“Aua Neke Noa ha Mutolu a Tau Kupu mo e . . . Fakamasima ke he Masima”

1. Ko e heigoa e kakano ke ‘fakamasima ke he masima e tau kupu ha tautolu’?

¹ “Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolo. 4:6) Ko e fakamasima ke he masima e tau kupu ha tautolu kua kakano ke fifili e tau kupu hako mo e talahau ke he puhala ke maeke e tau kupu ha tautolu ke talia he tagata fanogonogo. Kua mua e mitaki ke taute pihia ka fakalataha ke he fekafekauaga.

2. Maeke fēfē ia Iesu ke fakamatala ke he fifine Samaria?

² Fakafifitakiaga ha Iesu: He okioki he tapa vaikeli, ne vagahau mua a Iesu ke he fifine Samaria ne fina atu ke utu vai. He fakatutala a laua, ne lagaloga e talahau he fifine e tau manatu ne fakakite e matafī leva lahi he tau Iutaia mo e tau Samaria. Ne fakakite foki he fifine na talitonu a ia ko e mena tutupu mai e tau Samaria ia Iakopo, ka kua manatu malolō e tau Iutaia na tutupu mai e tau Samaria he tau tagata motu kehe. He nakai fakafetoko ke he tau talahauaga he fifine, ne taute e Iesu e fakatutalaaga ke holo mitaki. Ko e fua, ne maeke ia Iesu ke fakamatala ti lagomatai ai ke he fifine mo e tau patu he maaga.​—Ioane 4:7-15, 39.

3. Maeke fēfē ia tautolu ke muitua ke he fakafifitakiaga ha Iesu ka haia he fekafekauaga?

³ He fakamatala a tautolu, kua lata ke tokaloto e kakano​—ke “ta mai e tala ke he tau mena mitaki.” (Roma 10:15) Kua manako a tautolu ke folafola ke he tagata he kaina e manatu mai he Tohi Tapu ne mitaki mo e atihake, ka e nakai fakahihiga ki a ia kua totoko e tautolu e tau mena ne talitonu fakatagata a ia ki ai. Kaeke ke fakakite e ia e manatu hepe, kua nakai lata mogoia he tali ha tautolu ke totoko ki ai. Kua fai mena nakai he talahauaga haana ne kua talia a tautolu ki ai po ke fakaaoga mo matapatu ke nava mooli ki ai? Liga maeke ia tautolu ke fakahū mai e kupu tohi he pehē: “Ka kua manamanatu nakai a koe neke lata mo e mena nei?”

4. Ko e heigoa kua lata ia tautolu ke taute ka vale e tagata he kaina?

⁴ Ka e kua ka vale e tagata he kaina po ke kitia maaliali ko e fia taufetoko ni? Kua lata ia tautolu ke matutaki ke fakatātā e mahani totonu mo e mahani molū ke he tau aga mo e tau kupu ha tautolu. (2 Timo. 2:24, 25) Kaeke ke nakai manako e tagata ke he fekau he Kautu, kua mitaki ni ke toka fakalotomatala e kaina ia.—Mata. 7:6; 10:11-14.

5. Maeke fēfē e taha matakainaga fifine ke moua e tau fua mitaki he tali totonu atu?

⁵ Tau Fua Mitaki: Magaaho ne lali e matakainaga fifine ke fakamatala ke he tuutakaina haana, ne vale e fifine ti kupu kelea ki a ia. Ke he puhala totonu, ne pehē e matakainaga ha tautolu: “Fakamolemole ni kua manatu pihia a koe. Mafola e aho.” Ua e faahi tapu he mole, ne nokonoko he fifine e gutuhala he matakainaga fifine, ne fakamolemole ai ke he mahani haana, ti talahau kua makai a ia ke fanogonogo ke he manatu he matakainaga fifine. Ko e tali totonu kua fa moua e tau fua mitaki!​—Fakatai 15:1; 25:15.

6. Ko e ha ne aoga ma tautolu ke fakaaoga e tau kupu fakamasima he fekafekauaga?

⁶ Kia lali ke fakaaoga e tau kupu fakamasima he fakapuloa e tala mitaki. Pete ni he nakai manako e tagata he kaina, to liga makai lahi a ia ke fanogonogo ka aahi atu e Tau Fakamoli a Iehova ke he kaina haana he taha magaaho ne toe.