e koe e tagata na, ti nakai fakaalofa a koe kia Kaisara,” he tauui atu he tau tagata totoko ia, ti peehi a ia ke kau mo lautolu. (Ioane 19:12) Liga matakutaku a Pilato neke galo e tuaga haana—po ke moui haana—ka kau a ia mo Keriso. Ti fakaatā e ia a ia ke takitaki atu ke taute e finagalo he Tiapolo.

10. Ko e heigoa ne fakatupu a Peteru ke fakatikai e Keriso?

¹⁰ Ko e aposetolo ko Peteru e taha kapitiga tata lahi mahaki ha Iesu. Ne fakailoa fakalaulahi atu e ia ko Iesu e Mesia. (Mata. 16:16) Ne fakatumau e fakamooli ha Peteru he mogo ne nakai maama he falu tutaki e kakano he mena ne talahau e Iesu ti tiaki a Ia. (Ioane 6:66-69) Ti ko e mogo ne o mai e tau fī ke tapaki a Iesu, ne fakaaoga e Peteru e pelu ke lalago aki e Iki haana. (Ioane 18:10, 11) Ka e he mogo fakamui, ne mahala a Peteru ke he matakutaku ti fakatikai foki he iloa a Iesu Keriso. He magaaho kū, ne putoia e aposetolo he matahele he matakutaku tagata mo e fakaatā ai ke taofi a ia mai he muitua e puhala mauokafua.—Mata. 26:74, 75.

11. Maeke ia tautolu ke fahia ke he tau fakaohoohoaga kelea fe?

¹¹ Ko e tau Kerisiano, kua lata ia tautolu ke totoko e peehiaga ke taute e tau mena kua nakai fakafiafia e Atua. Ko e tau tagata gahua po ke falu ne liga lali ke fakaohooho a tautolu ke nakai mahani fakamooli po ke liga foli ke fakatupu a tautolu ke mahani feuaki. Maeke he tau tagata fakaako ke fakafehagai mo e tau kapitiga kua lali ke peehi a lautolu ke kaihā he tau kamatamata aoga, ke onoono ke he tau fakatino telefua, ke ula, ke fakaaoga e tau tulaki, ke fakaaoga hehē e kava, po ke taute e mahani feuaki fakalialia. Ti ko e heigoa ka lagomatai a tautolu ke kalo kehe he matahele he matakutaku mo e peehi ke taute e mena ne nakai fakafiafia a Iehova?

12. Ko e heigoa e tau fakaakoaga ka fakaako mai a tautolu ia Pilato mo Peteru?

¹² Kia kitekite a tautolu ke he mena ka fakaako mai e tautolu he tau fakataiaga ha Pilato mo Peteru. Tote e iloaaga ha Pilato hagaao ke he Keriso. Iloa agaia e ia ko Iesu ko e tagata nakai agahala ti nakai ko e tagata noa ni a ia. Ka ko Pilato kua nakai fakatokolalo mo e nakai fakaalofa ke he Atua mooli. Mukamuka lahi e Tiapolo ke tapaki moui a ia. Ha ha ia Peteru e iloilo tonu mo e fakaalofa ke he Atua. Ka e, he falu mogo ne nakai ha ha ia ia e mahani fakalatalata, ti matakutaku, mo e mahala ke he peehiaga. Ato tapaki a Iesu, ne hula a Peteru: “Kaeke ke tupetupe e tau tagata oti, ka e nakai pihia au.” (Mare. 14:29) Na kua lata e aposetolo ke mautauteute ma e tau kamatamata i mua kua tatai e tuaga haana mo e salamo ne mauokafua ai ke he Atua mo e lologo: “Ha ha ia au a Iehova; nakai matakutaku au; ko e heigoa ha mena ke eke he tau tagata kia au?” (Sala. 118:6) He pō fakahiku he moui Haana he lalolagi, ne uta e Iesu a Peteru mo e tau aposetolo tokoua haana mo ia ke he katene ko Ketesemane. Ka e, he nakai mataala tumau, ne pulumohea a Peteru mo e tau hoa haana. Ne fafagu e Iesu a lautolu mo e pehē: “Kia mataala a, mo e liogi, neke hoko mai e kamatamata kia mutolu; kua makai ni e loto, ka ko e tino kua lolelole.” (Mare. 14:38) Ka e liu foki a Peteru pulumohea mo e mahala ke he matakutaku mo e peehiaga he mogo fakamui.

