Veveheaga 46

Ne Piki e Fifine ke he Hana Tapulu

NE TUOGO e liu mai ha Iesu i Tekapoli ki Kapanaumi, mo e fakapotopoto e moto tagata tokologa he kauvai ke fakafeleveia a ia kua liu mai. Ne nakai fai fakauaua, kua fita he logona e lautolu he fakamilino e ia e afa mo e fakamalolo foki e ia e tau tagata tane ne huhu he tau temoni. Ka ko e mogonei he laka atu a ia ke he mataafaga, ne fakapotopoto viko mai a lautolu ia ia, makai mo e amaamanaki.

Taha mai ia lautolu ne to vevele lahi ke kitia a Iesu ko Iairo, ko e pule he sunako. Ne fakaveli a ia ke he tau hui ha Iesu mo e lagaloga e ole: “Ko e mate ha ne fai haku a tama fifine tote, kia haele age a koe, mo e fakalago hau a tau lima ki luga ia ia ke malolo ai, ti moui ai a ia.” Ha ko ia ni hokoia hana a tama, ti ko e 12 la ia e tau he moui, ti lahi e mokoina a ia ki a Iairo.

Ne talia e Iesu ti fakatauo a ia mo e moto tagata ke he kaina ha Iairo. Maeke ia tautolu ke manamanatu ke he fiafia he tau tagata ha ko e amaamanakiaga ke he taha mana. Ka ko e onoonoaga he taha fifine he moto tagata ko e onoono fakalahi ni ke he hana a matematekelea lahi.

Ko e 12 e tau tau loga, ko e fifine nei ne lahi e matematekelea he fakatafea. Ne kua finatu a ia ke he tau ekekafo loga, ti fakaaoga oti hana tau tupe ke he tau puhala tului. Ka e nakai fai lagomatai ki a ia; ka kua au atu ai he kelea hana a kafo.

Kua liga mailoga foki e koe, lafi ke he hana a lolelole lahi e fakama mo e tokolalo lahi. Nakai mahani ke tutala ke he toloaga tagata e tau matematekelea pihia. Ko e taha mena foki, i lalo hifo he Fakatufono faka-Mose ne fakakelea he fakatafea e fifine, ti ko e ha tagata ka piki atu ki a ia po ke tau koloa ne totoia ia ia kua lata ni ke unu, mo e kelea ai ke hoko ke he afiafi.

Ne logona he fifine e tau mana ha Iesu ti kumi atu a ia ki a ia. Ha ko e hana a nakai mea, ne fano fakagalogalo a ia i loto he moto tagata mo e pehe hifo ke he hana a loto: “Kaeke ke piki atu au ke he hana tapulu hokoia, ti malolo ai au.” Ko e magaaho ne taute pihia e ia, ko e magaaho ia ni ne logona e ia kua maulu hana a fakatafea!

“Ko hai ne piki mai kia au?” Liga ofomate a ia ke he tau kupu na ha Iesu! Maeke fefe a ia ke iloa? ‘Ko e Akoako na e,’ he totoko e Peteru, ‘kua tautaomi mo e feholiaki mai e moto tagata kia koe ti pehe mai kia a koe, “Ko hai ne fakapiki mai kia au?” ’

Ne kumi viko fano ke he fifine, ti fakamaama e Iesu: “Ne piki mai ni taha kia au; ha ko e mena kua iloa e au kua fina atu haku a mana.” Ko e moli, nakai ko e piki noa ni, ha ko e malolo ne moua kua finatu ia he mana ha Iesu.

Ne mailoga e ia e hana a nakai galo, ne hau e fifine mo e fakaveli hifo ki a Iesu, matakutaku mo e vivivivi. Ki mua he tau tagata tokologa, ne talahau oti e ia e mena moli ke he hana gagao mo e puhala ne fakamalolo ai a ia he mogoia ni.

Omoomoi ia ha ko e hana a fakatokihala katoa, ne hofihofi hana a fakamafanaaga ki a ia: “Haku tama fifine na e, kua moui a koe he hau a tua; ti fano a, mo e monuina, kia malolo a koe he hau a kafo mamahi.” Ko e mitaki ha a ia ke iloa ko Ia ne fifili he Atua ke pule ke he lalolagi ko e tagata fakaalofa hofihofi mo e mafanatia, ne leveki ke he tau tagata mo e ha ha foki ia ia e malolo ke lagomatai a lautolu! Mataio 9:​18-22; Mareko 5:​21-34; Luka 8:​40-48; Levitika 15:​25-27.

▪ Ko hai a Iairo, mo e ko e ha ne hau a ia ki a Iesu?

▪ Ko e heigoa e matematekelea he taha fifine, mo e ko e ha ne uka lahi e finatu hana ki a Iesu ke kumi lagomatai?

▪ Fakamalolo fefe e fifine, mo e fakamafana fefe e Iesu a ia?