Tau Mena Tutupu Mai he 2011 Yearbook
POLIVIA
Nakai Nokonoko a Ia
Lau 55, paratafa 1-2
Ko Miriam ne nofo i Polivia, ne taha e faahi tapu he liogi ke he Atua. Pehe e liogi haana: “Fakamolemole lagomatai au ke iloa a koe, ka e nakai manako au ke lagomatai mai he Tau Fakamoli a Iehova. Nakai manako au ke nokonoko mai e lautolu haaku gutuhala.”
He matahiku he faahi tapu ia, ne tagi e telefoni. Ko Candy, ko e paionia pauaki, ne ole ke fina atu he kavi ke he taha e tula ke uta e tau mekasini ha tautolu ki a Miriam. Ne talia e ia. Nakaila katoa e tula ka kua hoko atu a Candy ke he gutuhala haana. Ne amanaki ni a Miriam ti hafagi e gutuhala ti poaki ki a Candy ke hau ki loto ti nofo hifo. Ti kamata a Miriam ke fano viko he lotofale mo e lue e ulu, maaliali ai kua tupetupe lahi a ia. Ne huhu a Candy ki a ia ko e heigoa e lekua. “Ofo lahi mahaki au!” he talahau e Miriam. “Kua molea e faahi tapu he liogi au ke he Atua ma e takitakiaga mo e lagomataiaga haana, ka e fakamahino e au he tau liogi haaku kua nakai manako au ke moua mai e lagomataiaga he Tau Fakamoli a Iehova ne fa nokonoko tumau e gutuhala haaku! Ti hea mai a koe he telefoni ka e ai nokonoko! Tali he vilo mai a koe ke he taha e tula kua mole, ko e feiga au he liogi ke he Atua ke ua hau a koe ke ahiahi mai. Ka e hoko mai na koe! Kua ofogia au! Maaliali ni kua manako a ia ki a mutolu, ko e Tau Fakamoli a Iehova, ke lagomatai au.” Ne kamata agataha e fakaako Tohi Tapu.
PAPUA NIU KINI
Lau 138, paratafa 3-4
He paionia i Hula, ko Don mo Shirley Fielder ne kamata e fakaako Tohi Tapu mo Alogi mo Renagi Pala. “Ko e tagata kaihā a Alogi ti tau tumau a ia mo e falu,” he tohi e Don. “Ne matematekelea a ia mai he gagao ne fakateteki e tino haana, ti ko e vala he gutu haana kua popopopo he gagao ia. Ko ia mo e hoana haana ne gau foki e tau fua pitolo, ti ko e tau avaava he tau nifo ha laua kua patokitoki ne fa kula toto. Ko Alogi ko e tagata fakahiku ka amanaki e taha ke futiaki atu ke he kupu mooli. Ka e, ko ia mo e hoana haana ne fiafia ke he kupu mooli ti o mai ke he tau feleveiaaga ha tautolu, ti nonofo fakatekiteki ai i tua.
“Molea e ono e mahina he mole,” he talahau e Don, “ne kitia e maua e hikiaga lahi mahaki ia Alogi. Ne oti haana kaihā, latau, mo e taufetoko, ti fakameā fakatino e ia a ia mo Renagi ti kamata ke fakalataha ke he tau feleveiaaga. Ne kamata foki a laua ke tala age e tala mitaki ke he falu. Ti eke a laua mo e tokologa foki mo tau tagata fakailoa fakamua he matakavi ko Hula.”