Fakaakoaga 1

Kumi Fefe e Koe ke Iloa e Manako he Atua

Ko e heigoa e tau fakailoaaga aoga ne ha ha i loto he Tohi Tapu? (1)

Ko hai e Punaaga he Tohi Tapu? (2)

Ko e ha ne kua lata ia koe ke kumikumi ke he Tohi Tapu? (3)

1. Ko e Tohi Tapu ko e mena fakaalofa uho mai he Atua. Kua fakatai ia ke he tohi he matua tane loto fakaalofa ke he hana tau fanau. Kua talahau mai ki a tautolu e mena moli hagaao ia ke he Atua—ko hai a ia mo e hana a tuaga. Ne fakamaama mai e tauteaga ma e tau mena vihi mo e mouaaga he fiafia moli. Ko e Tohi Tapu ni hokoia ne talahau mai ki a tautolu e tau mena kua lata ke taute e tautolu ke fiafia e Atua.—Salamo 1:1-3; Isaia 48:17, 18.

2. Toko 40 e tau tagata kehekehe ne tohia e Tohi Tapu ke he vaha ne 1,600 e tau tau, kamata mai he 1513 F.V.N. Ko e katoatoa he tau tohi ikiiki i loto ko e 66. Ko lautolu ne tohia e Tohi Tapu ne omoomoi mai ia he agaga he Atua. Ne tohia e lautolu hana a tau manatu, nakai ko e ha lautolu ni. Ti ko e Atua he lagi, nakai ko e tau tagata he lalolagi, e Punaaga he Tohi Tapu.—2 Timoteo 3:16, 17; 2 Peteru 1:20, 21.

3. Ne kikite fakalahi e Atua kua lagaki fakahako mo e puipui ke mau e leva he Tohi Tapu. Ne loga lahi e tau Tohi Tapu ne kua lolomi ai mai he ha tohi. To nakai fiafia oti e tau tagata ka kitia a koe kua kumikumi ke he Tohi Tapu, ka e ua toka e mena ia ke fakaoti hau a kumikumi. Ko e falanaki ni e hau a moui tukulagi ke he tau aho i mua ke he hau a kumikumi ke iloa e Atua mo e taute he hana a finagalo pete ne ha ha i ai e tau totoko.—Mataio 5:10-12; Ioane 17:3.