Vala 6​—Taute e Tau Fakaakoaga Tohi Tapu Holo ki Mua

Ka Huhu e Tagata Fakaako

¹ Ka fakatumau e fakaako Tohi Tapu, kua lata ke taute e tau fakaakoaga he Tohi Tapu ke he puhala maopoopo ka e nakai hopo he taha matakupu ke he taha. To lagomatai he mena nei e tagata fakaako ke ati e fakaveaga he iloilo tonu mo e ke holo fakaagaga ki mua. (Kolo. 1:9, 10) Ka e fa mahani e tau tagata fakaako ke huhu hagaao ke he tau matakupu loga he magaaho ka fakaako. Lata ke fehagai fefe ke he mena nei?

² Kia Fakailoilo: Ko e tau huhu hagaao ke he mena ne fakaako ki ai kua fa tali ni he mogoia. Ka tutala ke he huhu ia he magaaho fakamui he tohi ne fakaako, liga lata ke tala age ki a ia. Ka e, kaeke nakai fai matutaki e huhu ke he mena ne fakaako po kua lata ke kumikumi ke tali fakamitaki, liga lata ke fakatutala ki ai ka oti e fakaakoaga po ke he taha magaaho foki. Ne mailoga he falu he tohi hifo e huhu ka fakakite ke he tagata fakaako kua aoga e huhu hana mo e lagomatai ke kalo mai he fakamalokiloki e fakaakoaga.

³ Loga e tau fakaakoaga he Tohi Tapu kua talahau fakaku i loto he tau tohi fakaako ha tautolu. Ka e kua ka uka he tagata fakaako ke talia taha fakaakoaga po ke kuku mau ke he taofiaga hehe? Liga lata mogoia ke talahau taha fakaakoaga ne tutala lahi ke he mena ne talahau he Tohi Tapu ke he matakupu ia. Ka nakai la talitonu ia he tagata fakaako, toka e matakupu ma e taha magaaho mo e matutaki atu e fakaakoaga hana. (Ioane 16:12) He tolomaki e iloilo hana ke he Tohi Tapu mo e holo fakaagaga ki mua, liga to maama e ia e fakaakoaga nei he Tohi Tapu.

⁴ Kia Fakalatalata: Kaeke nakai iloa mitaki e tali, kia nakai tala age e tali he manatu ni hau. (2 Timo. 2:15; 1 Pete. 4:11) Fakamaama to kumikumi a koe to liu age mo e tali. Liga maeke foki ia koe ke fakaaoga e magaaho ia ke fakaako e tagata fakaako ke taute e kumikumiaga. Fakakite fakaeneene age e puhala ke fakaaoga e tau koloa kumikumi ne foaki he fakatokatokaaga ha Iehova. He puhala nei to hiku a ia ke tali ne ia e tau huhu hana.​—Gahua 17:11.

Lagomatai a Lautolu ke Moua Atu Foki e Fakamatalaaga

¹ He fakamatala e tautolu e tala mitaki, kua fa feleveia a tautolu mo e tau tagata ne nakai nonofo he matakavi ha tautolu, po kua vagahau e vagahau kehe, pihia mo e vagahau matalima. Mo e falu ne fa tutala mo tautolu ke he Tohi Tapu kua liga hiki ke he taha matakavi. To taute fefe e tautolu e fakaholoaga ma lautolu ia ke moua atu foki e fakamatalaaga? He fakaaoga e laupepa Please Follow Up (S-43).

² Kua fa fanogonogo e tau tagata ke he tala mitaki kaeke tutala ke he vagahau ni ha lautolu. (Gahua 22:1, 2) Ti ka feleveia mo e tagata ne kehe e vagahau, lata ia tautolu ke fakapuke e laupepa pihia foki ka nakai fakakite he tagata e fiafia ke he fekau he Kautu. Ka e, he matakavi ne loga ai e puke tagata vagahau kehe ne fakamatala tumau ki ai ke he vagahau ni ha lautolu, kua liga nakai lata ke fakapuke e laupepa kaeke kua fakakite e fiafia.

³ Fakapuke he Laupepa: Kia fakailoilo ke moua e higoa, kaina, mo e numera telefoni he tagata. Fakakite e tuaga he fiafia, a fe ka moua ai e tagata, ko e tohi fe ne toka hifo po ke ole mai, mo e vagahau ne maama lahi he tagata. Ka oti e fakapuke e laupepa, ti age fakamafiti ke he tohikupu he fakapotopotoaga ka fakaholo age ke he fakapotopotoaga po ke matakau kua lata.

⁴ Fakaholo Age e Laupepa: Kaeke nakai iloa he tohikupu ko e fakapotopotoaga po ke matakau fe kua lata ke moua e laupepa po kua nakai fai puha meli a lautolu, lata ia ia ke telefoni atu ke he Laulau Fekafekau he la ofisa ke moua e tau fakailoaaga ne manako.

⁵ Ka moua he fakapotopotoaga po ke he matakau e laupepa fakapuke Please Follow Up, kua lata ke taute e fakaholoaga ke aahi fakamafiti e tagata. He taute fakamakutu ai e tautolu, kua mauokafua mogoia a tautolu to hafagi e Iehova e tau loto ha lautolu “ne kotofa ke he moui tukulagi.”​—Gahua 13:48.