Ko e Kaitalofa ha Tautolu ke he Falu

¹ Ne logona he aposetolo ko Paulo e matagahua ke fakamatala ke he tau tagata. Ne iloa e ia kua taute e Iehova ke maeke he tau tagata oti kana ke fakamoui ke he puhala he toto uho he Tama Hana. (1 Timo. 2:3-6) Ko e mena ia, ne talahau e Paulo: “Ha ha ia au e tau mena he tau tagata Heleni katoa mo e tau tagata kehe, ko e tau iloilo katoa mo e tau goagoa.” Ne gahua fakamakutu mo e nakai mategugu a ia ke totogi hana kaitalofa ke he tau tagata hana he folafola e tala mitaki ki a lautolu.​—Roma 1:14, 15.

² Tuga a Paulo, ne tutuli e tau Kerisiano he vaha nei ke folafola e tala mitaki ke he tau katofia he tau magaaho oti. Hane hoko mafiti mai e ‘matematekelea lahi,’ ko e kumi ha tautolu ki a lautolu ne loto fakamoli kua aoga lahi. Kia omoomoi he fakaalofa moli ke he tau tagata a tautolu ke fakailoilo he gahua fakahao moui nei.​—Mata. 24:21; Eseki. 33:8.

³ Totogi e Kaitalofa ha Tautolu: Ko e matapatu puhala ke hokotia a tautolu ke he tau tagata ko e fakamatala he taha gutuhala ke he taha gutuhala. He tau matakavi kua tokologa ne nakai moua ha tagata he kaina, ko e fakamau fakahako tumau mo e liu atu he tau magaaho kehe ka maeke ia tautolu ke tutala mo e tokologa he tau tagata. (1 Kori. 10:33) Maeke foki ia tautolu ke hokotia ke he tau tagata takitaha he fakamatala ke he tau matakavi pisinisi, he tau puhala tu, he tau paaka, he tau tuaga motoka, mo e he telefoni. Kia huhu hifo ki a tautolu, ‘Kua katoatoa nakai e mena ne taute e au ke kumi e tau puhala kehekehe he fakamatala ke maeke ke talahau e fekau he moui?’​—Mata. 10:11.

⁴ Taha e paionia ne ha ha ai e fakalagoaga makai ke hokotia ke he tau tagata oti he matakavi hana. He taha kaina, ne papa tumau e tau pa fakamaama he fale ti nakai fai tagata tumau i kaina. Pete ia, taha aho ne nakai ha ha ai e paionia he fekafekauaga, ne mailoga e ia e motoka he fahi mua he kaina hana ne nakai moua. He fakaaoga e magaaho ia, ne fakatagi e ia e logo he gutuhala. Ne tali he tagata tane, ti takitaki atu e fakatutalaaga fakamua ia ke he tau liu ahi atu loga he matakainaga fifine mo e tane hana. Nakai leva, ne talia he tagata tane e fakaakoaga Tohi Tapu, ti ko e matakainaga tane papatiso a ia mogonei. Ne fakaaue a ia ke he matakainaga fifine nei he logona e fakalagoaga ke fakamatala ke he falu.

⁵ He mafiti mai e fakaotiaga, ko e magaaho anei ke totogi e kaitalofa ha tautolu ke he tau tagata he eketaha fakamalolo a tautolu he gahua fakamatala.​—2 Kori. 6:1, 2.

Vala 11​—Taute e Tau Fakaakoaga Tohi Tapu Holo ki Mua

Lagomatai e Tau Tagata Fakaako ke Taute e Tau Liu Ahi Atu

¹ Ka kamata e tagata fakaako Tohi Tapu ke fakalataha ke he gahua fakamatala, to feleveia a ia mo e tau tagata kua fakakite e fiafia ke he tala mitaki. Maeke fefe a tautolu ke lagomatai e tagata fakailoa fou ke taute e tau liu ahi atu lauia mitaki mo e ke feaki e fiafia ne moua e ia?

² Ko e mau tauteute ma e liu ahi atu kua kamata ke he ahi atu fakamua. Fakamalolo e tagata fakaako ke fakakite e fiafia moli ki a lautolu ne kua tutala mo ia. (Filipi 2:4) Fakamahani tumau a ia ke huhu ki a lautolu, fanogonogo ke he tau talahauaga ha lautolu, mo e ke mailoga e tau mena ne kapaletu a lautolu i ai. Ka fakakite he taha e fiafia, kia tala age ke he tagata fakailoa fou ke tohi e vala tala aoga hagaao ke he ahi atu. Fakaaoga e vala tala ia ke lagomatai a ia ke pulega e falu fakatutalaaga.

³ Tauteute ke Liu Atu: Liu fakatutala ke he liu atu fakamua, ti fakakite ke he tagata fakaako e puhala ke fifili e vala he fekau he Kautu ka futiaki e tagata he kaina. (1 Kori. 9:19-23) Tauteute tokoua e fakataitaiaga ku ke fakakite e kupu Tohi Tapu fakalataha mo e paratafa he tohi fakaako. Lafi ki ai, tauteute e huhu kua maeke ke huhu he matahiku he fakatutalaaga ke fakamatapatu aki e fakatutalaaga ka liu atu. Fakakite ke he tagata fakailoa fou e puhala ke lafi ke he hana iloilo he Kupu he Atua he tau ahi atu takitaha.

⁴ Kua lagomatai foki ke foaki ke he tagata fakaako e kamataaga mukamuka. He mole e fakafeleveia e tagata he kaina, liga pehe a koe: “Kua fiafia au ke he fakatutalaaga fakamua ha taua, ti kua liu mai tuai au ke talahau foki e vala tala he Tohi Tapu ne [totoku e mataulu].” Kua lata foki ia koe ke fakakite ke he tagata fakailoa fou e puhala ke tali ka eke ko e tagata kehe ne hau ke he gutuhala.

⁵ Makai he Liu Atu: Fakamalolo e tagata fakaako ke fakatoka e fakafifitakiaga mitaki he liu mafiti atu ki a lautolu oti kua fakakite e fiafia. Ko e moua e tau tagata he kaina kua lata mo e ahi atu tumau. Fakakite ke he tagata fakaako e puhala ke taute e fakatokaaga ke liu ahi atu, ti lagomatai a ia ke loto fakaaue e lata ke liu atu tuga ne mavehe. (Mata. 5:37) Fakamahani e tagata fakaako fou ke totonu, manamanatu, mo e fakalilifu he kumi e ia a lautolu ne tuga e tau mamoe ti feaki e fiafia ha lautolu.​—Tito 3:2.