Fakaaoga e tau Tala Fou ke Fakaohooho e Manatuaga

¹ Loto nakai a koe ke puke noa hau a koloa he tau manatu mitaki ke fakafou tumau e fekafekauaga hau mo e fakaohooho e tau manatu he tau tagata ke he fekau he Tohi Tapu? Ati fakaaoga e tau mena tutupu mai he lalolagi katoa mo e he maaga hau ke kamata e tau fakatutalaaga. Futiaki mai e tau mena tutupu he taukalakala kaina mo e he motu po ke mai he lalolagi katoa. Ha ko e tau mena mole atu anei. (1 Kori. 7:31) Kia kikite e tau fakataiaga na.

² Tau lekua fakatupe mo e tau mena totogi he moui ne fakaatukehe lahi e tau tagata. Haia, kia pehe age:

◼ “Logona nakai he nusi kua liu holo hake e totogi [talahau e mena]?” Po ke tutala a koe hagaao ke he tau tagata tokologa ne fakaokioki mai he tau gahua he taha fale gahua lahi, kaeke kua pihia. Kikite ni e koe e puhala mitaki ke fakamatutaki e tutalaaga, ti huhu age “Fa manamanatu nakai kua ha ne uka lahi ke leveki e moui?” po ke “To kaikavakava tumau ni kia a tautolu?”

³ Tau fakailoaaga he tau favaleaga, tuga e matematekelea ke he tau magafaoa po ke ki a lautolu he tau fuata aoga, e taha fakatutalaaga foki. Huhu age e koe:

◼ “Totou nakai e koe he nusipepa [talahau e matematekelea ne tupu he maga]?” Ati huhu “Manatu la, ko e heigoa ne fakalagalaga e favaleaga mahaki he lalolagi?” po ke “To hohoko atu nakai a tautolu ke he magaaho ka nonofo haohao mitaki?”

⁴ Tau nusi he tau fakapukeaga kelea, tau mafuike, mo e tau felakutaki ke he tau matakavi kehekehe he lalolagi kua maeke foki ke fakaohooho e manatuaga. Ke fakatai, huhu atu e koe:

◼ “Ko e Atua kia ne taute e [talahau e mena fakalutukia]?” Po ke matutaki ke he taha felakutaki fou ti pehe age: “Ha kua tokologa ne loto lahi ma e mafola, ko e ha ne uka lahi ai ke moua?”

⁵ Kia mataala ke he tau tala fou ke kamata aki e tutalaaga hau. Ha i ai e tau puhala ke fakaaoga he “Tau Tala Fou,” he lau 10-11, he tohi Reasoning. Ka e, aua laga ke he ha fahi fakapolitika po ke tau matematekelea he maaga. Ka e, fakatonu atu ke he Tohi Tapu mo e Kautu he Atua ko e puhala hokoia ni ke tali aki e tau matematekelea he tau tagata.

“Lata Kia Au ke Fano Kehe?”

¹ He talia ke he poakiaga a Iesu ke “o atu . . . ke eke e tau motu oti kana mo tutaki,” tokologa e tau fekafekau tukulele a Iehova kua fakaholo atu ke gahua he matakavi ne mua atu e manako mo e lagomataiaga. (Mata. 28:19) Kua fifitaki e lautolu a Paulo, ne talia e ogo: “Hau a ki Maketonia, mo e lagomatai mai kia mautolu.” (Gahua 16:9) Ti maeke fefe ke taute e mena nei he puhala ne aoga?

² Fano Fakapapale: Ha ha kia e falu matakavi ne lavea ke taute he fakapotopotoaga hau? Ka pihia, ti mitaki ke gahua fakalahi e koe e tau kavi ia. Ka e fakamua to fifili ke fano kehe ke he taha matakavi, kia fakatutala mo e tau motua hau ke kitia kua mautali mitaki nakai a koe ke fano ki ai. Kaeke pihia a koe, ti huhu atu ke he leveki takaiaga na fai fakapotopotoaga nakai ne tata mai kua maeke ia koe ke fakalaulahi atu e fekafekauaga hau. Ke he taha fahi, kaeke oti e totou fakamua he tau tupe ke palepale aki, maeke ia koe ke fifili fakamitaki po ke lagomatai e taha maaga he motu po ke he taha motu kehe. Kaeke ke pihia e manako hau, kua lata ke fakalataha mo e tau motua hau a koe ti tohitohi ke he la ofisa ne fiafia a koe ke fekafekau ki ai, mo e fakailoa atu e tuaga fakateokarasi hau. Kua mitaki lahi ke finatu fakamua ke he kavi ne loto ki ai ato fifili kua mitaki po kua nakai mitaki ke fano kehe fakaoti.

³ Kia Lotomatala he Paea Atu: Ne tokologa fakahaga e tau matakainaga ha tautolu kua o atu ke he tau atu motu ke tutuli e tuaga moui mitaki po ke moua e fakahautoka he tau matematekelea. Ka e, kua tokelea e falu ke he tau tagata matahavala ne poaki e lagomatai ke nofomau ke he motu fou ka e fofo e tau tupe ha lautolu mo e tiakipu. He falu magaaho, kua fakaiaia he tau tagata nei e tau tagata paea ke taute e tau gahua mahani feuaki. He nakai talia, kua tiakipu ke he fakaalofa noa he motu ne o atu ki ai. Ti mua atu e tuaga kelea he tau tagata paea mai he hana motu kaina. Mo kua kumi e tau matakainaga ke fakamalu a lautolu po ke lagomatai ke he tau puhala pihia, ti fakakavega aki e falu magafaoa Kerisiano ne taufetului foki ke he tau fakalavelave mo e tau mena uka ni ha lautolu. Falu faoa he tau kaina kua vehevehe fano ati lolelole fakaagaga e tau magafaoa ha ko e tau fenoga nakai tonu pihia.​—1 Timo. 6:8-11.

⁴ Kaeke ke loto a koe ke finatu ma e aoga fakatagata, kia tokaloto ko e ha matakavi ni ka nofomau a koe i ai, ha ha i ai e tau lekua ka fakafehagai. Kua mukamuka ke kautu e tau mena pihia he kavi kua mahani tuai a koe tuga e vagahau po ke aga fakamotu, ka e nakai ke kamata fou he tau kalakala nakai mahani.