Veveheaga 127

Tanu he Aho Faraile​—Gatigati e Tuagamau he Aho Tapu

HE MAGAAHO nei, ko e pale laa afiafi he Aho Faraile, ti kamata e Sapati he Nisana 15 he toaga laa. Ko e tino mate ha Iesu ne tautau fakatalofe he akau, ka e momoui agaia e tokoua e tagata fofo mena he tau fahi hana. Ko e pale laa he Aho Faraile ne fakahigoa ko e Tauteuteaga ha ko e magaaho hanei ka tauteute he tau tagata e tau kai mo e fakaoti e falu gahua aoga foki ne nakai maeke ke toka ke taute ka mole e Sapati.

Ko e Sapati ka kamata mafiti ne nakai ko e Sapati fahi tapu (he aho ke fituaki he fahi tapu) ka ko e fakalahi ua, po ke Sapati “homo atu.” Ko e fakahigoa pehenei ha ko e Nisana 15, ko e aho fakamua he Galue he Tau Areto Fakaea ke he fitu e aho (ti ko e Sapati mau, pete ni ko e hoko he tau aho kehe he fahi tapu), kua hoko he aho taha ia ni he Sapati he fahi tapu.

Ke lata mo e Fakatufono he Atua, nakai maeke ke toka e tau tino ke tautau he akau ke ahogia e po. Ti ko e mena haia ne ole e tau Iutaia ki a Pilato ke fakamafiti e mamate ha lautolu ne kua kelipopo ke pakipaki ha lautolu a tau hui. Ko e tau kautau, mogoia, ne pakipaki e tau hui he tokoua ne fofo mena. Ha kua tuga kua mate a Iesu, ati nakai pakipaki ai hana tau hui. Kua fakamoli he mena nei e kupu tohi: “Nakai papaki taha hui hana.”

Ka e taha e mena, ke moolioli mo e nakai fai fakauaua kua mate moli a Iesu, ko e taha mai he tau kau ne hoka aki e tao e kahokaho hana. Ne hoko e tuina he tao ke he ate hana, ti ko e magaaho ia ni ne tafe mai e toto mo e vai ki fafo. Ko e aposetolo ko Ioane, ne ono mata ki ai, ne hokotaki ko e fakamoli he mena nei e taha foki he kupu tohi: “To kitekite atu a lautolu kia Ia ne hoka e lautolu.”

Ne ha ha i ai foki a Iosefa ke he kelipopoaga mai he loto maga ko Aramataia, ko e tagata lilifu he Saneheturini. Ne nakai talia a ia ke vili ke he gahua nakai fakafili tonu he fakafiliaga tokoluga ki a Iesu. Ko Iosefa ko e tutaki ha Iesu, pete ni he matakutaku a ia ke fakakite ko ia taha. Ka e taha e mena, ko e magaaho nei, ne fakamalolo a ia mo e fano ki a Pilato ke ole ma e tino ha Iesu. Ne ui e Pilato e pule he kau, mo e mole he talahau he pule he kau kua mate moli a Iesu, ti tuku age e Pilato e tino mate.

Ne uta e Iosefa e tino ti vakai aki e ia e ie lino mea ke lata mo e tauteuteaga ke tanu. Ne lagomatai e Nikotemo a ia, ko e taha foki mai he Saneheturini. Ne kaumahala foki a Nikotemo ke talahau hana tua ki a Iesu he matakutaku neke utakehe hana tuaga. Ka ko e magaaho nei ne ta mai e ia e iko muro ne fiofio aki e aloe tau uka ko e 33 e kilokuleme faka-Roma. Ko e tino a Iesu kua vakai ke he tau ie ne toka ai e tau mena manogi nei, tuga ni mo e aga he tau Iutaia ke he tauteuteaga he tau tino ke tanu.

Ne tuku e tino ke he tuagamau fakamanatu fou ha Iosefa ne talai ke he kaumaka he fonua ne tata mai. Ko e fakahikuaga, ne fuluhi e maka lahi ki mua he tuagamau. Ke fakaoti e tanu to hoko e Sapati, ne fakatepetepe e tauteuteaga he tino. Ti ko e mena haia ha Maria Makatala, mo Maria ko e matua fifine ha Iakopo Tote, ne liga lagomatai ke he tauteuteaga ne o fakaave ki kaina ke taute foki e tau mena manogi mo e tau lolo manogi. Ne mole e Sapati, ti pulega foki a lautolu ke taute e tino ha Iesu ke maeke ai ke leva e mata.

Ko e aho hake, ko e Aho Faiumu (ko e Sapati), ko e tau ekepoa ne mua mo e tau Farasaio ne o ki a Pilato mo e pehe: “Ko e iki na e, kua manatu a mautolu, kua pehe mai e tagata fakavai na he moui a ia, Ka mole tolu e aho, ti tu mai foki au. Hanai, kia poaki age e koe, kia fakamau e tukuaga, ato hoko ke he aho tolu, neke o age hana tau tutaki he po, mo e kaiha a ia, ti pehe a lautolu ke he motu, Kua tu mai tuai a ia ia lautolu kua mamate; ti au atu ai e fakavai fakamui, ke he fakavai ne fakamua.”

“Ha ia mutolu e kau leoleo,” he tali e Pilato. “Ati o a, pule ni a mutolu ke fakamau ai.” Ti o a lautolu mo e fakamau e tukuaga he pili e maka mo e toka ai e tau kau Roma ke leoleo ai.

Ko e magaaho pogipogi he Aho Tapu ne uta e Maria Makatala mo Maria e matua fifine ha Iakopo, fakalataha mo Salome, Ioana, mo e falu fifine foki e tau mena manogi ke he tuagamau ke fakatakai aki e tino ha Iesu. Ne fevagavagahauaki a lautolu he puhala: “To fuluhi kehe e hai e maka ma tautolu he gutu he tuagamau fakamanatu?” Ka ko e magaaho ne hohoko atu ai, kua fita e mafuike he to mo e kua taveli kehe he agelu a Iehova e maka. Kua o kehe e tau leoleo, mo e kua gatigati e tuagamau! Mataio 27:57–28:2; Mareko 15:42–16:4; Luka 23:50–24:3, 10; Ioane 19:14, Ioa 19:31–20:1; Ioa 12:42; Levitika 23:5-7; Teutaronome 21:22, 23; Salamo 34:20; Sakaria 12:10.

▪ Ko e ha e Aho Faraile ne ui ko e Tauteuteaga, mo e ko e heigoa e Sapati “homo atu”?

▪ Ko e heigoa e tau kupu tohi ne fakamoli hagaao ia ke he tino ha Iesu?

▪ Ko e heigoa ha Iosefa mo Nikotemo ne taute ke he tanuaga ha Iesu, mo e ko e heigoa e matutakiaga ha laua mo Iesu?

▪ Ko e heigoa e ole he tau ekepoa ki a Pilato, mo e fefe e tali hana?

▪ Ko e heigoa ne tupu he magaaho pogipogi he Aho Tapu?