Veveheaga 47

Liliu e Tau Hihina Mata ke he Fiafia Lahi

KO E magaaho ne kitia e Iairo e fifine fakatafea kua malolo, ne une ki mua e malolo he loto hana ke he tau malolo mana ha Iesu. Ko e magaaho fakamua he aho, ne ole e Iairo a Iesu ke fano ke lagomatai hana tama fifine fakahele 12 tau ne kua teitei ke mate. Ka ko e mogonei, kua fakamoli e matakutaku ha Iairo. Hane tutala agaia a Iesu ke he fifine, ne hohoko mai e falu tagata tane mo e tala age fakaeneene ki a Iairo: “Kua mate tuai hau a tama fifine; ke fakalavelave foki a koe he ha ke he akoako?”

Ko e ogo matematekelea ha ia! Manamanatu la: Ko e tagata tane nei, ne aga ke he fakalilifu lahi mai he tau tagata, ka ko e magaaho nei kua nakai fai lagomatai katoatoa he iloa kua mate hana a tama fifine. Ka e taha e mena, ne logona e Iesu e fakatutalaaga. Ti fuluhi atu a ia ki a Iairo, mo e vagahau ke fakamalolo: “Ua matakutaku a koe, ka e tua hokoia.”

Ne fakatauo a Iesu mo e tagata mua atu e fakaatukehe ke he hana kaina. Ko e magaaho ne hohoko atu a laua, ne ha ha ai e gaualoa he tagi hake mo e tagi tautau. Kua fakapotopoto e moto tagata, mo e tatuki ni e lautolu a lautolu ha ko e momoko. Ko e magaaho ne hu atu a Iesu ki fale mo e huhu: “Ko e heigoa e mena kua gaualoa ai a mutolu, mo e tagi hake ai a mutolu? Nakai mate e tama fifine ka e mohe ni.”

He logona e mena nei, ne kamata e tau tagata ke feki vihiatia ki a Iesu ha kua iloa e lautolu kua mate moli e tama fifine. Ka e taha e mena ko Iesu ne pehe ko e mohe noa ni. He fakaaoga e ia e malolo mai he Atua, to fakakite e ia ko e mena mukamuka ke liuaki mai e tau tagata he mamate tuga ni ko e fafagu mai a lautolu he pulumohea he momohe.

Ne fakafano oti e Iesu e tau tagata ki fafo ka e toe a Peteru, Iakopo, Ioane, mo e matua fifine mo e matua tane he tama fifine ne mate. Ne uta e ia e tokolima nei mo ia ke he mena ne takoto ai e tama fifine. Ne toto e ia e lima he tama fifine, ti pehe a Iesu: “Talita koumi, (ko e kakano hanai, Ko e tama fifine na e, kua tala atu e au kia koe, kia matike a.)” Ko e magaaho ia ni ne matike hake e tama fifine mo e fano! Ko e mena ofoofogia mo e fiafia lahi ke he tau manamanatuaga he hana tau mamatua.

Ne mole he tala age ke age taha mena ke kai e tama, ne poaki e Iesu ki a Iairo mo e hana hoana ke nakai tala age ke he taha e mena ne tupu. Pete ni he tala age e Iesu pihia ne holofa e tala ia ke he tau fahi oti he matakavi ia. Ko e fakaliu tu mai ke ua aki a nei ne taute e Iesu. Mataio 9:​18-26; Mark 5:​35-43; Luka 8:​41-56.

▪ Ko e heigoa e ogo ne hoko ki a Iairo, mo e fakamafana fefe e Iesu a ia?

▪ Ko e heigoa e tuaga he magaaho ne hohoko a lautolu ke he kaina ha Iairo?

▪ Ko e ha ne pehe a Iesu ko e mohe noa ni e tama ne mate?

▪ Ko hai a lautolu tokolima ne fakalataha mo Iesu ke fakamoli e liu tu mai?