13. Maeke fēfē a tautolu ke totoko e peehiaga ke taute e mena hepe?

¹³ Ko e tau fakataiaga ha Pilato mo Peteru ka fakaako a tautolu ke he taha fakaakoaga aoga foki: Ko e kautū he totoko e peehiaga kua putoia e tau vala tuga he iloilo tonu, fakatokolalo, fakalatalata, fakaalofa ma e Atua, mo e matakutaku ki a Iehova, nakai ke he tau tagata. Ka ati hake e tua ha tautolu ke he iloilo tonu, to vagahau fakamalolō a tautolu hagaao ke he tau taofiaga ha tautolu mo e mauokafua. To lagomatai he mena nei a tautolu ke totoko e peehiaga mo e kautū ke he matakutaku tagata. Mooli, kua latatonu a tautolu ke nakai molea e malolō ha tautolu. Ka e lata ia tautolu ke mailoga fakatokolalo kua latatonu a tautolu ma e malolō he Atua ke totoko e peehiaga. Kua latatonu ia tautolu ke liogi ma e agaaga a Iehova mo e fakaatā e fakaalofa ki a ia ke fakaohooho a tautolu ke fakatokoluga e higoa mo e tau tuaga haana. Mua atu, kua latatonu ia tautolu ke mautauteute ma e peehiaga ato fehagai a tautolu mo e kamatamata. Tuga anei, ko e tauteute tuai fakalataha mo e liogi ka lagomatai e tau fanau ha tautolu ke tali fakailoilo ka lali e tau kapitiga ha lautolu ke taute e lautolu e mena hepe.—2 Kori. 13:7.a

KALO HE MATAHELE KUA FAKAPEHIA—MOLEA E AGAHALA

14. Hagaao ke he ha tautolu a tau hehē kua mole, ko e heigoa kua manako e Tiapolo ke talahau e tautolu?

¹⁴ Falu mogo kua puto e manu he akau mamafa po ke patuō ne alaia e puhala ne faifano e fī. Ko e manu ne nakai mataala kua lau he uaea ne hele, ti tō hifo e akau po ke patuō mo e mapela ai. Ko e tau logonaaga mamafa he agahala kua liga fakatatai ke he kavega mamafa ne fakapehia. Ka manamanatu hagaao ke he hehē kua mole, kua liga logona hifo e tautolu e “malipilipi lahi.” (Totou Salamo 38:3-5, 8.) Kua manako a Satani ki a tautolu ke talahau kua nakai maeke a tautolu ke moua e fakaalofa noa ha Iehova mo e nakai lagotatai ke he tau puhala Haana.

15, 16. Maeke fēfē a koe ke kalo he matahele he mahala ke he molea e agahala?

¹⁵ Maeke fēfē a koe ke kalo mai he matahele nei ne fakapehia? Ka putoia a koe he agahala hagahaga kelea lahi, gahua mogonei ke liuaki mai e tuaga kapitiga haau mo Iehova. Matutaki ke he tau motua, ti ole ma e lagomatai ha lautolu. (Iako. 5:14-16) Taute e tau mena oti ke fakahako e hepe. (2 Kori. 7:11) Ka moua e koe e akonakiaga, ua loto lolelole. Ko e akonaki ko e fakakiteaga mooli kua ofania e Iehova a koe. (Hepe. 12:6) Kia eketaha ke nakai liu fatiaki e tau lakaaga ia ne takitaki ke he agahala, ti gahua ke fakamafola e mena ia. He mole e fakatokihala mo e liliuina haau, kia tua to maeke he poa lukutoto ha Iesu Keriso ke ufiufi mooli e tau hepehepe haau.—1 Ioa. 4:9, 14.

