Vala 5​—Taute e Tau Fakaakoaga Tohi Tapu Holo ki Mua

Fifili e Lahi he Vala ka Fakaako

¹ He fakaako atu, ne manamanatu a Iesu ke he tau kuku he tau tutaki hana, he vagahau ki a lautolu “fakalata ke he mena kua maeke ia lautolu ke logona.” (Mareko 4:33; Ioane 16:12) He puhala pihia, ko e tau faiaoga he Kupu he Atua he vaha nei kua lata ke fuafua e lahi he vala ka fakaako he fakaakoaga Tohi Tapu. Ko e lahi he vala ka fakaako ki ai to falanaki ke he maama mo e tau tutuaga he faiaoga mo e tagata fakaako.

² Ati e Tua Malolo: Falu tagata fakaako kua lata ke ua po ke tolu e magaaho fakaako ke maama e mena ne maeke he falu tagata fakaako ke maama mafiti ke he taha e magaaho fakaako. Nakai manako a tautolu ke mahala e maamaaga mitaki he tagata fakaako ha ko e fakamafiti. Kua lata e tau tagata fakaako takitaha ke moua e fakaveaga malolo ma e tua fou hana ke he Kupu he Atua.​—Fakatai 4:7; Roma 12:2.

³ He taute e koe e fakaakoaga he tau fahi tapu takitaha, fakaaoga e ha magaaho kua lata ke lagomatai e tagata fakaako ke maama mo e talia e mena kua ako e ia mai he Kupu he Atua. Kalo mai he fakamafiti ne utakehe aki e uho lahi he tau kupu moli ne fakaako. Fakalahi e magaaho ke hagaaki ke he tau matapatu manatu mo e manamanatu ke he tau matapatu kupu tohi ne fakave ki ai e tau fakaakoaga.​—2 Timo. 3:16, 17.

⁴ Fakaholo e Fakaakoaga: He manako a tautolu ke kalo mai he fakamafiti e fakaakoaga, kua manako foki a tautolu ke kalo mai he loga e tau manatu kehe. Ka hihiga e tagata fakaako ke loa e tala ke he tau mena fakatagata, kua lata ia tautolu ke fakatoka ke tutala ke he tau mena nei ka oti e fakaakoaga.​—Fakama. 3:1.

⁵ He taha fahi, ko e alaala ha tautolu ma e kupu moli kua paleko ai ke nakai tutala tumau ka fakaako. (Sala. 145:6, 7) Ko e manatu kehe po ke mena ne tupu he falu magaaho kua aoga ke he fakaakoaga, ka e nakai manako a tautolu ke loga lahi po ke loloa e tau mena nei ke maeke ke tauhele e tagata fakaako mai he moua e iloilo tonu he tau fakaakoaga aoga he Tohi Tapu.

⁶ He lahi e vala ka taute he tau fakaakoaga takitaha, kua lagomatai e tautolu e tau tagata fakaako Tohi Tapu ke ‘o he maama a Iehova.’​—Isaia 2:5.

Aoga Mai he Vitio No Blood​—Medicine Meets the Challenge

Lahi fefe e iloaaga hau ke he tau puhala kehekehe he tau vai tului gagao ne nakai fakaaoga e toto? Kua maama nakai ia koe, na ko e heigoa foki falu puhala fagai vai mo e gahuahua fefe e tau mena ia? Kitekite e vitio nei, ti kamatamata e iloilo hau aki e tau huhu nai kua mumui mai.​—Mailoga: Ha kua putoia ke he vitio e falu gahua iihi, kua lata e tau mamatua ke fakalotomatala ka kitekite e vitio nai mo e tau fanau ikiiki.

(1) Ko e heigoa e matapatu kakano ati nakai talia he Tau Fakamoli a Iehova e fagai toto, mo e moua e fakaakoaga ia he mena fe i loto he Tohi Tapu? (2) Ka hoko ke he tuluiaga fakaekekafo, ko e heigoa e manako ha tautolu? (3) Ko e heigoa e tau tonuhia pauaki he tau tagata gagao? (4) Ko e ha kua fai kakano mo e fai fakalagoaga ke nakai talia e fagai toto? (5) Magaaho ka lahi e toto ka galo, ko e heigoa e tau mena ua fakamua he tau ekekafo ka taute? (6) Ko e heigoa e tau hagahagakelea ke he malolo tino kua putoia ai ke he fagai toto? (7) Ko e heigoa falu koloa kua maeke e tau ekekafo iihi ke fakaaoga ke fakatote hifo e galo he toto he magaaho ka iihi ai? (8) Ko e heigoa hau ne manako ke iloa hagaao ke he falu puhala he fagai vai ka e nakai fai toto? (9) Maeke nakai ke taute e tau ihiihi hagahagakelea mo e hala vihu ka e nakai fakaaoga e toto? (10) Ko e heigoa he tau ekekafo tokologa kua fiafia ke taute ma e Tau Fakamoli a Iehova, mo e ko e heigoa ka liga fakahiku ki ai ke eke mo tuaga ke leveki aki e tau tagata gagao oti?

Ke talia e ha tuluiaga nukua fakakite mai he vitio nai, ko e fifiliaga fakamoli he tagata ni a ia.​—Kikite Kolo Toko ia Iulai 1, 2004, lau 16-8, mo e Kolo Toko ia Novema 1, 2000, lau 30-1.