Kua Fekafekau mo e Fakatokolalo a Ia ki a Iehova
“NAKAI KO E matakavi ne fekafekau a koe ki ai, ka ko ia ne fekafekau a koe ki ai ne aoga moli.” Ko John Booth, kua fiafia lahi he talahau e tau kupu ia, mo e moui a ia ki ai. Ko e hana a moui he lalolagi, ne kua fakaoti he Aho Gofua, Ianuali 8, 1996, kua nakai taumaleku ko hai ne fifili e ia ke fekafekau ki ai.
Ko e tagata fuata agaia he 1921, kua kumikumi e John Booth e kakano he moui. Ne fakaako e ia e aoga Aho Tapu he Tapu Fakafou a Holani, ka e totoko a ia ke he manatu ke fakamahani ke eke mo faifeau ha kua logona hifo e ia ko e takitaki he tau akoako e tau momoui lotokai. He magaaho ne kitia e ia e tohi fakatata ma e lauga ne matapatu “Ko e Tau Miliona ne Momoui he Mogonei To Nakai Fakaai ke Mamate,” ne nakai moumou e ia taha magaaho ke moua mai taha tohi ne fakatata ai. Kua tataki ai he mena ne totou e ia, nakai leva ti heke patikala taholi a ia ke 24 kilomita ke he tau feleveiaaga he tau Tagata Fakaako he Tohi Tapu, ne kua ui aki e Tau Fakamoli a Iehova he mogoia. Ne papatiso ai a ia he 1923 mo e kamata ke fakamatala he taha gutuhala ke he taha gutuhala he matakavi i Wallkill, New York, ko e kavi ne ha ha i ai e faama povi he hana magafaoa.
Ne hu atu e Matakainaga Booth ke he fekafekauaga mau ia Apelila 1928. Ti fakamatala a ia he hana matakavi mo e he matakavi i tua he Fahi Toga, kua fakafua ai e tau pepa faka-Tohi Tapu ma e tau kai mo e mena ke mohe ai. Kua fakamalolo a ia ke he tau tagata fakahagahaga kelea pihia ne ha ha i ai e tau fana, ko lautolu ha lautolu a tau mena taute kava fufu, ne taha mai ia lautolu ia ne fana mo e fakakafokia e hoa paionia ha John Booth. He 1935, kua kotofa e Matakainaga Booth ke eke mo leveki faifano mo e kamata ke aahi e tau fakapotopotoaga mo e tau matakau ikiiki he fahi motu. Ne fakatokatoka e ia e tau toloaga mo e lagomatai e tau matakainaga tane mo e fifine ke fakauka pete ni ko e tau totokoaga. Ko e fehagaao atu ke he tau matakau vale, ne ha ha he hopo fakafili, mo e matematekelea ke he tau fale pouli kua eke mo mena fa tupu mau ke he Matakainaga Booth. “Ko e pepa ni ke talahau fakamatafeiaga mai e tau magaaho fulufuluola ia,” he tohi e ia he taha mogo.
He 1941, ko Joseph F. Rutherford, ko e pelesiteni he Sosaiete he Kolo Toko he mogoia, ne kotofa e Matakainaga Booth ke gahua he Faama he Kautu, tata ki Ithaca, New York. Ko e kavi ia ne fekafekau fakamoli ai a ia ke 28 e tau tau. Ko e hana a ofania ke he fekafekauaga kua nakai pulefu, kua lahi e fiafia hana he tau tau loga ke fakalataha mo e tau afe he tau tagata fakaako he Aoga Tohi Tapu he Kolo Toko a Kiliata ke fakamahani aki e tau misionare, ne kua fakatu he kavi ia he Faama he Kautu ato hoko ke he 1961. He 1970, kua ole atu ke he Matakainaga Booth ke fekafekau he Tau Faama he Kolo Toko i Wallkill, New York, mo e kua liuaki a ia ke he matatepu ne kamata a ia ke gahua paionia he falu 45 e tau tau fakamua.
He 1974, kua kotofa e Matakainaga Booth ke eke mo taha he Kau Fakatufono he Tau Fakamoli a Iehova i Brooklyn, New York. Kua fekafekau fakamoli a ia ke he vala ia ato mate ai a ia he 93 e tau tau he moui. Ko John Booth, kua fakahele ha ko e hana a aga Kerisiano ne hokulo e fakatokolalo mo e totonu. Ato hoko e fakakaumahala he fahi tino mo e malolo hana a ia, kua fakamatala a ia he taha gutuhala ke he taha gutuhala mo e ke he tau puhala tu he maaga.
He maanu ni a lautolu ne fekafekau mo ia ha ko e hana a mole atu, kua moua e lautolu e fakamafanaaga i loto he maveheaga he Tohi Tapu hagaao ke he tau Kerisiano fakauku pihia, kua fakaliu tutu mai a lautolu ke he moui he lagi mo e “ko e tau gahua foki ha lautolu kua muimui atu kia lautolu.” (Fakakiteaga 14:13; 1 Korinito 15:51-54) Ko e takatakaiaga fou moli, ka ko e kavi ka fekafekau tukumalagi a John Booth ki a Iehova!
[Fakatino he lau 32]
John Booth 1903-1996
[Fakatino he lau 32]
HERALD-AMERICAN, ANDOVER 1234
76 Jehovites Jailed in Joliet
[Credit Line]
Chicago Herald-American