Fakaakoaga 7
Fakatata ke he Atua he Liogi
Ko e ha ne aoga ai ke liogi tumau? (1)
Ko hai kua lata ke liogi a koe ki ai, mo e liogi fefe? (2, 3)
Ko e heigoa e tau mena kua lata tonu ke liogi ki ai? (4)
Ko e magaaho fe kua lata ke liogi a koe? (5, 6)
Fanogonogo nakai e Atua ke he tau liogi oti? (7)
1. Ko e liogi ko e tutala fakatokolalo ke he Atua. Kua lata ia koe ke liogi tumau ke he Atua. Ti maeke ia koe ke logona e tata ki a ia tuga ke he hau a kapitiga fakahele. Mua ue atu mo e malolo a Iehova, ka e fanogonogo a ia ke he tau liogi ha tautolu! Liogi tumau nakai a koe ke he Atua?—Salamo 65:2; 1 Tesalonia 5:17.
2. Ko e liogi ko e taha vala a ia he ha tautolu a tapuakiaga. Ti ko e mena haia, ne kua lata ia tautolu ke liogi hokoia ni ke he Atua ko Iehova. Ke he magaaho ne moui ai a Iesu ke he lalolagi, ne liogi tumau a ia ke he hana Matua, ne nakai ke he ha tagata foki. Kua lata ia tautolu ke taute pihia foki. (Mataio 4:10; 6:9) Ka e taha e mena, ko e tau liogi oti ha tautolu kua lata ke talahau ke he higoa ha Iesu. Ko e fakakite he mena nei e fakalilifu ha tautolu ke he tuaga ha Iesu mo e ha ha foki ia tautolu e tua ke he hana a poa lukutoto.—Ioane 14:6; 1 Ioane 2:1, 2.
3. Ka liogi a tautolu kua lata ia tautolu ke vagahau ke he Atua mai he ha tautolu a tau loto. Kua nakai lata a tautolu ke talahau manatu ha tautolu a tau liogi po ke totou mai he tau tohi liogi. (Mataio 6:7, 8) Maeke a tautolu ke liogi ke he tau tutuaga lilifu, ke he ha magaaho he tau magaaho, mo e he ha matakavi he tau matakavi. Maeke foki he Atua ke logona e tau liogi nakai fai leo mai he tau loto ha tautolu. (1 Samuela 1:12, 13) Ka e mitaki ke kumi e tau matakavi ogoogonoa ne fakatoka kehe mai he falu tagata ke liogi ha tautolu a tau liogi takitokotaha.—Mareko 1:35.
4. Ko e heigoa e tau tala ka maeke ia koe ke liogi ki ai? Ko e ha mena he tau mena ne lauia ai hau a kapitiaga mo ia. (Filipi 4:6, 7) Ne fakakite mai he liogi fakaako kua lata ia tautolu ke liogi ke he higoa a Iehova mo e hana finagalo. Maeke foki ia tautolu ke ole ke foaki mai e tau mena kua lata mo e tino, ke fakamagalo mai e tau hala ha tautolu, mo e lagomatai ke fuluhi kehe mai he tau kamatamata. (Mataio 6:9-13) Kua nakai lata e tau liogi ha tautolu ke lotokai. Kua lata ni a tautolu ke liogi ke he tau mena ne felauaki mo e finagalo he Atua.—1 Ioane 5:14.
5. Maeke ia koe ke liogi ka fakalagalaga he loto a koe ke fakaaue po ke fakaheke ke he Atua. (1 Nofoaga he Tau Patuiki 29:10-13) Kua lata ia koe ke liogi ka ha ha ia koe e tau mena vihi mo e ka kamatamata e tua hau. (Salamo 55:22; 120:1) Kua tonu ni ke liogi fakamua to kai hau a tau kai. (Mataio 14:19) Ne uiina e Iehova a tautolu ke liogi “nakai noa.”—Efeso 6:18.
6. Kua pauaki a tautolu ke liogi ka taute e tautolu e taha agahala lahi. Ke he tau magaaho pihia kua lata ia tautolu ke olelalo ke he fakaalofa noa mo e fakamagaloaga a Iehova. Ka fakakite e tautolu ha tautolu a tau hala ki a ia mo e lali fakalahi a tautolu ke ua liu taute foki ti “fakamagalo e tau hala” mai he Atua.—Salamo 86:5; Tau Fakatai 28:13.
7. Ko e fanogonogo ni a Iehova ke he tau liogi he tau tagata tututonu. Ke logona he Atua hau a tau liogi, kua lata ia koe ke lali fakamakamaka ke moui ke he hana a tau fakatufono. (Tau Fakatai 15:29; 28:9) Kua lata ia koe ke mahani fakatokolalo ka liogi. (Luka 18:9-14) Kua lata ke felauaki hau a tau gahua mo e tau mena ne liogi a koe ki ai. Ti to fakamoli e koe, ko e ha ha ia koe e tua mo e mai moli he loto e tau mena hau ne vagahau. Ko e magaaho la ia ka tali e Iehova e tau liogi hau.—Heperu 11:6.