Kua “Fakamakona Foki e Ia e Tau Loto” ha Tautolu

Na fakaalofa mooli nakai a Iehova ki a tautolu, po ke fakateaga a ia ke he matematekelea he tau tagata he lalolagi nei? Ko e tali he Tohi Tapu ke he hūhū ia kua fakamafanatia e tau loto ha tautolu. Na fakaalofa mooli e Atua ke he magafaoa he tagata, ti manako a ia ke moui fiafia a tautolu. He tau aho takitaha kua fakaatā e ia e tau tagata​—ko lautolu foki ne nakai fakaaue—​ke aoga mai he aga mitaki lahi haana. Manamanatu ke he tau kupu he aposetolo ko Paulo.​—Totou Gahua 14:16, 17.

He tutala ke he tau tagata he maaga ko Luseta ne nakai tapuaki ke he Atua, ne pehē a Paulo: “Ne toka noa [he Atua] e tau motu kehe oti kana ke he tau hau kua mole atu, ke eke e lautolu ha lautolu a tau mahani. Ka e pete ni he mena ia, kua nakai toka noa ai e ia ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.” Ko e heigoa e kakano he tau kupu ia ke he tau tagata ne fanogonogo ki a Paulo?

Mukamuka ma e tau tagata Luseta ke maama e mooli he tau kupu ha Paulo. Ne nonofo a lautolu he matakavi gahua fonua mo e talumelie e kelekele mo e mitaki ni. Ka e fakamanatu age e Paulo ki a lautolu, ko e Atua e Punaaga he uha mo e tau vahā ne tupu loga ai e tau fua. Ti ko e tau magaaho oti ka helehele mai e lautolu e tau fua loga he fonua mo e kai e tau mena kai lolo, kua aoga ai a lautolu ha ko e aga mitaki he Atua.

Ko e tau kupu ha Paulo ke he tau Luseta kua fakaako ki a tautolu loga e tau fakaakoaga aoga hagaao ki a Iehova ko e Atua.

Foaki mai e Iehova ki a tautolu e atāina ke fifili. Mailoga ai ne fakaatā e Iehova e tau Motu Kehe oti “ke eke e lautolu ha lautolu a tau mahani.” Ko e taha tohi ma e tau tagata fakaliliu he Tohi Tapu ne pehē ko e talahauaga nei kua maeke ke kakano “ke ō ni a lautolu he tau puhala ha lautolu ne loto ki ai” po ke “taute e tau mena kua manatu a lautolu kua mua e mitaki.” Nakai fakaohooho e Iehova ha tagata ke tapuaki ki a ia. Kua foaki mai e ia ki a tautolu e atāina​—ke maeke ke fifili e puhala moui ha tautolu.​—Teutaronome 30:19.

Manako a Iehova ke iloa e tautolu a ia. Ne nakai “toka noa ai e ia ke nakai fai mena ke talahau ai a ia,” he fakamaama e Paulo. Ko e tohi ne totoku i luga ne talahau na maeke foki e tau kupu nei ke pehē “kua fakakite fakamaaliali e ia ke he tau tagata ko e Atua fēfē a ia.” Kua ha ha he tau tufugatia he Atua e talahauaga mua ue atu ke he haana “tau mena kua nakai kitia,” putoia e aga mitaki, pulotu, malolō, mo e fakaalofa. (Roma 1:20) Kua loga foki e tau mena ne fakakite e Iehova hagaao ki a ia i loto he Tohi Tapu. (2 Timoteo 3:16, 17) Nakai kia maaliali kua manako e Atua ke iloa e tautolu a ia?

Manako a Iehova ke fiafia a tautolu. Kua fakamakona e ia e “tau loto ha tautolu ke he tau mena kai mo e fiafia,” he talahau e Paulo. Pihia foki e tagata agahala ne nakai talia a Iehova, liga kai e ia e tau mena kai ke makona e loto ti fai fiafia e moui. Ka kua manako e Atua ke moua e tautolu e fiafia mooli tukulagi. Ti maeke ni e mena ia kaeke ke iloa e tautolu e kupu mooli hagaao ki a ia ti fakagahua ai he tau momoui ha tautolu.​—Salamo 144:15; Luka 11:28.

Kua aoga ki a tautolu oti he tau aho takitaha e aga mitaki ha Iehova. Ko e ha ne nakai fakaako fakalahi atu ai ke he puhala kua maeke ia koe ke fakakite e loto fakaaue ke he Atua ne fakamakona e tau loto ha tautolu “ke he tau mena kai mo e fiafia”?