Fakaakoaga 13

Moua Fefe e Koe e Lotu Moli?

Fiafia nakai e Atua ke he tau lotu oti, po ke taha ni? (1)

Ko e ha ne tokologa e tau lotu ne talahau ko e tau Kerisiano? (2)

Maeke fefe ia koe ke kitia e tau Kerisiano moli? (3-7)

1. Ne kamata e Iesu taha ni e lotu Kerisiano moli. Ti pihia ni ke he vaha nei kua lata ni ke taha ne matakau, po ke vahega, he tau tagata tapuaki moli ke he Atua ko Iehova. (Ioane 4:23, 24; Efeso 4:4, 5) Ne fakaako he Tohi Tapu ko e toko gahoa ne tau tagata he puhala pukilu ke he moui.—Mataio 7:13, 14.

2. Ne talahau tuai he Tohi Tapu ka mole e mamate he tau aposetolo, to hohoko mai fakatekiteki e tau fakaakoaga hepe mo e tau tauteaga mena nakai Kerisiano ke he fakapotopotoaga Kerisiano. To futiaki he tau tagata a lautolu ne talia ke mumui ki a lautolu ka e nakai ko Keriso. (Mataio 7:15, 21-23; Gahua 20:29, 30) Ko e mena haia ne kitia e tautolu tokologa e tau lotu kehekehe ne talahau ko e tau Kerisiano. Maeke fefe ia tautolu ke kitia e tau Kerisiano moli?

3. Ko e fakamailoga mua ue atu he tau Kerisiano moli ko e ha ha ia lautolu e feofanaki. (Ioane 13:34, 35) Ne nakai fakaako a lautolu ke manamanatu ko e mua hake e mitaki ha lautolu ke he falu tagata he tau magafaoa po ke tau lanu kehekehe. Ne nakai fakaako foki a lautolu ke vihiatia e tau tagata he falu motu. (Gahua 10:34, 35) Ti nakai fakalataha a lautolu ke he tau felakutaki. Ko e tau Kerisiano moli ne taute mena fakamatakainaga ne taha ke he taha.—1 Ioane 4:20, 21.

4. Ko e taha fakamailoga he lotu moli ko e ha ha ia lautolu e hokulo e fakalilifu ke he Tohi Tapu. Ne talia ai e lautolu ko e Kupu he Atua mo e tali tonu ke he tau mena ne talahau i ai. (Ioane 17:17; 2 Timoteo 3:16, 17) Ne taute e lautolu ko e mua atu e aoga he Kupu he Atua mai he tau iloilo fakatagata po ke tau mahani fakamotu. (Mataio 15:1-3, 7-9) Ne lali a lautolu ke momoui ke he Tohi Tapu ke he ha lautolu a tau aho takitaha. Ti nakai lauga e lautolu e taha mena kehe ka e gahua ke he taha.—Tito 1:15, 16.

5. Kua lata foki e lotu moli ke fakatapu e higoa he Atua. (Mataio 6:9) Ne fakailoa e Iesu e higoa he Atua, ko Iehova, ke he falu. Kua lata foki e tau Kerisiano moli ke taute pihia. (Ioane 17:6, 26; Roma 10:13, 14) Ko hai e tau tagata he matakavi hau ne fakailoa e higoa he Atua ke he falu?

6. Kua lata foki he tau Kerisiano moli ke fakamatala hagaao ke he Kautu he Atua. Ne taute e Iesu e gahua nei. Ne tala tumau a ia ke he Kautu. (Luka 8:1) Ne poaki e ia hana tau tutaki ke fakamatala e fekau taha nei ke he lalolagi oti. (Mataio 24:14; 28:19, 20) Tali tonu e tau Kerisiano moli ko e Kautu he Atua ni ka moua mai e mafola moli mo e hagahaga mitaki ma e lalolagi nei.—Salamo 146:3-5.

7. Kua lata e tau tutaki ha Iesu ke nakai fai vala he lalolagi kelea nei. (Ioane 17:16) Ne nakai putoia a lautolu ke he tau fakatokatokaaga fakatufono he lalolagi mo e tau taufetoko he tau tagata. Ne fakamamao a lautolu mo e tau mahani ke mamahi ai, tau gahua, mo e tau agaga ne kitia lahi ai he lalolagi. (Iakopo 1:27; 4:4) Maeke nakai ia koe ke kitia e lotu he matakavi hau ne ha ha i ai e tau fakamailoga nei he Kerisiano moli?

[Tau Fakatino he lau 26, 27]

Ko e tau Kerisiano moli fefakaalofaaki, fakalilifu e Tohi Tapu, mo e fakamatala hagaao ke he Kautu he Atua