Fakaakoaga 4
Ko Hai e Tiapolo?
Ko Satani ko e Tiapolo—hau a ia i fe? (1, 2)
Fakahehe fefe e Satani e tau tagata? (3-7)
Ko e ha kua lata ia koe ke totoko e Tiapolo? (7)
1. Ko e kakano he kupu “tiapolo” ko e tagata fatipiko kelea hagaao ke he taha tagata. Ko e kakano he “satani” ko e fi po ke ko ia ne totoko. Ko e tau kupu nei ne fakahigoa aki e fi mua ue atu he Atua. Ko e magaaho fakamua, ko ia ko e agelu mitaki katoatoa he lagi ne nofo mo e Atua. Ka e taha e mena, ko e magaaho fakamui ne lahi ne manamanatu hana ki a ia ni mo e manako ke he tapuaki ne kua lata ni ke age ke he Atua.—Mataio 4:8-10.
2. Ne vagahau e agelu nei, ko Satani, ki a Eva puhala he gata. Ha ko e tau pikopiko ne tala age ki a ia, ne fakaohooho e ia a ia ke liuliu ke he Atua. Ne totoko e Satani e “pule katoatoa” he Atua, po ke hana a tuaga Mua Ue Atu. Ne huhu e Satani e aoga he pule he Atua ma e mitaki he Hana a tau tagata. Ne huhu foki e Satani ko e mahani fakamoli la nakai ha tagata ke he Atua. He taute e mena nei, ne taute ni e Satani a ia mo fi ke he Atua. Ko e mena haia ne fakahigoa ai a ia ko Satani ko e Tiapolo.—Kenese 3:1-5; Iopu 1:8-11; Fakakiteaga 12:9.
3. Ne lali a Satani ke fakahehe e tau tagata ke tapuaki age ki a ia. (2 Korinito 11:3, 14) Ko e taha puhala ne fakahehe aki e ia e tau tagata ko e puhala aki e lotu pikopiko. Ka fakaako he lotu e tau pikopiko hagaao ke he Atua, ko e fekafekau ni fakamoli a ia ki a Satani. (Ioane 8:44) Ko e tau tagata i loto he tau lotu pikopiko ne tua fakamoli ni a lautolu ko e tapuaki a lautolu ke he Atua moli. Ka ko e fekafekau fakamoli ni a lautolu ki a Satani. Ko ia ko e “atua he lalolagi nai.”—2 Korinito 4:4.
4. Ko e matutakiaga fakataulatua foki e taha puhala ne ta mai aki e Satani e tau tagata ki lalo hifo he hana malolo. To liga ui a lautolu ke he tau agaga ke puipui a lautolu, ke fakapakia e falu, ke talahau e tau mena he vaha i mua, po ke taute e tau mana. Ko Satani e malolo kelea i tua he tau gahua oti nei. Ke fiafia e Atua, kua lata ia tautolu ke fakamamao mo e nakai fai gahua matutaki fakataulatua.—Teutaronome 18:10-12; Gahua 19:18, 19.
5. Fakahehe foki e Satani e tau tagata, puhala aki e fakahakehake he tau lanu ne tutupu mai ai mo e tapuaki ke he tau matakau pule fakatufono. Ko e logonaaga he falu ko e kautu po ke lanu tagata ha lautolu kua mua hake ia ke he falu. Ka e nakai moli e mena nei. (Gahua 10:34, 35) Tua e falu tagata ke he tau matakau pule fakatufono ke taute e mafola ma e tau mena vihi he tau tagata. Kua tiaki e lautolu e Kautu he Atua, ha ko e tau gahua nei ne taute e lautolu. Ko e mena ni a nei ke utakehe aki ha tautolu a tau mena vihi.—Tanielu 2:44.
6. Ko e taha puhala ne fakahehe aki e Satani e tau tagata ko e kamatamata aki e tau manako agahala. Ne talahau mai e Iehova ki a tautolu ke kalo kehe mai he tau gahua agahala ha ko e mena iloa e ia to fakamatematekelea he tau mena ia a tautolu. (Kalatia 6:7, 8) Ko e falu tagata liga to manako ke kau fakalataha a koe mo lautolu ke he tau gahua pihia. Ka e manatu, ko e moli he mena ko Satani ne manako ia koe ke taute e tau gahua nei.—1 Korinito 6:9, 10; 15:33.
7. Fakaaoga foki e Satani e tau favale po ke totoko ke maeke ia koe ke tiaki a Iehova. Ko e falu he hau a tau fakahelehele to liga ita lahi ha kua kumikumi a koe ke he Tohi Tapu. Ka e liga vaiga e falu ki a koe. Ka ko hai ne foaki mai e moui hau? Manako a Satani ke fakamatakutaku a koe ke fakaoti e fakaako hau ki a Iehova. Ua toka a Satani ke kautu! (Mataio 10:34-39; 1 Peteru 5:8, 9) Ka totoko a koe ke he Tiapolo, to fakafiafia e koe a Iehova mo e fakakite ko e lagaki hake e koe Hana a pule katoatoa.—Tau Fakatai 27:11.
[Tau Fakatino he lau 9]
Ko e lotu pikopiko, matutakiaga fakataulatua, mo e fakahakehake ni ke he hana a motu ne maeke ke fakahehe e tau tagata
[Fakatino he lau 9]
Totoko a Satani he matutaki mau e fakaako ki a Iehova