Veveheaga 45

Nakai Fakaai mo Tutaki

KO E mena matakutakuina ke kitia he hake a Iesu ke he mataafaga! Tokoua e tagata vale foliga kehe ne o mai he tanuaga mo e tafepoi mai ki a ia. Ne huhu e tau temoni ia laua. Ha ko e taha mai ia laua ne vale lahi mo e kua leva e matematekelea he heketia he tau temoni, ko e mena haia ne onoono lahi ki a ia.

Kua leva lahi e fakaalofa he tagata nei he nofo telefua he tau tukuaga. Ne matutaki ke he aho mo e po, he tauhea fakatutu mo e helehele e ia a ia aki e tau maka. Ne lahi e vale hana ti nakai fai tagata ne malolo ke fano he hala ia. Ne lagaloga e lali ke taute lagatau ke lili a ia, ka e mutumutu kehe e ia e tau toua lapatoa mo e moumou e tau lapatoa mai he hana a tau hui. Nakai fakai taha ke fai malolo ke kautu ki a ia.

Ko e magaaho ne hau e tagata ki a Iesu mo e fakaveli ke he hana tau hui, ko e tau temoni ne huhu ia ia ne fakavagahau fakalahi a ia: “Ko e heigoa kia hāu kia au nai, Iesu na e, ko e Tama he Atua Tokoluga Ue Atu? kua tala atu fakamakamaka e au kia koe ke he higoa he Atua, aua neke fakamamahi mai e koe au.”

“Hau a ki fafo he tagata, ko koe ni ko e agaga kelea,” he talahau tumau e Iesu. Ka e huhu age a Iesu: “Ko hai ha higoa?”

“Ko Lekeono haku a higoa, ko e mena tokologa a mautolu,” e tali. Kua fiafia e tau temoni he kitia e tau mamahi ha lautolu ne huhu ai, maaliali e fiafia he huhu auloa ke he tagata he agaga pogite tokologa pihia. Ka e he magaaho ne feleveia mo Iesu, ne olelalo a lautolu ke ua vega a lautolu ke he pahua. Ne liu kitia foki e tautolu e malolo lahi ha Iesu; kua maeke ia ia ke pule ke he tau temoni vale lahi. Ne fakakite foki he mena nei e mailoga he tau temoni e ha lautolu a tuku he pahua mo e ha lautolu a takitaki, ko Satani ko e Tiapolo, ko e fakafiliaga fakahiku he Atua ma lautolu.

Ko e fuifui puaka liga ko e 2,000 ne totolo tata mai he mouga. Ti pehe e tau temoni: “Ati fekau atu a e koe a mautolu ke he tau puaka ke heke ai a mautolu.” Ko e moli e ha ha he tau temoni e fiafia kelea he fakamamahi e tau tino ne huhu ai a lautolu. Ko e magaaho ne fakaata e Iesu a lautolu ke huhu he tau puaka, ne tafepoi oti e 2,000 ti hohopo hifo he kaukau papati ti tomo ki tahi.

Ko e magaaho ne kitia e lautolu ne leveki e tau puaka e mena nei, ne o fakamafiti a lautolu ke tukuogo e tala ke he maga mo e tau kaina. Ne o mai e tau tagata ke kitia e mena ne tupu. Ko e magaaho ne hohoko mai a lautolu, ne kitia e lautolu e tagata ne o kehe mai ai e tau temoni. Kua tui e tau mena tui, mo e matala hana a loto, hane nofo he tau hui ha Iesu!

Ko lautolu ne kitia mata ne tukuogo e tala ke he puhala ne fakamalolo ai e tagata. Ne talahau foki e lautolu ke he tau tagata e matakehe he mamateaga he tau puaka. Ko e magaaho ne logona he tau tagata e mena nei, ne hoko e matakutaku lahi ki a lautolu, mo e fakamakamaka a lautolu ke fekau a Iesu ke fano kehe he maga ha lautolu. Ne talia e ia mo e heke a ia he foulua. Ne ole a ia ne huhu ai e tau temoni fakamua ki a Iesu ke fakatauo auloa. Ka e pehe ni a Iesu ki a ia: “Fano a a koe ke he hau a fale, mo e hau a faoa, ti fakamatala e koe kia lautolu e tau mena loga kua eke e Iehova kia koe, mo e hana fakaalofa kia koe.”

Na fa mahani a Iesu ke fakaako a lautolu ne fakamalolo e ia ke ua tala age ke he ha taha, ha kua nakai manako a ia ke iloa he tau tagata ha ko e tau hokotakiaga ofoofogia. Kua lata tonu ni e fakakeheaga nei ha ko ia ne malolo mai he hu temoni ka eke mo talahau fakamoli ke he tau tagata ne nakai liga ke hoko a Iesu ki ai ke he magaaho ia. Ko e taha mena foki, ko e fakamoliaga e tagata ke he malolo ha Iesu ke taute e tau gahua mitaki, ke totoko aki e tau hokotaki pikopiko ke he tau puaka ne galo.

Ha ko e omaoma ke he tau poakiaga ha Iesu, ne fano kehe e tagata ne hu ai e tau temoni he magaaho fakamua. Ne kamata a ia ke fakapuloa ke he tau fahi oti a Tekapoli e tau mena oti ne taute e Iesu ma hana, ti ofomate ai e tau tagata. Mataio 8:​28-34; Mareko 5:1-20; Luka 8:​26-39; Fakakiteaga 20:​1-3.

▪ Liga ko e ha la ne onoono fakalahi ni ke he taha ni e tagata ne hu temoni ka e ua ne ha ha ai?

▪ Kua fakakite he heigoa ko e iloa he tau temoni e tuku ke he pahua he tau aho i mua?

▪ Ko e ha ne maaliali ai ko e fiafia lahi e tau temoni ke huhu he tau tagata mo e tau manu?

▪ Ko e ha ne taute maveheaga a Iesu mo e tagata ne hu he tau temoni fakamua ke poaki ki a ia ke talahau ke he falu e tau mena Hana ne taute ki a ia?