Puhala ke Fakaaoga e Tau Fakafeleveia Fakataitai

1. Puhala fe kua lata ia tautolu ke onoono ke he tau fakafeleveia fakataitai ne foaki mai?

¹ Ko e tau fakafeleveia fakataitai ma e foaki he tau mekasini ha tautolu mo e falu tohi kua fa kitia tumau he Ha Tautolu a Fekafekauaga he Kautu. Ka fakalataha ke he fonua, nakai lata ia tautolu ke liu fatiaki e tau fakafeleveia fakataitai nei ke tatai tonu ni tuga ne tohi. Kua foaki mai ma tautolu ke eke mo fakatokaaga he tau mena ka liga talahau e tautolu. To mua atu e lauia mitaki ha tautolu ka talahau e fakafeleveiaaga ke he tau kupu ni ha tautolu. He talahau e tautolu e tau mena ke he puhala kua fa mahani kua lagomatai ke fakatotoka e tagata he fale mo e fakaata e fakamoli mo e mauokafua.​—2 Kori. 2:17; 1 Tesa. 1:5.

2. Ko e ha kua lata ia tautolu ke manamanatu ke he tau aga fakamotu he matakavi ka tauteute e fakafeleveiaaga?

² Taute ke Felauaki e Fakafeleveia Hau: Ko e fakafeleveiaaga ha tautolu he tala mitaki kua lauia lahi ha ko e tau aga fakamotu. Maeke nakai ia koe ke fakafeleveia atu ke he tagata he fale ka mole ia ti fakahu mai e fakafeleveiaaga hau ke he fakatutalaaga, po ke amanaki e tau tagata he matakavi hau ke talahau fakahako ni he fekau? Na kehekehe e taha matakavi ke he taha matakavi mo e pihia foki mai he taha tagata ke he taha tagata. Kua lata foki ke manamanatu ke he fakaaogaaga he tau huhu. Ko e tau huhu ne fa felauaki mitaki ke he falu matakavi to liga fakafuafua kelea he falu matakavi. Ko e mena ia, kua lata ia tautolu ke fifili fakamitaki ti hikihiki e fakafeleveiaaga ha tautolu ke felauaki mo e tau mena kua mitaki ke he matakavi.

3. Ko e ha ne manamanatu ai ke he feakiaga mo e tau manamanatuaga ha lautolu kua tutala a tautolu ki ai?

³ Ke lafi ki ai, kua lata ia tautolu ke manamanatu ke he feakiaga mo e puhala manamanatu he tau tagata he matakavi ha tautolu ka tauteute ma e gahua he fonua. Ma e fakatai, to liga kehe mamao e fakatutalaaga hau he Mataio 6:9, 10 ke he tagata malolo ke he Katolika mai he puhala ka tala a koe ke he tagata ne nakai iloa e “Liogi he Iki.” He manamanatu tuai, kua fa maeke ia tautolu ke taute e fakafeleveiaaga ha tautolu ke mua e mitaki ke he tau tagata ka feleveia mo tautolu he fonua.​—1 Kori. 9:20-23.

4. Ko e ha kua aoga e tauteute fakamitaki?

⁴ Pete ka fakatoka e tautolu ke fakaaoga e fakafeleveia fakataitai tuga kua tohi po ke nakai, kua nakai fai mena ke hukui aki e tauteute fakamitaki. Kua lata ia tautolu ke totou fakamatafeiga e vala tala po ke veveheaga kua amanaki a tautolu ke fakakite mo e kumi e tau manatu ka liga fakalagalaga e fiafia. Ti lafi ai ke he fakafeleveiaaga ha tautolu. Ko e iloa mitaki he tau vala tala he tau tohi ha tautolu ka maeke ia tautolu ke foaki ai mo e fiafia.

5. Ko e ha ka liga tauteute e tautolu e taha fakafeleveiaaga kehe, ti taute pihia fefe e tautolu?

⁵ Falu Fakafeleveia: Kua fakakaupa ni kia a tautolu ke fakaaoga e fakafeleveiaaga ne tohi he tau fakafeleveia fakataitai? Nakai. Kaeke hagahaga mitaki lahi e taha fakafeleveia ki a koe po ke kupu tohi, ti fakaaoga. Mua atu ke he tau mekasini, kia mataala ke he tau tutuaga ke fakakite e falu vala tala kua liga fiafia pauaki ke he matakavi hau. Ka fakatoka ke fakatata e tau fakafeleveiaaga he gahua ke he fonua he Feleveiaaga Fekafekau, lata ke fakatoka ke taute e ha fakatataaga ka felauaki mo e matakavi. Ke he puhala nei to liga lagomatai oti ke talahau lauia mitaki e tala mitaki.

Talahauaga Hagaao ke he Tau Mekasini

The Watchtower Jan. 15

“Manako oti a tautolu ke he moui mitaki ma tautolu mo e tau fanau ha tautolu, ka e tokologa ne logona kua nakai fai malolo ke moua ai. Manamanatu nakai a koe na maeke ia tautolu ke pule ke he vaha anoiha ha tautolu? [Fakaata ma e tali.] Fakakite he mekasini nei mai he Tohi Tapu kua fai malolo a tautolu ka e falanaki e vaha anoiha ha tautolu ke he tau fifiliaga ne taute e tautolu mogonei.” Totou Teutaronome 30:19.

Awake! Jan. 22

“Ka fehagai a tautolu mo e tau lekua malolo tino, loto fakaaue a tautolu oti ke he ekekafo ne manamanatu ke he tau logonaaga ha tautolu. Ka e manatu nakai a koe na tokologa nakai e tagata gagao ne tutu ke manamanatu ke he tau logonaaga he tau ekekafo ha lautolu? [Fakaata ma e tali.] Kua kumikumi he mekasini nei e tau paleko ne fehagai mo e tau ekekafo mo e tau mena ne fakatoka mai i mua ma e tau gahua fakaekekafo.” Totou Isaia 33:24.

Ko e Kolo Toko Fepu. 1

“Kua nakai kia fakatupetupe he tokologa lahi e tau tagata kua matematekelea he vaha nei ha ko e pule lahi mo e favale? [Talahau e taha mena tupu ne iloa ke he matakavi, ti fakaata ma e tali.] Kua fakatutala he mekasini nei e puhala ne onoono e Atua ke he moui. Kua fakamaama foki e puhala ka fakahao mai a tautolu mai he mamahi ne ha ha ke he vaha nei.” Totou Salamo 72:12-14.

Awake! Feb. 8

“Taha he tau paleko lahi mahaki foili kua fehagai mo tautolu he vaha nei ko e tupetupe. Talia nakai e koe? [Fakaata ma e tali.] Kua talahau tuai fakahakotika he Tohi Tapu to tupu e mena nei. [Totou 2 Timoteo 3:1.] Kua foaki mai he mekasini nei e tau manatu aoga kua maeke ke lagomatai a koe mo e magafaoa hau ke fehagai mo e tupetupe.”