Kamata e Tau Fakaakoaga Tohi Tapu he Gutuhala mo e he Telefoni

1, 2. Maeke fefe he hikihiki e tautolu e fakaholoaga fakaako Tohi Tapu ha tautolu ke lagomatai e tau tagata lavelave?

¹ Kua lavelave e tau tagata he vaha nei. Ka e, tokologa agaia kua fiafia ke he tau mena fakaagaga. Lagomatai fefe e tautolu a lautolu ke fakamakona e tau manako fakaagaga ha lautolu? (Mata. 5:3, NW) Tokologa e tagata fakailoa kua maeke ke fakaako e Tohi Tapu mo e tau tagata he tau gutuhala ha lautolu po ke he telefoni. Maeke nakai ia koe ke fakalahi atu e fekafekauaga hau he puhala nei?

² Ke kamata e tau fakaakoaga Tohi Tapu, lata ia tautolu ke tauteute tuai ke fakatata e fakaakoaga Tohi Tapu he ha magaaho mitaki. Fefe mo e i fe ka taute e mena nei?

3. Ko e ha ne fakatata e fakaako Tohi Tapu he feleveia fakamua, ti maeke fefe ke taute e mena nei?

³ He Gutuhala: Ka feleveia a koe mo e tagata ne makai ke tutala ke he Tohi Tapu, veveu ke he paratafa ne kua tauteute tuai e koe, tuga e paratafa fakamua he fakaakoaga 1 he porosua Manako, ti kamata. Totou e paratafa, tutala ke he huhu, ti fakatutala ke he taha po ke ua e kupu tohi i ai. Fa mahani ke maeke ke taute e mena nei he gutuhala he lima ke he hogofulu e minuti. Kaeke fiafia e tagata ke he fakatutalaaga, taute e fakatokaaga ke fakatutala ke he taha po ke ua e paratafa he taha magaaho.​—Maeke ke moua falu manatu aoga foki he fakaaoga e puhala ke kamata e tau fakaakoaga he Ha Tautolu a Fekafekauaga ia Ianuari 2002, lau 6.

4. Liga kamata fefe e tautolu e fakaako Tohi Tapu he gutuhala ka taute e tau liu ahi atu?

⁴ Maeke foki ke fakaaoga e fakafeleveia pihia ke kamata e tau fakaakoaga Tohi Tapu ka taute e tau liu ahi atu. Ma e fakatai, liga kamata tutala a koe ke he porosua Manako mo e fakakite e higoa he Atua he fakaaoga e fakaakoaga 2, paratafa 1-2. He liu atu ka hau, liga fakatutala a koe ke he tau mena ne fakakite he Tohi Tapu hagaao ke he tau mahani ha Iehova, fakaaoga e paratafa 3-4. Ma e fakatutalaaga ka mui mai, liga tutala a koe ke he paratafa 5-6 mo e fakatino he lau 5 ke fakakite aki e puhala he fakaako e Tohi Tapu ka lagomatai a tautolu ke iloa a Iehova. Maeke e tau mena oti nei ke taute he tutu he gutuhala.

5, 6. (a) Ko e ha falu tagata ne manako ke fakaako e Tohi Tapu ke he telefoni? (e) Ko e heigoa e fakafeleveia ne maeke ia tautolu ke fakaaoga ka foaki e fakaakoaga ke he telefoni?

⁵ He Telefoni: Liga makai falu tagata ke fakaako e Tohi Tapu he telefoni ka e nakai makai ke tutala fakahako ke he tagata. Manamanatu ke he mena na ne tupu: He fakamatala he taha fale ke he taha fale, ne feleveia e matakainaga fifine mo e fifine fuata ko e matua fifine mo e lavelave he gahua. He nakai maeke e matakainaga fifine ke liu moua a ia i kaina, ne manatu a ia ke vilo ke he fifine. Ne fakamaama he fifine kua nakai fai magaaho moli a ia ke tutala ke he Tohi Tapu. Ne pehe e matakainaga fifine: “He 10 po ke 15 ni e minuti, to maeke ia koe ke ako taha mena fou, maeke foki he telefoni.” “E, kaeke taute he telefoni, mitaki!” he tali he fifine. Nakai leva, kua taute tumau e fakaakoaga he telefoni.

⁶ To liga fai nakai ia lautolu ne fa e ahiahi atu a koe ki ai kua manako ke fakaako ke he telefoni? Liga maeke ia koe ke fakaaoga e fakafeleveiaaga na kua talahau mai, po ke liga talahau e koe: “Kaeke manako a koe, maeke ia taua ke tutala Tohi Tapu he telefoni. Liga mitaki nakai e mena ia ki a koe?” He hikihiki e fakaholoaga fakaako Tohi Tapu ha tautolu ke felauaki mo e tau tutuaga he falu, to maeke ia tautolu ke lagomatai a lautolu ke ‘moua e iloilo ke he Atua.’​—Fakatai 2:5; 1 Kori. 9:23.

Talahauaga Hagaao ke he Tau Mekasini

The Watchtower Aug. 15

“He mole e momoko he galo taha, tokologa ne manamanatu ke he mena ne tupu ka mate. Manatu nakai a koe na maeke ke maama e mate? [Fakaata ma e tali.] Kua fakamaama he mekasini nei e talahauaga he Tohi Tapu ke he tuaga ka mate. Fakatutala foki ke he maveheaga he Atua ke fakaliu tu mai e tau fakahelehele ha tautolu ne mamate.” Totou Ioane 5:28, 29.

Awake! Aug. 22

“Iloa nakai e koe kua fakahigoa e fahi gahua o fenoga evaeva ko e gahua numera taha he lalolagi? [Fakaata ma e tali.] Ko e malikiti he o fenoga evaeva kua moua ai e tau mena mitaki mo e tau lekua. Kua kumikumi he mekasini nei e tau mitaki mo e kelea he fahi gahua fou ko e o fenoga evaeva. Foaki foki e falu manatu aoga ma lautolu ne o evaeva ke he lalolagi katoa.”

Ko e Kolo Toko Sepe. 1

“Ke he lalolagi he vaha nei, ko e mahani fakamoli ko e mena mitaki kua fa nava ki ai ka e tote e fakagahua. Liga mitaki nakai ka tokologa atu e tagata ka tuga e kapitiga ne fakamaama he vala nei? [Totou Tau Fakatai 17:17. Ti fakaata ma e tali.] Kua fakatutala e mekasini nei ke he aoga he mahani fakamoli ke he tau magafaoa mo e tau kapitiga ha tautolu.”

Awake! Sept. 8

“Liga kua nava a koe ke he kaufakalataha ne ha ha ke he tau tufugatia. [Talahau taha he tau fakafifitakiaga ne fakakite mai he vala tala nei.] Ka e momoko ha kua nakai kitia lahi pihia ke he tau tagata? [Fakaata ma e tali.] Kua fakamaama he mekasini nei e puhala ka nakai leva ti tamai he Atua e mafola mo e kaufakalataha ke he lalolagi ha tautolu.” Totou Isaia 11:9.