¹⁶ Falu tagata ne matutaki ke tapiki ke he tau agahala ha lautolu ne kua fitā he fakamagalo. Ka pihia a koe, manatu na fakamagalo e Iehova a Peteru mo e falu aposetolo he tiaki e Tama fakahele Haana ko Iesu he tulā ne manako lagomatai lahi mahaki. Ne fakamagalo e Iehova e tagata taane ne tuku kehe mai he fakapotopotoaga i Korinito ha ko e mahani feuaki fakalialia ka e fakatokihala ai ke he mogo fakamui. (1 Kori. 5:1-5; 2 Kori. 2:6-8) Kua tutala e Kupu he Atua hagaao ke he tau tagata agahala kelea muitui ne fakatokihala ti fakamagalo he Atua.—2 Nofo. 33:2, 10-13; 1 Kori. 6:9-11.

17. Ko e heigoa ka taute he lukutoto ma tautolu?

¹⁷ To fakamagalo mo e fakanimo e Iehova e tau hehē haau kua mole kaeke ke tokihala mo e talia mooli e koe haana fakaalofa noa. Ua manatu kua nakai maeke he poa lukutoto ha Iesu ke ufiufi e tau agahala haau. Ko e taute pihia to lauia ai ke he taha he tau matahele ha Satani. Pete ne mena kua manako e Tiapolo ke talitonu e koe, ko e lukutoto ka ufiufi e tau agahala he tau tagata oti kua mokulu ke he agahala mo e kua fakatokihala. (Fakatai 24:16) Ko e tua ke he lukutoto ka lagaki e mamafa he molea e agahala mai he tau tukeua haau ti maeke ke foaki ki a koe e malolō ke fekafekau ke he Atua mo e loto, manatu, mo e malolō katoa.—Mata. 22:37.

NAKAI GOAGOA A TAUTOLU KE HE TAU LAGATAU HA SATANI

18. Maeke fēfē a tautolu ke kalo kehe mai he tau matahele he Tiapolo?

¹⁸ Nakai tupetupe a Satani ko e matahele fe ka hele aki e ia a tautolu, manako ni a ia ke putoia a tautolu he matahele haana. Ha kua nakai goagoa a tautolu ke he tau lagatau ha Satani, maeke ia tautolu ke kalo kehe neke lamati he Tiapolo. (2 Kori. 2:10, 11) To nakai koto a tautolu he tau matahele haana kaeke ke liogi a tautolu ma e pulotu ke fehagai mo e tau kamatamata ha tautolu. “Kaeke ha ha ia mutolu taha kua nakai fai iloilo, kia ole atu a ia ke he Atua, ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia,” he tohi e Iakopo. (Iako. 1:5) Kua latatonu ia tautolu ke fakalautatai mo e tau liogi ha tautolu he fakalataha tumau ke he tau fakaakoaga fakatagata mo e fakagahua e Kupu he Atua. Ko e tau tohi fakaako he Tohi Tapu kua foaki mai he vahega fekafekau fakamoli mo e loto matala ne fakakite e maamaaga ke he tau matahele ne fakatoka he Tiapolo mo e lagomatai a tautolu ke kalo kehe mai ai.

19, 20. Ko e ha kua lata ia tautolu ke vihiatia e mena kelea?

¹⁹ Ko e liogi mo e fakaako Tohi Tapu kua fakatupu i loto ha tautolu e fiafia ke he tau mena kua mitaki. Ka kua aoga agaia ke feaki e tautolu e vihiatia ma e mena kelea. (Sala. 97:10) Ko e manamanatu fakahokulo ke he tau fakahikuaga he tau manako lotokai ka lagomatai a tautolu ke kalo kehe mai ai. (Iako. 1:14, 15) He fakaako a tautolu ke vihiatia e mena kelea mo e fiafia mooli ke he mena mitaki, ko e matapage ne fakatoka e Satani he hele haana kua nakai gahuahua ki a tautolu; ti nakai fakataki foki.

