Veveheaga 24

Ko e Kakano ne Hau a Iesu ke he Lalolagi

KO E aho ha Iesu i Kapanaumi mo e hana a tau tutaki toko fa ne lavelave lahi, fakahiku ke he tau tagata Kapanaumi ne ta mai ki a ia ha lautolu a tau tagata gagao oti ke fakamalolo ke he magaaho afiafi. Ne nakai fai magaaho ma hana ni.

Ka ko e magaaho nei ko e magaaho pogipogi he aho hake. Pete ni he pouli agaia, ne matike a Iesu mo e fano tokotaha ki fafo. Ne finatu a ia ke he mena ogoogo noa ke maeke ia ia ke liogi tokotaha ke he hana Matua. Ka e ku e magaaho tokotaha ha Iesu ha ko e magaaho ne mailoga e Peteru mo e falu kua galo a ia, ne o atu a lautolu ke kumi a ia.

Ko e magaaho ne moua e lautolu a Iesu, ne pehe a Peteru: “Ha ne kumi he tau tagata oti a koe.” Ko e tau tagata Kapanaumi ne manako ke nofo a Iesu mo lautolu. Ne lahi e fakaaue ha lautolu ke he tau mena ne taute e ia ma lautolu! Ka ko e kakano kia a ia he hau a Iesu ke he lalolagi ke taute fakamana e tau fakamaloloaga? Ko e heigoa hana talahauaga ke he mena nei?

Ke he taha fakamauaga he Tohi Tapu, ne tali e Iesu hana tau tutaki: “Kia o a tautolu ke he tau māga ne tata mai, ke fakamatala atu e au ki ai e vagahau mitaki, ha ko e mena ia ne hau ai au.” Pete ni he fakaohooho he tau tagata a Iesu ke nofo, ne tala age a ia ki a lautolu: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.”

E, ne hau pauaki a Iesu ke he lalolagi ke fakamatala hagaao ke he Kautu he Atua, ke maeke ke fakatokoluga e higoa he hana Matua mo e fakamalolo tukulagi e tau gagao he tau tagata. Ka e taha e mena, ke fakamoli ko e fakafano mai a ia he Atua, ne taute e Iesu e tau fakamaloloaga fakamana. Ko e puhala taha ia ni ha Mose, he tau senetenari fakamua, he taute e tau mana ke fakamoli aki ko ia ko e fekafekau he Atua.

Ko e magaaho nei, he toka e Iesu a Kapanaumi ke fakamatala ke he falu maga, ne fakatauo hana tau tutaki toko fa mo ia. Ko lautolu toko fa nei ko Peteru mo e hana matakainaga ko Aneterea, mo Ioane mo e hana matakainaga ko Iakopo. Liga manatu e koe, ko e faahi tapu fakamua, ne uiina a lautolu mo tau kau gahua fakamua ha Iesu.

Ko e fenoga fakamatala ha Iesu i Kalilaia mo e hana a tau tutaki toko fa kua lahi mahaki e kautu! Ko e moli, ko e hokotaki ke he hana tau gahua ne holofa ti hoko atu ki Suria katoa. Ko e moto tagata tokologa mai Kalilaia, Iutaia, mo e fakalava atu ke he Vailele Ioritana ne mumui ki a Iesu mo e hana tau tutaki. Mareko 1:​35-39; Luka 4:​42, 43; Mataio 4:​23-25; Esoto 4:​1-9, 30, 31.

▪ Ko e heigoa ne tupu he pogipogi ne mole atu e aho lavelave lahi ha Iesu i Kapanaumi?

▪ Ko e ha ne fakafano mai a Iesu ke he lalolagi, mo e ko e heigoa e kakano he hana a tau mana?

▪ Ko hai ne fakatauo mo Iesu he hana fenoga fakamatala i Kalilaia, mo e ko e heigoa e tali ke he tau gahua ha Iesu?