¹ Taha e puhala mahuiga ke matutaki he vaha nai ko e E-mail. Pete kua liga felauaki mitaki ke feutaaki e tau iloaaga mo e tau manatu fakatagata ke he vahaloto he magafaoa mo e tau kapitiga he fakaaoga e koloa nai, ko e heigoa e ‘tau mena noa’ ka liga putoia ke he fakaaoga nakai fai fakakaupaaga he E-mail?​—Fakatai 12:11.

² Tau Hatakiaga Hagaao ke he E-Mail: Ko e falu kua talahau ke logona hifo e matutakiaga tata mo e fakatokatokaaga ha Iehova he magaaho ka moua e lautolu e tau vala tala ne piko a lautolu kua fou mai he E-mail. Liga putoia ai e tau iloaaga, tau tala tutupu he Peteli, tau hokotaki ke he tau matematekelea tutupu pauaki po ke favaleaga, mo e pihia ke he tau vala tala fakaeneene kua fakamatala he Tau Aoga Fekafekau he Kautu. Ko e falu kua alaala lahi ke fakafano e tau fekau pehenai, he amanaki ko ia ne tala age mua e vala tala ia ke he ha lautolu a tau kapitiga.

³ Ke he tau magaaho, ko e tau vala tala mo e tau iloaaga kua kehe mamao po kua fakalahilahi. Po ke liga ha ko e tau laliaga ke fakafuluola, kua talahau he falu e tau manatu fakavai. Ko lautolu kua fakatepetepe ke fakakite e tau fekau pehenai kua fa nakai moua katoatoa e tau tala moli. (Fakatai 29:20) Ke he falu tutuaga, pete ni ko e tala kua uka ke moli, kua feutaaki ai he fia iloa tala. Ko e tau hokotaki nakai hako po ke fakavaia pihia kua lafi ke he “tau tala tuai,” ne nakai fakatolomaki e tau mahani Atua moli.​—1 Timo. 4:6, 7.

⁴ Kaeke fakafano e koe e tala ti hoko ki mui ko e tala hepe, kua fai vala foki ka lago ki a koe ha ko e momoko po ke malokiloki kua fakatupu he mena nai. He magaaho ne moua e Tavita e hokotaki fakalahilahi kua mamate oti hana tau fanau tane, ne “hehe ai e ia hana tau tapulu” he ita lahi. Pete ia, ko e tala moli, tokotaha ni he tau tama tane hana ne mate. Kua fakatupetupe tuai e mena ia, ka e kua lafi ki luga e fakatupetupe ha Tavita ha ko e tala fakalahilahi nei. (2 Samu. 13:30-33) Moli kua nakai manako a tautolu ke taute ha mena ke fakahehe po ke fakalolelole aki ha matakainaga ha tautolu.

⁵ Halavaka ne Kotofa he Atua: Kia tokaloto nukua kotofa he Matua ha tautolu he lagi e halavaka he matutakiaga, “e fekafekau fakamoli mo e loto matala.” Ko e “fekafekau” ia kua kotofa ke fifili ko e heigoa e tau vala tala ka foaki ke he magafaoa he tua, pihia foki “ke he tau magaaho kua lata” ke fakatoka mai ai. Ko e tau mena kai fakaagaga nai kua puhala mai ni he fakatokatokaaga fakateokarasi. Kua lata a tautolu ke onoono tumau ke he halavaka ne kotofa he Atua ma e tau vala tala kua moli, nakai ke he matakau fakaaoga he Internet.​—Mata. 24:45.

⁶ Tau Fahi Web he Internet: Na fai fahi Web pauaki he Internet a tautolu: www.watchtower.org. Lata ni he fahi nai ke tuku atu e tau vala tala ke he tau tagata. Ti kua nakai lata he ha tagata tokotaha, komiti, po ke fakapotopotoaga ke talaga e lau Web hagaao ke he Tau Fakamoli a Iehova. Ko e falu kua tuku e tau mataulu tala he tau tohi ha tautolu fakalataha mo e tau kupu tohi oti mo e tau tohi lagomatai katoatoa mo e hokotia foki ke foaki e tau fakatokaaga lauga he fonoaga ko e tau mena fakaalofa. Pete kua fai po ke nakai fai muka kua putoia ai, ko e tauteaga ia ke liu talaga mo e tufatufa e tau tohi he Tau Fakamoli a Iehova ke he tau lagaki eleketoniki ko e holia a ia he tau matafakatufono copyright. Liga kitia he falu e mena nai ko e taute he fekau ma e tau matakainaga, kua nakai talia ki ai ti lata ke fakamamutu.

⁷ He fakagahua e fakafiliaga mitaki mo e mahani fakalatalata he magaaho ka fakaaoga ai e puhala matutaki eleketoniki nai to fakapuke moli e tau loto ha tautolu aki e “tau koloa oti ni kua uho mo e fulufuluola.”​—Fakatai 24:4.

Talahauaga Hagaao ke he Tau Mekasini

The Watchtower Sept. 15

“Kua miliona e tau tagata kua talitonu na fai malolo mua atu e ‘tau tagata tapu’ ti mitaki ke puhala e tau liogi ia lautolu. Ko e heigoa hau a manatu? [Fakaata ma e tali.] Mailoga e mena ne talahau e Iesu Keriso. [Totou Ioane 14:6.] Kua fakamanamanatu he mena nai e falu hagaao ke puhala e tau liogi he ‘tau tagata tapu.’ Ko e fufuta nai he The Watchtower kua fakatutala ke he vala tala uho ia.”

Awake! Sept. 22

“Tokologa he vaha nai ne kapaletu hagaao ke he fakamatakutakuina, kua lafi ki ai e fakaaoga he tau moko mo kanavaakau. Manatu nakai a koe to maeke e tau fakatufono he tagata ke uta kehe e lalolagi fakamatakutakuina nai? [Fakaata ma e tali.] Kua fakakite mai he Tohi Tapu e mena kua manatu e Atua ke taute. [Totou Esekielu 34:28.] Ko e mekasini Awake! nai kua kumukumi ke he falu vala kua putoia ai.”

Ko e Kolo Toko Oke. 1

“Tokologa ne manamanatu to fai fakaotiaga nakai ke he tau lekua kua kitia viko e tautolu ia tautolu​—tau felakutaki, matahavala, mo e tau aga fakamatakutaku. Ko e heigoa hau a manatu? [Fakaata ma e tali.] Kua foaki he Tohi Tapu e fakamoliaga mafanatia nai. [Totou Salamo 37:10, 11.] Fakamaama mai he mekasini nai ko e ha ne nakaila fakaoti ia he Atua e mahani kelea mo e matematekelea kua tupu mai ai.”

Awake! Oct. 8

“Ke he vaha nei kua tuga tupu lahi e numera he tau magafaoa matua tokotaha. Kua fakakite mai he Tohi Tapu ko e Tufuga ha tautolu kua fakaalofa hofihofi noa ki a lautolu. [Totou Salamo 146:9.] Ko e fufuta nai he Awake! kua fakakite nukua maeke fefe e tau matapatu fakaakoaga he Tohi Tapu ke lagomatai e tau magafaoa matua tokotaha ke feaki ha lautolu a tau fanau ke kautu.”