²⁰ Ko e fakaaue ha ia ha tautolu ha kua lagomatai he Atua ke nakai lamati e Satani a tautolu! Puhala he Haana agaaga, Kupu, mo e fakatokatokaaga, to laveaki e Iehova a tautolu mai ‘ia ia kua kelea.’ (Mata. 6:13) He vala tala ka mui mai, to fakaako a tautolu ke he puhala ke kalo kehe mai he ua foki e matahele kua moua he Tiapolo ke gahua mitaki he tapaki moui e tau fekafekau he Atua.

Totoko Malolō mo e Kalo Mai he Tau Matahele ha Satani!

“Totoko atu ke he tau lagatau he tiapolo.”—EFESO 6:11.

TO TALI FĒFĒ E KOE?

Maeke fēfē he fekafekau ha Iehova ke kalo kehe neke koto he matahele he velevelekoloa?

Ko e heigoa ka lagomatai e Kerisiano kua mau neke tō ke he luo he mahani faivao?

Ko e ha kua talitonu a koe kua aoga ke totoko atu ke he velevelekoloa mo e mahani feuaki?

1, 2. (a) Ko e ha ne nakai fai fakaalofa hofihofi noa a Satani ki a lautolu ne fakauku mo e ‘tau mamoe kehe’? (e) Ko e heigoa e tau matahele ha Satani ka fakatutala a tautolu ki ai he vala tala nei?

KO SATANI KO E TIAPOLO ne nakai fai fakaalofa hofihofi noa ke he tau tagata, mua atu ki a lautolu ne fekafekau ki a Iehova. Ne tau atu a Satani ki a lautolu ne fakauku kua toe. (Fakakite. 12:17) Ko e tau Kerisiano hakahakau ia ne fakamatapatu e gahua fakamatala he Kautu he vahā nei ti fakatapakupaku a Satani ko e pule he lalolagi nei. Nakai fai fakaalofa foki e Tiapolo ma e ‘tau mamoe kehe,’ ne lalago a lautolu ne fakauku ti fakatalitali ma e moui tukulagi—ko e amaamanakiaga ne nakai moua e Satani. (Ioane 10:16) Ati ita lahi mooli a ia! He ha ha ia tautolu e amaamanakiaga he lagi po ke amaamanakiaga he lalolagi, kua nakai fiafia mooli a Satani ke he tau momoui ha tautolu. Ko e foliaga haana ke taute a tautolu mo tau matafī haana.—1 Pete. 5:8.

² Ke fakamooli e foliaga ha Satani, ne fakatoka e ia e tau matahele kehekehe. Ha kua maeke a ia ke ‘fakapouli e tau manatu’ he tau tagata nakai tua, ne nakai talia e lautolu e tala mitaki ti nakai kitia e tau matahele nei. Ka e hele foki he Tiapolo e falu ne talia e ogo he Kautu. (2 Kori. 4:3, 4) Ko e vala tala fakamua ne fakakite e puhala ka kalo kehe a tautolu he tolu e matahele a Satani: (1) tau vagahau nakai tautaofi, (2) matakutaku mo e peehiaga, mo e (3) molea e logonaaga agahala. Fakatutala la tautolu mogonei ke he puhala ka tumauokafua a tautolu ke he ua foki e matahele fakasatani—velevelekoloa mo e kamatamata ke mahani faivao.

VELEVELEKOLOA—MATAHELE NE FAKAAPITIA

3, 4. Liga maeke fēfē e tau fakaatukehe he lalolagi nei ke takitaki ke he velevelekoloa?

³ He taha he tau fakataiaga ha Iesu, ne talahau e ia e tega ne gana ke he tau vao mahukihuki. Ne fakakite e ia ko e tagata ne liga logona e kupu, “ka ko e fakaatukehe ke he tau mena he lalolagi nai, mo e fakavai he koloa, kua apitia ai e kupu, ti nakai fua mai ai.” (Mata. 13:22) E, ko e velevelekoloa ko e taha matahele ne fakaaoga he ha tautolu a fī ko Satani.

