Fakakite e Fiafia Fakatagata—He Hikihiki
1 Ne fakatoka he aposetolo ko Paulo e fakafifitakiaga mitaki he hikihiki tumau e fakataitaiaga hana he tala mitaki ke he feakiaga mo e manamanatuaga he tau tagata hana. (1 Kori. 9:19-23) Kua lata ke lali a tautolu ke taute pihia. Mo e fai manamanatu tuai, maeke ia tautolu ke hikihiki e tau fakataitaiaga ke fakaaoga ne haia he Ha Tautolu a Fekafekauaga he Kautu ke lautonu ke he tau manako he tau tagata he matakavi ha tautolu. He o atu a tautolu ke he gutuhala, liga mailoga e tautolu e tau fakakiteaga he tau mena ne fiafia e tagata he kaina ti putoia ke he tau fakataitaiaga nei ha tautolu. Pete ia, kua ha ha i ai foki e taha puhala kua maeke ia tautolu ke hikihiki e fekafekauaga ha tautolu.
2 Fakalaulahi ke he Mena ne Talahau he Falu: Ka folafola e tala mitaki, fakalaga tumau e tautolu e huhu mo e uiina ke he tali he tagata he kaina. Onoono fefe a koe ke he tali? Hihiga kia a koe ke fakatautonu teao ti matutaki ni e fakataitaiaga hau nukua tauteute? Po ke mena ne talahau e koe kua fakaata e koe kua manamanatu a koe ke he talahauaga he tagata he kaina? Kaeke ke fakakite moli e koe e fiafia ke he mena ne talahau he falu, to liga maeke ia koe ke fakaaoga falu huhu fakailoilo ke iloa e mena moli he tau manamanatuaga ha lautolu. (Fakatai 20:5) Ti maeke ia koe ke hagaaki ke he tau vala he fekau he Kautu ne lautonu mo e tau kapaletu he tagata fanogonogo.
3 Kua lata e mena nei ke makai a tautolu ke tutala hagaao ke he tau matakupu ne nakai pulega tuai a tautolu ke tutala ki ai. Kaeke ke kamata a tautolu ke talahau e lekua nukua kitia he tau tala tutupu ti totoku he tagata he kaina e tau manatu fakatagata ne kapaletu a ia ki ai, ko e fiafia moli ha tautolu he tutala ke he tau manako ia he tagata he kaina ka omoi a tautolu ke fakamatapatu e fakatutalaaga ke he Tohi Tapu ke he tau matakupu ne lauia lahi ki a ia.—Filipi 2:4.
4 Hikihiki e Fakafeleveiaaga ha Tautolu: Ka fakalaga he tagata he kaina e huhu, to liga moua e tautolu e aoga ke matutaki e fakatutalaaga ke he magaaho fakamui ka oti e kumi e tautolu e vala tala lafi ki luga ke he matakupu. Maeke foki a tautolu ke foaki e tau tohi kua foaki fakamatafeiga ke he mataulu tala. Kua fakaata he mena nei e fiafia moli ha tautolu he lagomatai e falu ke o mai ke iloa a Iehova.—2 Kori. 2:17.