Lagomatai he Fakamatala a Tautolu ke Fakauka

¹ Kua tomatoma he Kupu he Atua a tautolu ke “tafepoi fakauka a tautolu ke he poitufi kua toka ki mua ha tautolu.” (Hepe. 12:1) Tuga ni e tagata poitufi ne fakauka ke mua, ti kua lata ia tautolu ke fakauka ke moua e palepale he moui tukulagi. (Hepe. 10:36) Lagomatai fefe he fekafekauaga faka-Kerisiano a tautolu ke fakauka fakamoli ke hoko ke he fakaotiaga?​—Mata. 24:13.

² Fakamalolo Fakaagaga: Ko e fakapuloa ha tautolu he maveheaga mua ue atu he Tohi Tapu ke he lalolagi fou kua lagomatai a tautolu ke fakamata tumau e amaamanakiaga ha tautolu ni. (1 Tesa. 5:8) Ka fakalataha tumau a tautolu he fekafekauaga he fonua, kua ha ha ia tautolu e magaaho ke fakailoa e kupu moli ne ako e tautolu mai he Tohi Tapu. Ha ha ia tautolu e magaaho ke lalago e tua ha tautolu, ka lagomatai a tautolu ke fakamalolo fakaagaga.

³ Ke maeke ke fakaako lauia mitaki e falu, kua lata ke maama mahino mua e tautolu e kupu moli he Tohi Tapu. Taute e tautolu e kumikumiaga mo e manamanatu hokulo ke he vala tala. Ko e laliaga fakamakutu ne foaki e tautolu kua fakahokulo e iloilo, malolo he tua, mo e fakamoui olaola fakaagaga a tautolu. (Fakatai 2:3-5) Ti, he tutuli a tautolu ke lagomatai e falu, kua fakamalolo ne tautolu a tautolu.​—1 Timo. 4:15, 16.

⁴ Ko e fakalataha fakamakai ke he fekafekauaga ko e vala aoga he “tapulu tau katoa he Atua,” ne kua lata mo tautolu ke maeke ke tutu mauokafua he totoko e Tiapolo mo e tau temoni. (Efeso 6:10-13, 15) He lavelave a tautolu he gahua tapu kua lagomatai a tautolu ke tokaloto e hagaaki ke he tau mena atihake mo e ke fakamamao neke fakailaila he lalolagi ha Satani. (Kolo. 3:2) He fakaako e tautolu e falu ke he tau puhala a Iehova, kua fakamanatu tumau ki a tautolu e lata ha tautolu ni ke fakatumau e mahani kua tapu.​—1 Pete. 2:12.

⁵ Foaki he Atua e Malolo: Fakahiku, ko e fakalataha ha tautolu ke he gahua fakamatala kua fakaako a tautolu ke mauokafua ia Iehova. (2 Kori. 4:1, 7) Ko e fakamonuina moli! Ko e feaki ha tautolu a falanaki pihia kua tauteute a tautolu ke nakai ni fakakatoatoa e fekafekauaga ha tautolu ka e pihia foki ke fahia he tau tutuaga ne fehagai mo tautolu he moui. (Filipi 4:11-13) Moli, he ako ke mauokafua katoatoa ia Iehova ko e kei ke he fakauka. (Sala. 55:22) He tau puhala loga, kua lagomatai he fakamatala a tautolu ke fakauka.

Vala 10​—Taute e Tau Fakaakoaga Tohi Tapu Holo ki Mua

Fakamahani e Tau Tagata Fakaako ke he Fekafekauaga he Taha Fale ke he Taha Fale

¹ Ka fifili he tau motua kua lata e tagata fakaako Tohi Tapu mo tagata fakailoa nakaila papatiso, maeke ia ia ke kamata ke fakalataha mo e fakapotopotoaga ke he gahua fakamatala. (Kikite e Organized to Do Jehovah’s Will, lau 79-81.) Lagomatai fefe e tautolu e tagata fakaako ke hokotia ke maeke ke fakamatala he taha fale ke he taha fale?

² Tauteute Tokoua: Nakai fai mena ke hukui aki e mautauteute mitaki. Fakakite ke he tagata fakaako e mouaaga he tau fakataitaiaga ne foaki mai he Ha Tautolu a Fekafekauaga he Kautu mo e tohi Reasoning, ti lagomatai a ia ke fifili e mataulu mukamuka kua aoga ma e fonua he matakavi. Mai he kamataaga, fakamalolo a ia ke fakaaoga e Tohi Tapu he fekafekauaga hana.​—2 Timo. 4:2.

³ Ko e tau magaaho fakamahani kua latatonu mo e tagata fakailoa fou. He fatiaki he tagata fakaako e fakataitaiaga, fakakite ki a ia e puhala ke taute fakailoilo e tali ne aga mau ke he fonua. (Kolo. 4:6) Fakamafana ki a ia kua nakai lata e fekafekau Kerisiano ke iloa e tali ke he tau huhu takitaha he tagata he kaina. Kua mitaki lahi ke taute e tau huhu ia he tala age to taute e kumikumiaga ti liu ke fakatutala fakalaulahi e matakupu.​—Fakatai 15:28.

⁴ Fakamatala Tokoua: Ko e magaaho fakapa ne fakalataha e tagata fakaako ke he fekafekauaga he taha fale ke he taha fale, kia toka a ia ke kitekite he taute e koe e fakataitaiaga ne kua tauteute tokoua e mua. Mole atu ti fai vala foki a ia. He falu magaaho, kua mitaki ke taute he tagata fakailoa fou e tama vala he fakataitaiaga, tuga e totou po ke talahau ke he kupu tohi. Manamanatu ke he aga fakatagata mo e maamaaga he tagata fakaako. (Filipi 4:5) Foaki tumau e navanava he fakatumau a koe ke fakamahani a ia ke he tau fahi kehekehe he gahua fakamatala.

⁵ Kua aoga ke lagomatai e tagata fakaako fou ke fakatu e setulu tumau he fakalataha ke he fekafekauaga, he tau fahitapu takitaha ka maeke. (Filipi 3:16) Pulega ke gahua tokoua he fonua, ti fakamalolo a ia ke gahua mo e falu ne makai. Ko e fakafifitakiaga mo e feoakiaga ha lautolu ka lagomatai a ia ke feaki e puhala mo e moua e olioli he fakamatala he taha fale ke he taha fale.