⁴ He tuku fakalataha, ne apitia e kupu ke he ua e puhala. Taha puhala ko e “fakaatukehe ke he tau mena he lalolagi nai.” He “tau aho uka” nei, to lahi e mena ka fakaatukehe aki a koe. (2 Timo. 3:1) He tauuka e tau koloa mo e holo ki mua e nakai fai gahua, to liga uka ia koe ke leveki e moui. Liga tupetupe foki a koe hagaao ke he vahā anoiha mo e manamanatu, ‘To lahi nakai e totogi haaku ka mole e okioki gahua haaku?’ Ha ko e fakaatukehe pihia, falu ne takitaki ke tutuli e tau monuina, he manamanatu ko e tupe ke moua e haohao mitaki.

5. He puhala fe ka fakavaia e “tau koloa”?

⁵ Ne tutala a Iesu ke he taha puhala foki—ko e “fakavai he koloa.” Ko e vala ia ne fakalataha mo e fakaatukehe ka fakaapitia e kupu. Fakakite he Tohi Tapu ko e “tau tupe mo mena ke malu ai.” (Fakama. 7:12) Ka ko e tutuli he tau koloa kua nakai pulotu. Tokologa ne taufetului a lautolu ke moua e tau koloa, kua hele he velevelekoloa lahi a lautolu. Falu ne fakatupa foki ke he tau koloa.—Mata. 6:24.

6, 7. (a) Maeke fēfē he velevelekoloa ke hagahaga kelea he mena ne gahua e tagata? (e) Ko e heigoa e tau tupetupe kua lata he Kerisiano ke manamanatu ka ha ha i ai e gahua loa ne foaki age ki a ia?

⁶ Ko e manako ke he tau koloa ka liga kamata mitaki. Ma e fakatai, manamanatu ke he tuaga nei. Fina atu e takitaki gahua haau ki a koe ti pehē: “Fai tala mitaki au! Kua moua he kamupanī e konotuleke makimaki. Kakano e mena nei ke gahua loa ke he laulahi he tau magaaho he tau mahina gahoa i mua. Ka e fakamafana e au a koe to lahi e totogi haau ka moua.” To fēfē e tali haau ke he foakiaga ia? Mooli, ko e manako ke leveki fakatino e magafaoa haau ko e matagahua uho lahi, ka e nakai ko e matagahua naia haau. (1 Timo. 5:8) Ha ha i ai foki e falu tupetupe haau ka manamanatu ki ai. Lahi fēfē e gahua loa ka putoia? To fakatauhele kia he gahua tupe haau e tau matagahua fakaagaaga haau, putoia e tau feleveiaaga he fakapotopotoaga mo e haau a Tapuakiaga Magafaoa he afiafi?

⁷ He fuafua e fifiliaga haau, ko e heigoa kua manamanatu a koe kua aoga lahi—lauia fēfē e pege haau ha ko e gahua loa po ke liga lauia fēfē e tuaga fakaagaaga haau? To fakatupu kia he makai ke loga e tupe a koe ke oti e tuku fakamua e tau mena he Kautu he moui? Maeke nakai a koe ke kitia e velevelekoloa ka lauia a koe kaeke ke fakaheu e koe e tuaga he malolō fakaagaaga haau mo e magafaoa haau? Ka tupu e mena ia ki a koe he magaaho tonu nei, maeke fēfē a koe ke mauokafua mo e kalo kehe he apitia he velevelekoloa?—Totou 1 Timoteo 6:9, 10.

8. He manamanatu ke he tau fakataiaga fe he Tohi Tapu ka lagomatai a tautolu ke liu kitekite ke he tau puhala moui ha tautolu?

⁸ Ke kalo kehe mai he kototia he velevelekoloa, liu kitekite ke he puhala moui haau. To nakai manako a koe ke tuga a Esau, ne fakakite e tau gahua haana kua vihiatia e ia e tau mena fakaagaaga! (Kene. 25:34; Hepe. 12:16) Mooli kua nakai lata a koe ke tuga e tagata maukoloa ne uiina ke fakafua e tau koloa haana, age ke he tau tagata nonofogati, mo e mui atu ki a Iesu. He nakai taute pihia, ne “fano kehe ai [e tagata] mo e momoko, ha ko e tagata muhukoloa a ia.” (Mata. 19:21, 22) He hele he maukoloa, ne galo he tagata e lilifu lahi—ke mui ke he tagata ne mua ue atu ne moui! Kia fakaeneene ke nakai galo e lilifu he eke mo tutaki ha Iesu Keriso.

