Tau Mena Tutupu Mai he 2012 Yearbook
NOUE
Lau 125, paratafa 1, ke he lau 126, paratafa 3
Gahua he Lalofonua
Tokologa e tagata fakailoa ne fufū e tau tohi he tau mena galo nakai fa mahani. Ko e kupu “lalofonua” kua fai kakano foou he magaaho ne tanu he tau matakainaga e tau tohi he kelekele ti aku hake ka manako ke fakaaoga. Ko e Matakainaga ko Skau ko e tagata taute hila, ne fufū taha e puha pepa i tua he matini malolō hila he gahuaaga haana. Ne fufū he Matakainaga ko Øiseth e tau tohi he fata pī, ti fai fufūaga foki e Matakainaga ko Kvinge he pā pateta.
He tupetupe neke kitia e tau tohi he fale toka koloa i Harstad, ne fano a Lotte Holm ke oko mai e tau puha pepa oti ia. Ne fano a ia he poti, ti fatafata hake fakamitaki e tau puha he fuga poti, ti nofo ai i luga. He toka e poti, ne ofo lahi a Lotte ke kitia e tau kautau Sihamani tokologa ne heke i ai ti tupetupe he manamanatu ke he puhala ke lau e tau tohi ka e nakai moua. Ka e nakai lata a ia ke tupetupe. He tū e poti, ne fakaalofa e tau kautau ke he fifine fuakau ne loga lahi e tau koloa ke lau, ti lagomatai e lautolu a ia ke hake ki uta fakalataha mo e tau puha oti mo e uta foki e lautolu ke he kaina haana. Tote ke he iloaaga he tau kautau ia ko e lahi e totonu ha lautolu ne aoga ke he Tau Fakamoli he mogoia.
Pete ne pā, kua matutaki e tau matakainaga ke tamai fufū e tau lagaki foou he The Watchtower ki Noue mai i Suetene mo Tenemaka. Ne fakaliliu e lautolu e tau vala tala fakaako ke he vagahau Noue ti tufa e tau lagaki ne lomi ke he motu katoa. Ko e fakatokaaga halauka he tau fakahū ne uta he tuleni, pasikala taholi, po ke poti ke hoko e tau mena kai fakaagaaga he magaaho tonu ke he tau tagata tapuaki mooli he motu katoa.
Fakatumau a Lautolu ke Fakamatala
He magahala felakutaki, ko e tuaga ne tupu kua fakaholo ki mua e kamatamata ma e tau matakainaga i Noue. He pā e gahua ha tautolu ia Iulai 1941, ne fakatonu ke he tau matakainaga ke mataala ke nakai maeke ke fakaita e tau pule Nasi. Ko e mena ia, tokologa ne fakamatala nakai mautali ke he tau kapitiga mo e tau magafaoa po ke ahiahi atu ke he tau tagata ne tutala a lautolu ki ai he tau mogo kua mole. Ka ko e falu he tau matakainaga ne logona hifo e puhala nei kua mateafu lahi ti nakai fai mena ke galo he fakamatala mai he taha fale ke he taha fale he fakaaoga ni e Tohi Tapu. Pete ne falu fekehekeheaki hagaao ke he puhala ke fakaholo aki e gahua fakamatala, ko e tau matakau ne ua kua manako lahi ke fekafekau fakamooli ki a Iehova ne fehagai mo e totokoaga.
Ko e heigoa he tau matakainaga ke taute? Ne taute he felakutaki e matutakiaga mo e matapatu he lalolagi i New York ke uka lahi, ti nakai liga to fakatotoka mafiti e matalekua. To fakaatā nakai he tau matakainaga e tau fekehekeheaki ha lautolu ke fakalolelole e tua ha lautolu? Po ke to matutaki ni a lautolu ke fakamatala katoatoa a lautolu mo e leo ki a Iehova mo e haana fakatokatokaaga ke fakamafola e matalekua?
Kua kitia maali ko Iehova ne fakamonuina e gahua fakamooli ha lautolu, ha kua fiafia he fakatokatokaaga e tupuaga taha ia he mogo ne felakutaki, tuga ni he lima e tau ato hoko e felakutaki. Pete ne felakutaki, ko e pāaga, mo e tau puhala kehekehe he taute e gahua fakamatala, ko e tapunu he tau tagata fakailoa ne malikiti mai he 462 he 1940 ke he 689 he 1945—he foaki ke he tau matakainaga e kakano mooli ke fiafia!
RUANATA
Lau 181, paratafa 1
Pete ne tau tapaki ia, ko e tau tagata loto fakamooli ne nakai fakalolelole, ti ko e favaleaga kua fa fua mitaki. Ko Odette Mukandekezi, ko e matakainaga fifine fiafia mo e hakahakau ne fakalataha mo e tokologa ne tapaki he magahala ia. Ne talahau e ia: “He mogo ne hoko e favale, ne tapaki mo e tafolo e tau matakainaga. Taha aho ne fakatemole e mautolu e tama fifine tote ne higoa ko Josephine hane leveki e fuifui manu. Ne fai Tohi Tapu a ia ti kua totou ai ko e tau Kerisiano fakamua ne kua fakakikiveka, favale, ekefakakelea, mo e tuku ke he fale puipui. Ha kua iloa e ia ne favale ke he Tau Fakamoli, ati fakahiku e ia kua liga ha ha ia lautolu e lotu mooli, ti ole a ia ma e fakaako Tohi Tapu. Ko ia mogonei ko e matakainaga fifine papatiso.”