Fakamatala e Kautu​—Ko e Kotofaaga Uho

¹ He tau aho takitaha, piliona e tau tagata he lalolagi ne aoga mai he tau foakiaga fakamokoi ha Iehova ma e moui. (Mata. 5:45) Pete ia, tokogahoa ne olioli e kotofaaga mua ue atu he fakakite e loto fakaaue ke he Tufuga ha lautolu he fakamatala e tala mitaki he Kautu he Atua. (Mata. 24:14) Tokoluga fefe e loto fakaaue hau ke he kotofaaga uho nei?

² Fakalilifu he fakamatala he Kautu e Atua mo e tamai e amaamanakiaga mo e mafola ke he tau tagata ne kua tupetupe he tau matematekelea he vaha nei. (Hepe. 13:15) Kia lautolu ne talia e fekau, kua kakano ko e moui tukulagi. (Ioane 17:3) Ko e heigoa e gahua po ke feua he lalolagi ne foaki e tau aoga pihia? Ne fakatata he aposetolo ko Paulo e loto fakaaue hana ke he fekafekauaga he puhala ne taute aki e ia. Ne onoono a ia ki ai ko e koloa uho.​—Gahua 20:20, 21, 24; 2 Kori. 4:1, 7.

³ Tokiofa e Kotofaaga Uho ha Tautolu: Ko e taha puhala ke fakakite e tautolu e loto fakaaue ma e kotofaaga ke fakamatala he mataala ke he tuaga mitaki he gahua ha tautolu. Fakatoka magaaho nakai a tautolu ke tauteute e fakataitaiaga ka aamotia e tau loto he tau tagata fanogonogo ha tautolu? Maeke nakai ia tautolu ke fakatolomaki e makaka ha tautolu he fakaaoga e tau Tohiaga Tapu mo e fakakakano mo e tau tagata? Faala nakai e tautolu e fonua ne kotofa mai ki a tautolu? Maeke nakai ia tautolu ke kamata mo e taute e fakaakoaga Tohi Tapu? Tuga e tau Kerisiano tua fakamoli, i tuai mo e mogonei, kua fakalagalaga a tautolu ha ko e onoonoaga mitaki ke he gahua nei, ti tokiofa e kotofaaga ha tautolu.​—Mata. 25:14-23.

⁴ Ka fakafehagai a koe mo e tau lauiaaga he fuakau, nakai tino malolo, po ke falu tutuaga uka, kua mafanatia ke iloa ko e laliaga fakamakai hau ke fakalataha ke he fekafekauaga kua uho lahi moli. Kua fakamalolo he Kupu he Atua a tautolu kua ofania e Iehova e tau laliaga pihia he fekafekau ki a ia, pihia mo e tau laliaga ia ne tuga kua nakai mitaki ke he fofoga he falu.​—Luka 21:1-4.

⁵ Ko e fakamatala e Kautu ko e punaaga he fiafia lahi. Ne pehe e matakainaga fifine ne 92 e tau he moui: “Ko e lilifu ha ia ke liu ono ki tua he 80 e tau he gahua tukulele ke he Atua​—kua nakai tokihala ai! Ka liu au ke moui foki, to moui e au ke he puhala taha ia, ha kua moli, ‘kua mua e mitaki he fakaalofa-totonu he Atua ke he moui.’” (Sala. 63:3) Kia tokiofa foki e tautolu e kotofaaga uho nei mai he Atua​—ko e gahua fakamatala he Kautu.

Vala 12​—Taute e Tau Fakaako Tohi Tapu Holo ki Mua

Lagomatai e Tau Tagata Fakaako ke Kamata mo e Taute e Tau Fakaako Tohi Tapu

¹ Ka kamata e tau tagata fakaako Tohi Tapu ha tautolu ke fakalataha ke he fekafekauaga he fonua, kua liga hopoate a lautolu ke he manatu ke kamata mo e taute e tau fakaakoaga Tohi Tapu ni ha lautolu. Maeke fefe ia tautolu ke lagomatai a lautolu ke feaki e aga mitaki ke he vala aoga nei he fekafekauaga ha tautolu?​—Mata. 24:14; 28:19, 20.

² Ka lata agataha e tagata fakaako Tohi Tapu ke eke mo tagata fakailoa nakai la papatiso, kua liga fita a ia he hu he Aoga Fekafekau Fakateokarasi. Ko e fakamahani ne moua e ia he tauteute mo e fakataitai e tau kotofaaga fakaako ka lagomatai a ia ke feaki e tau puhala fakaako ne lata he “ekegahua nakai fai mena ke mā ai, kua fakatokatoka fakahako e kupu moli.”​—2 Timo. 2:15.

³ Fakaako he Fakafifitakiaga Hau: Ne fakamahani e Iesu hana tau tutaki he foaki e fakaakoaga mahino mo e fakatoka e fakafifitakiaga mitaki. Ne pehe a ia: ‘Kua takitaha mo e tuga hana faiaoga a lautolu kua fakaako fakamitaki.’ (Luka 6:40) Ko e fifitaki hau ki a Iesu he fakatoka e fakafifitakiaga mitaki he fekafekauaga hau ni kua aoga. He kitekite e tagata fakaako ke he takitakiaga hau, to loto fakaaue a ia ke he foliaga hau he taute e tau ahi atu ke kamata e tau fakaako Tohi Tapu.

⁴ Fakamaama e mena ia ka foaki e tautolu e fakaakoaga, kua nakai fa mahani ke fakamaama fakamatafeiga e fakatokaaga fakaako. Kua fa mitaki lahi ke fakatata e fakaakoaga he fakaaoga taha po ke liga ua e paratafa mai he tohi fakaako. Ko e tau manatu lagomatai he taute e mena nei kua moua ai ke he lau 8 he fufuta nei mo e lau 6 he Ha Tautolu a Fekafekauaga he Kautu ia Ianuari 2002.

⁵ Ka latatonu, uiina e tagata fakaako ke o mo koe po ke taha tagata fakailoa kua lotomatala ke he falu fakaako Tohi Tapu. Kua liga fai talahauaga a ia ke he paratafa po ke kupu tohi pauaki. Ti, he kitekite, to ako lahi he tagata fakaako hagaao ke he tau fakaako Tohi Tapu holo ki mua. (Fakatai 27:17; 2 Timo. 2:2) Navanava ki a ia, ti fakatutala ke he puhala kua maeke a ia ke tolomaki ki mua.

⁶ Ko e fakamahani e tau tagata fakailoa fou ke eke mo tau faiaoga he Kupu he Atua ka tauteute a lautolu ma e “tau gahua mitaki” he kamata mo e taute e tau fakaakoaga ha lautolu ni. (2 Timo. 3:17) Ko e fiafia ha ia ke gahua auloa mo lautolu he foaki e uiina fakaalofa: “Katoa foki mo ia kua manako ki ai, kia uta noa e ia e vai he moui”!​—Fakakite. 22:17.