9, 10. Ko e heigoa haau ka talahau ko e onoonoaga he Tohi Tapu ke he tau koloa fakatino?

⁹ Ke fehagai mo e tau tupetupe nakai aoga hagaao ke he tau koloa he tino, kia muitua e tomatomaaga ha Iesu: “Aua neke fakaatukehe a mutolu, mo e pehe age, To kai e tautolu ha ha, po ke inu e tautolu ha ha, po ke tapulu a tautolu ha ha? Ha ko e tau mena oti ia kua kumi he tau motu kehe. Ha ko e mena fioia he Matua ha mutolu ha ha he lagi kua aoga e tau mena oti ia kia mutolu.”—Mata. 6:31, 32; Luka 21:34, 35.

¹⁰ He nakai mokulu ke he fakavaia he tau koloa, eketaha ke moua e manatu he tagata tohia Tohi Tapu ko Akuru, ne pehē: “Aua neke foaki mai e koe kia au e nofogati po ke muhu mena; kia fagai e koe au ke he tau mena kai kua lata mo au.” (Fakatai 30:8) Maaliali ai, ne maama e Akuru e puipuiaga uho he tupe ti pihia mo e fakavai he koloa. He mailoga e tau fakaatukehe he lalolagi nei mo e fakavai he koloa ka fua mai e moumouaga fakaagaaga. Ko e tupetupe ke he tau koloa fakatino ka fofō e magaaho haau, utakehe e malolō haau, ti foaki ki a koe tote po ke nakai fai fakaohoohoaga ke foli ke he tau mena he Kautu. Ko e mena ia, kia eketaha a koe ke nakai koto he matahele a Satani he velevelekoloa!—Totou Heperu 13:5.

FAIVAO—KO E LUO FUFŪ FAKAILOILO

11, 12. Maeke fēfē e Kerisiano ke lauia he mahani faivao ke he gahuaaga haana?

¹¹ Ko e tau tagata takafaga ne manako ke moua e manu malolō ne liga aku hake e luo he puhala ne fa fano ai e matafī. Ko e luo ne fa uufi aki e tau kākau ikiiki mo e kelekele. Taha he tau kamatamata kautū lahi ha Satani ne tuga e vahega matahele ia. Ko e agahala he mahani faivao. (Fakatai 22:14; 23:27) Tokologa e Kerisiano ne mokulu ke he luo ia he fakaatā e lautolu a lautolu ke he tau tuaga ne kua mukamuka lahi ke fakahui. Falu Kerisiano ne mau kua mokulu ke he mahani faivao he mole e fakatū e fakafetuiaga lotofakavihi nakai tonu.

¹² Ko e fakafetuiaga lotofakavihi nakai tonu ka tupu he matakavi ne gahua a koe. Fakakite he kumikumiaga gahua kua molea e hafa he tau fifine ne faivao mo e teitei 3 mai he 4 e tagata taane ne faivao ne fai fakafetuiaga faivao mo e kapitiga gahua. Ko e gahua tupe haau kia kua lata ke fakalataha mo e tau tagata ne nakai ko e hoa mau haau? Ka pihia, ko e heigoa e tuaga he fakafetuiaga haau mo lautolu? Fai fakakaupāaga nakai a koe he matakavi kua fakatoka pauaki ke he gahua mo e nakai fakaatā ai ke fai mena foki? Ma e fakatai, he mole e tau fakatutala noa tumau mo e tagata taane gahua, ko e matakainaga fifine Kerisiano kua liga tutala ki a ia, ti tala age foki ki a ia e tau lekua he fakamauaga haana. He taha tuaga foki, he mole e fakakapitiga mo e fifine ne gahua, kua liga fakakakano he tagata taane Kerisiano: “Kua aoga e manatu haaku ki a ia mo e fanogonogo mooli a ia he tutala au ki a ia. Ti loto fakaaue e ia au. Manako au ke taute pihia foki au i kaina!” Maeke nakai a koe ke kitia e tau Kerisiano he tau tuaga pihia ka mukamuka ke taute e mahani faivao?

