Fakaako e Porosua Kia Mataala!
To fakaako he tau fakapotopotoaga he lalolagi katoa e porosua Kia Mataala! he tau fahi tapu ia Me 23 ki a Iuni 20, 2005, he Fakaakoaga Tohi he Fakapotopotoaga. Fakamolemole fakaaoga e tau huhu na i lalo ka tauteute tuai ma e feleveiaaga nei mo e ka takitaki ai. He magahala he fakaakoaga, totou e paratafa, mo e totou e tau kupu tohi ne tutu i ai kaeke fai magaaho.
Fahi Tapu ia Me 23
◼ Lau 3-4: Ko e heigoa e tau tutuaga i loto nei ne kua lauia lahi e moui hau? Ko e heigoa ne fakakite kua nakai ni tutupu e tau mena nei he matakavi ne nofo ai a koe?
◼ Lau 5: Ko e heigoa ne talitonu ai a koe kua fakaalofa moli mai e Atua? Ko e heigoa ka liga fakakite e fakaalofa lahi atu ha tautolu ke he Atua mo e tau mena hane taute e ia?
◼ Lau 6-8: Ko e heigoa ne talahau he Mataio 24:1-8, 14 hagaao ke he kakano he tau tutuaga he lalolagi he vaha nei? He fakakite ia 2 Timoteo 3:1-5, ko e vaha fe ainei ne momoui ai a tautolu? Ko e heigoa e tau aho fakamui nei? Ko e heigoa ati talitonu ai a koe ko e Tohi Tapu moli e Kupu he Atua? Ko e heigoa e Kautu ne fakamatala e tautolu?
◼ Lau 9-10: Ko e ha kua lata ia tautolu ke manamanatu fakamitaki ke he tau fifiliaga ha tautolu he tau aho oti mo e ke he tau mena ne mua he moui ha tautolu? (Roma 2:6; Kala. 6:7) He kitekite ke he tau huhu he lau 10, ko e heigoa e tau kupu tohi ne manatu e koe ne kua lata ke fakaohooho aki e tau mena hau ka taute?
Fahi Tapu ia Me 30
◼ Lau 11: Ko e ha kua lata ia tautolu ke igatia ke manamanatu ke he tau huhu he lau tohi nei? (1 Kori. 10:12; Efeso 6:10-18) Ko e heigoa ne fakakite he tau tali ha tautolu ke he tau huhu nei kua uta fakahokulo e tautolu e fakatonuaga ha Iesu ia Mataio 24:44?
◼ Lau 12-14: Ko e heigoa e ‘magaaho he fakafiliaga’ ne tohi ia Fakakiteaga 14:6, 7? Ko e heigoa e kakano he ‘matakutaku ke he Atua mo e ta age kia ia e fakahekeaga’? Ko e heigoa a Papelonia Lahi, ti ko e heigoa ka tupu ki ai? Hagaao ki a Papelonia Lahi, ko e heigoa kua lata ke taute e tautolu mogonei? Ko e heigoa foki kua putoia ke he magaaho he fakafiliaga ne talahau tuai? Kua lauia fefe a tautolu he nakai iloa e “aho, po ke magaaho” he fakafiliaga ne talahau tuai he Atua? (Mata. 25:13)
◼ Lau 15: Ko e heigoa e matakupu he pule katoatoa, ti kua lauia fefe a tautolu takitokotaha?
◼ Lau 16-19: Ko e heigoa e “lagi fou” mo e “lalolagi fou”? (2 Pete. 3:13) Ko hai ne mavehe mai e tau mena nei? Ko e heigoa e tau hikihikiaga ka tamai he lagi fou mo e lalolagi fou? To aoga takitokotaha nakai a tautolu mai he tau mena ia?
Fahi Tapu ia Iuni 6
◼ Lau 20-1: Ko e heigoa e hatakiaga hagaao ke he fehola ne foaki e Iesu ke he tau tutaki hana he senetenari fakamua? (Luka 21:20, 21) Ko e magaaho fe mogoia ka fehola ai? Ko e ha kua mafiti lahi ke fehola mo e nakai fakatuai? (Mata. 24:16-18, 21) Ko e ha ne fakaheu he tokologa he tau tagata e tau hatakiaga? Kua aoga fefe e tau afe tagata i Saina mo e he tau Filipaina mai he fanogonogo ke he tau hatakiaga mauokafua? Ko e ha kua mua atu foki e mafiti ke fanogonogo ke he hatakiaga he Tohi Tapu hagaao ke he fakaotiaga he fakatokaaga nei? Ha kua mua atu e mafiti nei, ko e heigoa ha tautolu a matagahua? (Fakatai 24:11, 12)
◼ Lau 22-3: I Ausetalia he 1974 mo e i Kolomopia he 1985, ko e ha ne fakateaga e tokologa ke he tau hataki he tau matematekelea lalahi, ti ko e heigoa e tau fua ne tupu mai? Liga to fefe la e manatu hau he fakalata e koe ke he tau hatakiaga nei, mo e ko e ha? Ko e heigoa ka fakakite kua fanogonogo a tautolu ke he hatakiaga he vaha ha Noa? Ko e ha ne manako e tau tagata ke nonofo takatakai ni mo e i Sotoma i tuai? Maeke fefe ia tautolu ke moua e aoga he manamanatu fakahokulo hagaao ke he mena ne tupu i Sotoma?
Fahi Tapu ia Iuni 13
◼ Lau 24-7: Fakaaoga e “Tau Huhu he Fakaakoaga” he lau 27.
Fahi Tapu ia Iuni 20
◼ Lau 28-31: Fakaaoga e “Tau Huhu he Fakaakoaga” he lau 31.
Ko e fakatutala ha tautolu ke he porosua ka lagomatai a tautolu ke “kia mataala” mo e ke mautauteute. Kia fakaata tumau he fekafekauaga ha tautolu ke he toloaga tagata e mafiti lahi he fakapuloaaga he agelu: “Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga.”—Mata. 24:42, 44; Fakakite. 14:7.