Vala 3​—Taute e Tau Fakaakoaga Tohi Tapu Holo ki Mua

Fakaaoga Lauia Mitaki he Tau Tohiaga Tapu

1. Ko e ha kua lata ia tautolu ke peehi e tau Tohiaga Tapu ka taute e tau fakaakoaga Tohi Tapu?

¹ Ko e kakano ha tautolu he taute e tau fakaakoaga Tohi Tapu ko e ‘taute tutaki’ he lagomatai e tau tagata ke maama mo e talia e tau fakaakoaga he Kupu he Atua mo e fakagahua ke he tau momoui ha lautolu. (Mata. 28:19, 20; 1 Tesa. 2:13) Ko e mena ia, kua lata ke fakamatapatu e fakaakoaga aki e tau Tohiaga Tapu. Fakamua, liga lagomatai ka fakakite age ke he tau tagata fakaako e puhala ke kumi aki e tau kupu pauaki he Tohi Tapu ni ha lautolu. Puhala fe mogoia kua maeke ia tautolu ke fakaaoga e tau Tohiaga Tapu ke lagomatai a lautolu ne pihia ke holo ki mua fakaagaga?

2. Fifili fefe e tautolu e tau kupu Tohi Tapu ka totou mo e fakatutala ki ai?

² Fifili e Tau Kupu ke Totou: Ke he tauteute tuai hau, kumi ko e felauaki fefe e tau kupu tohi takitaha mo e manatu he vala kua fakatutala ki ai, ti fifili ko e tau kupu fe hau ka veu mo e fakatutala ki ai ka fakaako. Fa mitaki ke totou e tau kupu ne fakakite e fakaveaga faka-Tohi Tapu ke he tau taofiaga ha tautolu. Maeke ke nakai totou e tau kupu tohi ne hagaao ke he tau vala tala he tupumaiaga he manatu. Kia manamanatu ke he tau manako mo e tau tutuaga he tau tagata fakaako takitaha.

3. Ko e heigoa e aoga he fakaaoga e tau huhu, mo e taute fefe e tautolu e mena nei?

³ Fakaaoga e Tau Huhu: He nakai fakamaama e tau kupu Tohi Tapu ke he tagata fakaako, toka a ia ke fakamaama atu ki a koe e tau kupu. Maeke ia koe ke fekau a ia ke taute pihia he fakaaoga fakailoilo he tau huhu. Ka maaliali e fakagahuaaga he kupu tohi, liga huhu a koe ke he puhala ka lalago he kupu e talahauaga he paratafa. He falu tutuaga, ko e huhu fakahako po ke tau fufuta huhu ka liga lata ke huhu ke he tagata fakaako ke takitaki a ia ke moua e fakahikuaga hako. Kaeke lata ke fai fakamaamaaga lafi ki luga, talahau ka oti e tali he tagata fakaako.

4. Lahi fefe e fakamaamaaga kua lata ma e tau kupu tohi ne totou e tautolu?

⁴ Kia Fakamukamuka: Kua fa mahani e tagata makaka he fana fiti ke taha ni e matatao ka fakaaoga ti lau he mena ne fakatonutonu a ia ki ai. Pihia foki, ko e faiaoga makaka kua nakai lata ke loga e tau kupu ke fakakite aki e manatu. Maeke ia ia ke talahau fakamukamuka, fakamaama, mo e fakahako e fekau. He falu magaaho, kua lata ia koe ke kumikumi ke he tau tohi faka-Kerisiano ke maama e kupu tohi mo e fakamaama fakahako ai. (2 Timo. 2:15) Ka e kalo mai he lali ke fakamaama e tau vala oti he kupu tohi he fakaakoaga. Putoia ni e mena kua latatonu ke fakamaama aki e manatu kua tutala ki ai.

5, 6. Lagomatai fefe e tautolu e tau tagata fakaako ke fakagahua e Kupu he Atua he tau momoui ha lautolu, ka e ko e heigoa ha tautolu ka kalo mai i ai?

⁵ Talahau e Fakagahuaaga Aoga: Ka latatonu, lagomatai e tagata fakaako ke kitia e puhala kua maeke e kupu tohi ke gahua fakatagata ki a ia. Ma e fakatai, ka fakatutala ke he Heperu 10:24, 25 mo e tagata fakaako ne nakaila hau ia ke he tau feleveiaaga, liga talahau e koe taha he tau feleveiaaga ti uiina a ia ke fakalataha ki ai. Ka e kalo mai he peehi ki a ia. Fakaata e Kupu he Atua ke fakaohooho a ia ke taute e tau mena kua lata ke fakafiafia a Iehova.​—Hepe. 4:12.

⁶ He taute e tautolu e poakiaga ke taute tutaki, kia taute e tautolu ke “hoko e omaoma ke he tua” he fakaaoga lauia mitaki e tau Tohiaga Tapu.​—Roma 16:26.

Talahauaga Hagaao ke he Tau Mekasini

The Watchtower Nov. 15

“Laulahi he tau tagata kua manako ke tino malolo mo e moui loa. Ka e ka maeke, to manako nakai a koe ke moui tukulagi? [Fakaata ma e tali. Ti totou e Ioane 17:3.] Kua fakatutala e mekasini nei ke he maveheaga he Tohi Tapu he moui tukulagi. Kua kumikumi foki ke he tuaga he moui ka fakamoli e maveheaga ia.”

Awake! Nov. 22

“He 20 e tau tau kua mole, kua lahi e tolomaki ki mua he maamaaga mo e tuluiaga he AIDS. Ka e, tokologa agaia e tau tagata ne hehe e iloaaga. [Fakakite e puha “Tau Tala Tuai ke he AIDS,” ti fakaata ma e manatu fakakite.] Kua fakatutala e mekasini nei ke he puhala kua maeke e tau mamatua ke puipui e tau fanau ha lautolu.” Totou Teutaronome 6:6, 7.

Ko e Kolo Toko Tese. 1

“Taha aga ne fakakehe e tau tagata mai he tau manu ko e maeke ke iloa e mena hako mai he mena hepe. Momoko ai, tokologa e tagata ne taute mena kelea. Ko e ha ati pihia ai he manatu e koe? [Fakaata ma e tali. Ti totou Ieremia 17:9 po ke Fakakiteaga 12:9.] Kua fakatutala he mekasini nei e tau mena ka lagomatai a tautolu ke iloa mo e ke taute e mena hako.”

Awake! Dec. 8

“Ko e holo ki mua he tau koloa kua nakaila hiki ia e matapatu manako he tagata ke he fakakapitiga. Ka e mailoga nakai e koe kua maeke e tau hikihikiaga he tau tagata he vaha nei ke paleko ke he feakiaga he tau fakafetuiaga fakakapitiga tata? [Fakaata ma e tali. Ti totou Tau Fakatai 18:24.] Kua fakatutala e mekasini nei ke he puhala ke moua aki mo e fakatumau e tau kapitiga moli.”