13. Maeke fēfē ke tupu e fakafetuiaga lotofakavihi nakai tonu i loto he fakapotopotoaga?

¹³ Ko e fakafetuiaga lotofakavihi nakai tonu kua maeke ke tupu i loto he fakapotopotoaga. Manamanatu ke he fakataiaga mooli nei. Ko Daniel mo e haana hoana ko Sarah,a ko e tau paionia tumau. Ko Daniel foki “ko e motua ne talia tumau,” he ui ai e ia. Ne talia fiafia e ia e tau matagahua oti ne age ki a ia. Ko e vala he fekafekauaga haana, ne taute e Daniel lima e fakaako Tohi Tapu mo e tau tagata taane fuata—tokotolu ia lautolu ne papatiso. Ko e tau matakainaga taane foou nei ne lata ke lahi e lagomatai. He lavelave a Daniel he tau matagahua fakateokarasi kehekehe haana, ne fa foaki e Sarah e lagomatai ia. Nakai leva ti gahua e puhala nei: ko e tau tagata fakaako Tohi Tapu fakamua ha Daniel ne lata mo e lalagoaga ke he tau logonaaga, ti moua e lautolu mai ia Sarah. Ne lata foki a Sarah ke leveki e tau logonaaga, ti moua ai e ia mai he tau tagata fakaako Tohi Tapu ha Daniel. Ko e matahele mate ne kua fakatū. “Totou mahina e lolelole fakaagaaga mo e logonaaga he hoana haaku,” talahau e Daniel. “Ko e mena nei, fakalataha mo e nakai mataala au ki a ia, ne takitaki ke he fua hagahaga kelea lahi. Ne faivao e hoana haaku mo e taha he haaku a tau tagata fakaako fakamua. Ne lolelole fakaagaaga a ia i lalo he mataihu haaku, ka e lavelave lahi au ke he tau matagahua oti haaku ke mailoga ai foki e mena hane tupu.” Maeke fēfē a koe ke kalo kehe mai he matematekelea pihia?

14, 15. Ko e heigoa e tau puhala ka lagomatai e tau Kerisiano kua mau ke kalo kehe he luo he mahani faivao?

¹⁴ Ke kalo kehe he luo he mahani faivao, manamanatu ke he kakano he maveheaga he fakamauaga. Pehē a Iesu: “Ko ia kua fakalataha he Atua, aua neke vevehe he taha tagata.” (Mata. 19:6) Ua manamanatu ko e tau kotofaaga fakateokarasi haau kua mua e aoga ke he hoa mau haau. Lafi ki ai, kia mataala ko e nofo kehe tumau mai he hoa haau ma e tau matagahua nakai aoga kua liga fakakite e lolelole he fakamauaga haau ti maeke ke takitaki ke he kamatamata ti liga ke he agahala hagahaga kelea.

¹⁵ Kaeke ko e motua a koe, ka e kua e fuifui mamoe? Ko e aposetolo ko Peteru ne tohi: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia.” (1 Pete. 5:2) Ko e tau tagata he fakapotopotoaga i lalo he levekiaga haau kua nakai lata ke fakaheu. Ka e lata ia koe ke fakamooli e tau matagahua haau ko e leveki mamoe ti nakai fakaheu e matagahua haau ko e taane. Kua nakai fai aoga—ti hagahaga kelea foki—ke hagaaki e tau onoonoaga oti haau ke he fagaiaga he fakapotopotoaga ka e “hoge” e hoa haau i kaina. Pehē a Daniel, “Lahi atu e mena ke he moui he taufetului ke leveki e tau matagahua ke he hagahaga kelea he magafaoa ni haau.”

16, 17. (a) Ko e heigoa e tau fuafuaaga aoga ka taute he tau Kerisiano kua mau he gahuaaga ke fakakite e fakamailoga maaliali kua nakai maeke a lautolu ke fai lotofakavihi? (e) Foaki e fakataiaga he vala tala kua lomi ka lagomatai e tau Kerisiano ke kalo kehe he mahani faivao.

