Puhala ke Tauteute e Fakataitaiaga he Mekasini

1. Ko e ha kua mitaki ke tauteute ni he tagata e fakataitaiaga haana he mekasini ka e nakai ako manatu e fakataitai kua foaki mai he Ha Tautolu a Fekafekauaga he Kautu?

¹ ‘Ko e ha kua lata ia tautolu ke tauteute e tau fakataitaiaga he mekasini,’ he liga manatu e koe, ‘ha kua tohi tumau e tau fakataitaiaga he tau fufuta takitaha he Ha Tautolu a Fekafekauaga he Kautu?’ Pete kua tokologa ne mailoga kua lagomatai lahi e tau fakafeleveia fakataitai nei, kua lata agaia ni ke fai tauteuteaga fakatagata. Ko e fakataitaiaga ne lauia mitaki he taha matakavi to liga nakai gahua mitaki he taha matakavi. Ko e mena ia, kia nakai logona hifo e tautolu e peehi ke lata ni ke fakaaoga e tau kupu ne tūtū he tau fakafeleveia fakataitai. Pete foki ka fifili a tautolu ke fakaaoga e fakafelevia fakataitai, kua mua e mitaki ke talahau e tau manatu ke he tau kupu ni ha tautolu.

2. Ko e heigoa ne putoia he fifili e koe e vala tala ka fakakite?

² Fifili e Vala Tala: He totou mua e koe e mekasini, fifili e vala tala kua felauaki mo e fonua haau mo e fiafia pauaki a koe ki ai. Ko e mauokafua mo e alaala haau he magaaho ka tutala ke he vala tala ka fakaohooho e tagata he kaina ke manako foki ke totou ki ai. Pete he liga fakakite e koe e vala tala ne fiafia lahi e tau tagata he matakavi ki ai, kia lali ke iloa mitaki e falu vala tala ne toe he mekasini. To fakaatā he mena nei a koe ke hikihiki e fakafeleveia haau ka feleveia mo e tagata ne fiafia lahi ke he taha matakupu foki.

3. Ko e vahega fakafeleveia fe ne fakaaoga e koe ti moua e tau fua mitaki lahi?

³ Talahau e Hūhū: Ka oti ia, ti tauteute fakamitaki e tau kupu hafagi haau. Kua aoga lahi e fakafeleveia haau. Liga lagomatai ke hūhū ke he tagata he kaina e hūhū fakalagalaga manatu ke fakaohooho a ia ke fiafia ke he vala tala kua fifili e koe ke fakakite. Kua fa lauia mitaki e tau hūhū ke fakakite e manatu. Kalo mai he hūhū ke he taha mena ka taute e tagata he kaina ke fuafua kelea po ke totoko.

4. Ko e heigoa e tau aoga he totou e kupu tohi ke he tagata he kaina ka maeke he tau tutūaga?

⁴ Totou e Kupu Tohi: Fakahiku aki, fifili e kupu tohi ke totou ka maeke he tau tutūaga he tagata he kaina, liga ko e kupu tohi he vala tala ka fakakite e koe. Ko e totou he kupu tohi ka lagomatai e tagata he kaina ke kitia ko e fekau ha tautolu kua mai he Kupu he Atua. (1 Tesa. 2:13) To eke foki e kupu tohi mo fakamatala ki a ia pete he nakai talia e ia e tau mekasini. Ko e falu ne fakalagalaga e fiafia he tagata he kaina he totou mua e kupu tohi ato talahau e hūhū pauaki. Liga hafagi e koe e kupu tohi he pehē, “Manako au ke iloa ko e heigoa e manatu haau ke he talahauaga he kupu Tohi Tapu nei.” Ti fakakite ke he tagata e vala tala ne hagaao ki ai he mekasini, ti talahau fakakū taha manatu ke fakalagalaga fakalahi e fiafia haana ato foaki e mekasini.

5. Ko e heigoa e tau takitakiaga aoga kua lata ke tokaloto e koe ka tauteute e fakataitaiaga he mekasini?

⁵ Kua nakai fai matafakatufono kikili hagaao ke he tau mena ke talahau ka foaki e tau mekasini. Ko e mena fa mahani, kua mitaki lahi ke mukamuka mo e fakakū e fakataitaiaga haau. Fakaaoga e fakafeleveiaaga ne fiafia a koe ki ai mo e moua e tau fua mitaki. Hagaaki ke he aoga lahi he tau mekasini, mo e kia alaala. Ka tauteute fakamitaki a koe, to mua atu e lauia mitaki haau ka foaki he Ko e Kolo Toko mo e Awake! ki a lautolu kua “kotofa ke he moui tukulagi.”​—Gahua 13:48.

Talahauaga Hagaao ke he Tau Mekasini

The Watchtower Nov. 15

“Ha kua lahi mahaki e nakai fakamooli he lalolagi, kua manamanatu falu, ‘Ko e ha ne fakamakamaka ai au ke taute e mena hako?’ Kua fa pihia nakai e logonaaga haau? [Fakaatā ma e tali.] Mailoga e tau kupu mafanatia nei. [Totou e Tau Fakatai 2:21, 22.] Kua fakamaama he mekasini nei e kakano aoga lahi ne lata ai ke mahani hakohako.”

Awake! Nov.

“Ko e falu tagata kua manatu ko e Atua ne lago ki ai e tau mena oti ne tutupu. Ka tupu taha matematekelea ne pehē a lautolu, liga fai kakano mitaki e Atua ati taute pihia ai. Fēfē e manatu haau? [Fakaatā ma e tali. Ti totou e Iakopo 1:13.] Fakakite mai he mekasini nei e talahauaga he Tohi Tapu hagaao ke he tupumaiaga he matematekelea mo e tau mena he Atua hane taute ke utakehe aki.”

Ko e Kolo Toko Tese. 1

“Kua aoga e fakaalofa ke he fiafia mo e malolō ha tautolu. Ka e, ke he tau tagata tokologa, kua uka ke moua e fakaalofa mooli. Ko e ha he manatu e koe ati pihia ai? [Fakaatā ma e tali.] Taha puhala ke moua e fakaalofa mooli ko e fakakite e fakaalofa nakai fulukovi ke he falu. Kua fakatutala e mekasini nei ke he mena ne putoia ke he fakaalofa ia.” [Totou e Mataio 5:43-45.]

Awake! Dec.

“Ko hai ka fifili e koe ko e tagata mua ue atu ne moui? [Fakaatā ma e tali.] Tokologa ne hagaao ki a Iesu ko e tagata mua ue atu. Mailoga la e tau mena ka taute e ia ma e lalolagi ko e Pule he Kautu he Atua. [Fakakite e fakatino he lau 8-9, ti totou taha e kupu tohi ne tu ai.] Kua fakatutala e mekasini nei ke he puhala mo e magaaho ka fakakatoatoa e Iesu e mena nei.”