Veveheaga 18

Holo Hifo ha Ioane, Holo Hake ha Iesu

MOLE atu e Paseka he vaha tau tupu he 30 V.N., ne toka e Iesu mo e hana tau tutaki a Ierusalema. Ka e taha e mena, ne nakai liliu a lautolu ke he tau kaina ha lautolu i Kalilaia ka e o ke he motu i Iutaia, mo e taute e tau papatisoaga. Ko Ioane ko e Papatiso ha ne fa e taute e gahua taha ia ko e liga taha ia e tau, mo e ha ha foki ia ia agaia e tau tutaki ne fakalataha mo ia.

Ko e moli, ne nakai taute e Iesu ha papatisoaga, ka e taute he tau tutaki hana i lalo hifo he hana takitakiaga. Kua tatai ne papatisoaga ha lautolu mo e ha Ioane, ko e fakamailoga he tokihala he tau Iutaia mai he tau hala ke he maveheaga he Fakatufono he Atua. Ka e taha e mena, mole atu hana liu tu mai, ne fakaako e Iesu hana tau tutaki ke taute e papatisoaga ne kehe mai. Ko e papatisoaga he Kerisiano he vaha nei ko e fakamailoga he tukuleleaga he tagata ke fekafekau ki a Iehova ko e Atua.

Ke he magaaho fakamua he gahua fakamatala ha Iesu, ko laua tokoua mo Ioane, pete ni he gahua kehekehe, ka kua fakaako mo e papatiso ki a lautolu ne tokihala. Ka e mahekeheke e tau tutaki ha Ioane mo e kono ki a ia hagaao ki a Iesu: “Rapai na e, . . . kitiala, ha ne papatiso e ia, kua o atu foki kia ia e tau tagata oti kana.”

Ne nakai mahekeheke, ka e fiafia a Ioane he kautu a Iesu mo e manako foki a ia ke fiafia hana tau tutaki. Ne fakamanatu e ia ki a lautolu: “Ko mutolu ni ke talahau au, ne pehe atu au, Nakai ko e Keriso au nai; ka kua fakafano mai ni au, ke mua kia ia.” Ti fakaaoga mogoia e ia e fakatai fulufuluola: “Ko e tagata hana e hoana, ko e kitofaihoana a ia; ka ko e kapitiga he kitofaihoana, kua tu mai mo e fanogonogo kia ia, kua fiafia lahi ke he leo he kitofaihoana; ko e haia foki kua katoatoa ai haku a fiafia nai.”

Ko Ioane, ko e kapitiga he Kitofaihoana, ne fiafia ke he ono e mahina fakamua he magaaho ne fakafeleveia e ia hana tau tutaki ki a Iesu. Ha ha i ai pauaki a lautolu ne amanaki ke eke mo falu he vahega kitofaitane ha Iesu he lagi, ko lautolu ko e tau Kerisiano fakauku ke he agaga. Ne manako foki a Ioane ki a lautolu hana tau tutaki ke he magaaho ia ke mumui ki a Iesu, ha ko e kakano haia hana ke tauteute e puhala ke kautu e feua ha Keriso. Tuga he fakamaama e Ioane ko e Papatiso: “Kia tupu mau a ia ke lata ai; ka ko au nai, ko e au atu ne fai he tote au.”

Ko e tutaki fou ha Iesu ko Ioane, ko e tutaki fakamua foki ia ha Ioane ko e Papatiso, ne tohi hagaao ke he tupumaiaga ha Iesu mo e tuaga uho Hana ko e fakamouiaga he tau tagata, ne pehe: “Ko ia ne haele mai mai luga, kua mua a ia ke he tau mena oti. . . . Kua fakaalofa e Matua ke he Tama, kua tuku age foki e tau mena oti ke he hana lima. Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.”

Ne nakai leva he fakatutala a Ioane ko e Papatiso ke he holo hifo he hana tau gahua, ti tapaki he Patuiki ko Herota a ia. Ne uta e Herota a Herotia, ko e hoana he matakainaga hana ko Filipo, mo hoana hana, ti ko e magaaho ne talahau e Ioane ke he tau tagata e tau mahani kelea hana, ne tuku e Herota a ia ke he fale puipui. Ne logona e Iesu kua tuku a Ioane ke he fale puipui, ne toka e ia a Iutaia mo e hana tau tutaki ka e fenoga ki Kalilaia. Ioane 3:​22–​4:3; Gahua 19:4; Mataio 28:19; 2 Korinito 11:2; Mareko 1:14; 6:​17-20.

▪ Ko e heigoa e kakano he papatisoaga ne taute i lalo he takitakiaga ha Iesu he magaaho fakamua he hana liu tu mai? Mo e magaaho fakamui he hana liu tu mai?

▪ Fakakite fefe e Ioane e nakai fai kakano e tau kono he hana tau tutaki?

▪ Ko e ha ne tuku ai a Ioane he fale puipui?