¹⁶ Lahi e fakatonuaga mitaki ne haia he tau lau he Ko e Kolo Toko mo e Awake! ke lagomatai e tau Kerisiano ke totoko neke kototia he matahele he mahani faivao. Tuga anei, Ko e Kolo Toko ia Oketopa 1, 2006, ne foaki e fakatonu nei: “He tau gahuaaga mo e he falu matakavi foki, kia mataala ke he tau tutuaga ka fakatupu e fakafetuiaga tata lahi. Ke fakatai ki ai, he lahi e magaaho ne gahua tokoua e tagata taane mo e fifine ka fakatupu e kamatamata. Ko e taane po ke hoana, kua lata ia koe ke fakamahino ke he puhala vagahau mo e ke he foliga haau kua fai hoa mau a koe. Ti ko e tagata ne tutuli e mahani Atua fakamooli, kua nakai lata ke kalahī he tui e tau mena tui nakai gali mo e he puhala tauteute haau. . . . He toka e tau ata he hoa mau mo e he fanau haau i loto he gahuaaga ka fakamanatu ki a koe mo e falu ke he tau mena ne mua ki a koe. Kia fakamalolō ke nakai fakaohooho—po ke mahala—e mahani kalahī mai he taha tagata.”

¹⁷ Ko e vala tala ne mataulu “Fakamooli i Loto he Fakamauaga—Ko e Heigoa e Kakano Mooli he Mena Ia?” he Awake! ia Aperila 2009 ne hataki ke he miti ke he mahani feuaki ne putoia e taha tagata ne nakai ko e hoa mau haau. Ko e vala tala ne fakakite ko e taute e mahani feuaki to fakalahi e manako haau ke mahani faivao. (Iako. 1:14, 15) Ka mau a koe, kua pulotu ki a koe mo e hoa haau ke liu fakatutala tokoua e vala tala pihia he taha magaaho mo e taha magaaho. Ko e fakamauaga ko e fakaholoaga ne fakatū e Iehova, ti kua tapu ai. Ko e fakaatā e magaaho ke tutala ke he hoa haau hagaao ke he fakamauaga ha mua ko e puhala mitaki ke fakakite kua uho e tau mena tapu ki a koe.—Kene. 2:21-24.

18, 19. (a) Ko e heigoa e fakahikuaga he mahani faivao? (e) Ko e mahani fakamooli he fakamauaga kua fua mai e tau mahani fe?

¹⁸ Ka mailoga e koe a koe kua kamatamata ke fakatū e fakafetuiaga lotofakavihi nakai tonu, kia manamanatu fakahokulo ke he tau fua hagahaga kelea he mahani feuaki mo e faivao. (Fakatai 7:22, 23; Kala. 6:7) Ko lautolu kua mahani feuaki kua nakai fakafiafia a Iehova mo e fakamamahi e hoa ha lautolu mo lautolu foki. (Totou Malaki 2:13, 14.) Kehe mamao ai, manamanatu ke he tau fua mitaki ka moua e lautolu he fakatumau e mahani mitaki. Nakai ni moua e lautolu e amaamanakiaga he moui tukulagi ka e moua foki e lautolu e moui mitaki mogonei, putoia e loto manamanatu meā.—Totou Tau Fakatai 3:1, 2.

¹⁹ Ne lologo he salamo: “Kua lahi e mafola ha lautolu kua manako lahi ke he hāu [Atua] a fakatufono; ti nakai fai mena ke tupetupe ai a lautolu.” (Sala. 119:165) Ti fiafia ke he kupu mooli, mo e “kia o fakalaulau a mutoIu; nakai tuga ne tau tagata goagoa ka kia tuga e tau tagata iloilo” he tau magaaho uka nei. (Efeso 5:15, 16) Ko e tau puhala kua muitua e tautolu kua puke he tau matahele ne fakatoka e Satani ke hele aki e tau tagata tapuaki mooli. Ka e loga e tau mena ke puipui aki a tautolu. Kua foaki mai e Iehova ki a tautolu e tau mena kua lata ia tautolu ke “totoko atu” mo e “tamate e tau fana kaka oti hana kua kelea”!—Efeso 6:11, 16.