Fanau Kia a Iesu ia Tesemo?

KUA nakai talamai he Tohi Tapu ki a tautolu e magaaho ne fanau a Iesu. Ka kua foaki mai e kakano mitaki ke fakahiku kua nakai fanau a ia ia Tesemo.

Mailoga la e matagi he magahala ia he tau i Petelehema, ne fanau a Iesu. Ko e mahina faka-Iutaia ko Chislev (tatai mo Novema/Tesemo) ko e mahina makalili ti tō e uha. Ko e mahina hake ko Tebeth (Tesemo/Ianuari). Ko e magahala ne lahi mahaki e makalili he tau, ti tō foki e kiona ke he tau atu mouga. Kia kikite atu a tautolu ke he tau mena ne talamai he Tohi Tapu hagaao ke he matagi he faahi motu ia.

Ne fakakite he tagata tohia Tohi Tapu ko Esera ko e mahina ko Chislev kua talahaua ke makalili mo e tō e uha. He mole e talahau kua fakapotopoto e moto tagata he “hiva mahina [Chislev] haia, ko e aho uafulu he mahina” ki Ierusalema, ne talahau e Esera ko e tau tagata “kua vivivivi ha ko e . . . uha lahi.” Hagaao ke he matagi he magahala ia he tau, ne pehē e tau tagata tokologa ne fakapotopoto i ai: “[Kua] to lahi foki e uha ke he vaha nai, kua nakai maeke foki kia mautolu ke tutu i fafo.” (Esera 10:9, 13; Ieremia 36:22) Ko e kakano haia he tau leveki mamoe he faahi ia he lalolagi ne eketaha ke nakai haia i fafo e tau leveki mo e tau mamoe ha lautolu he pō ia Tesemo!

Ka e tala mai e Tohi Tapu, kua ha ha he tau fonua e tau tagata hane leveki e tau mamoe ha lautolu he pō ne fanau a Iesu. Ko e mooli, ne fakakite he tagata tohia Tohi Tapu ko Luka he magaaho ia, ko e tau leveki mamoe kua “ha ne nonofo mo e leveki ai ke he po ha lautolu a tau fuifui mamoe” tata ki Petelehema. (Luka 2:8-12) Kia mailoga ko e tau leveki mamoe kua nonofo i fafo, nakai ō fano noa ni i fafo he magahala he aho. Kua ha ha mo lautolu e tau mamoe ke he tau fonua he pō. Kua lata nakai e fakamaamaaga ia ke he nonofo i fafo he matagi makalili mo e tō e uha ha Petelehema ia Tesemo? Nakai. Ti kua fakakite he tau tutūaga ne agaagai e fanauaga ha Iesu kua nakai fanau a ia ia Tesemo.a

Kua talamai fakamahino he Kupu he Atua ki a tautolu e magaaho ne mate a Iesu, ka e tote e talahauaga ke he magaaho ne fanau a ia. Kua fakamanatu mai he mena nei e tau kupu he Patuiki ko Solomona: “Kua mua e mitaki he talahaua mitaki ke he puke lolo mitaki; mo e aho ka mate ai kua mua he mitaki ia ke he aho ne fanau ai.” (Fakamatalaaga 7:1) Kua nakai ofo ai, mogoia, ha kua foaki he Tohi Tapu e tau matafeiga loga hagaao ke he fekafekauaga mo e mate ha Iesu ka e gahoa e matafeiga hagaao ke he magaaho ne fanau a ia.