Veveheaga 129

Ko e Falu a Fakakite Mai Foki

KUA fakaatukehe agaia e tau tutaki. Ne nakai maama ia lautolu e fakamailoga he tuagamau gatigati, mo e nakai talitonu foki e lautolu e tau hokotaki he tau fifine. Ti ko e magaaho fakamui he Aho Tapu, ko Kaleopa mo e taha mai he tau tutaki ne toka a Ierusalema ka e o ki Emau, ko e mamao liga ko e 11 e kilomita.

Ha he puhala, ne fakatutala ke he tau mena tutupu he aho, ne fakalataha mai e tagata kehe mo laua. “Ko [e] heigoa e tau kupu ia kua vagavagahau ai fakahaga a mua?” he huhu e ia.

Ne tutu e tau tutaki mo e fakatutuku lahi ti tali e Kaleopa: “Hoko koe ni kia ne api i Ierusalema mo e nakai iloa e tau mena kua tutupu i ai ke he vaha nai?” Ne huhu a ia: “Ko [e] heigoa e tau mena?”

“Ko e tau mena kia Iesu ko e Nasareta,” he tali e laua. “Ne tuku atu foki a ia he tau ekepoa ne mua, mo e tau patu ha tautolu, ke fakahala a ia kia mate; ti fakatautau e lautolu a ia. Ne amaamanaki foki a mautolu, ko ia ni ke lukutoto aki a Isaraela.”

Ne fakamaama e Kaleopa mo e hana kapitiga e tau mena ofoofogia ne tutupu he aho​—ko e hokotaki hagaao ke he mana ne kitia ke he tau agelu mo e tuagamau ne gatigati​—ka e talahau foki ha laua a ofoofogia hagaao ke he kakano he tau mena nei. Ne akonaki he tagata kehe ia a laua: “Ko e tau tagata goagoa na e, mo e loto uka kua nakai talia e tau mena oti ia ne talahau mai ai he tau perofeta. Ka e nakai kia lata he mamahi e Keriso ke he tau mena pehena, ti hoko ai a ia ke he hana lilifu?” Ne fakamaama e ia ki a laua e tau vala mai he tohi tapu ne hagaao ki a Keriso.

Ne hohoko a laua tata atu ki Emau, ti taute e tagata kehe ia tuga ko e fano leva a ia. Ko e manako ke logona foki he tau tala, ne fakaohooho he tau tutaki: “Kia nofo a koe mo maua nai; ha ko e afiafi ainei.” Ti nofo a ia ke kai. Ha ne liogi a ia mo e tofitofi e falaoa mo e foaki age ki a laua, ati mailoga e laua ko ia moli ni ko Iesu ne kua faliu tino tagata. Ka e fakamaloma kehe a ia.

Ko e magaaho nei ne maama ia laua e kakano ne iloa lahi he tagata kehe ia e tau mena loga! “Nakai kia velagia ha taua a tau loto,” he huhu e laua, “he vagavagahau a ia mo taua ke he puhala, he fakamatala mai foki e ia e tau Tohiaga Tapu kia taua?” Ne nakai fakapuga, ne mamatike a laua mo e fakamafiti he liliu atu ki Ierusalema, ne moua e laua e tau aposetolo mo lautolu foki ne fakapotopoto mo lautolu. Ka e fakamua to vagahau a Kaleopa mo e hana kapitiga, ne hokotaki fakaave mo e fiafia mai he falu: “Ko e moli, kua tu mai e Iki; kua fakakite foki a ia kia Simona.” Ko e magaaho ia ne talahau e laua kua fakakite foki a Iesu ki a laua. Ko e lagafa aki a nei he aho ia ne fakakite a ia ki a lautolu kehekehe ko e hana a tau tutaki.

Ne amanaki foki a Iesu ti fakakite ke lagalima aki. Pete ni he fakamau e tau gutuhala ha ko e matakutaku e tau tutaki he tau Iutaia, ne hu a ia mo e tu ke he vahaloto ha lautolu mo e pehe: “Kia monuina a mutolu.” Ne lahi e matakutaku ha lautolu, piko ni a lautolu ko e agaga ha lautolu ne kitia. Ti, he fakamaama nakai ko e agaga a ia, ne pehe a Iesu: “Kua fakaatukehe a mutolu he ha? to tupu he ha e mahalohalo ke he tau loto ha mutolu? Kia kitekite mai a mutolu ke he haku a tau lima mo e haku a tau hui, ko au ni hanai; kia amoamo mai a mutolu kia au, mo e kitia; ha ko e agaga nakai fai kakano a ia mo e tau hui, tuga au nai kua kitekite a mutolu ki ai.” Ka e fakauaua agaia ni a lautolu ke talitonu.

Ke lagomatai aki a lautolu ke maama ko ia moli ko Iesu, ne huhu a ia: “Fai mena kai nakai a mutolu i hinai?” Ne mole he talia mo e kai e ia e maga ika tunu, ti pehe a ia: “Ko e tau kupu haia ne tala atu ai e au kia mutolu, he nofo au ia mutolu [fakamua to mate au], kua lata he fakakatoatoa ai e tau mena oti ne tohi kia au ke he fakatufono a Mose, mo e tau Perofeta, mo e tau Salamo.”

Ne matutaki atu ti tuga ko e fakaakoaga Tohi Tapu mo lautolu, ne fakaako e Iesu: “Kua tohi pihia, lata foki he mamahi pihia e Keriso, mo e matike mai ke he aho tolu ia lautolu kua mamate. Kia fakamatala foki e tokihala mo e fakamagaloaga he tau hala ke he tau motu oti ke he hana higoa, ke kamata mai i Ierusalema. Ko e tau talahau foki a mutolu ke he tau mena ia.”

Ha ko e falu ni a kakano, ati nakai ha ha i ai a Toma ke he fakapotopotoaga aoga lahi ia he afiafi he Aho Tapu. Ti ko e tau aho fakamui mai nai ne tala age mo e fiafia he falu kia ia: “Kua kitia tuai e mautolu e Iki.”

“Kaeke nakai kikite atu au ke he hana tau lima, ke he tau mena ne pao ai e tau fao,” he totoko e Toma, “mo e toka haku a lima ke he mena ne pao ai e tau fao, mo e toka haku a lima ke he hana kahokaho, nakai talia ni e au.”

Ko e valu e aho he mole, ti liliu e tau tutaki fakapotopoto foki i fale. Ha ha i ai a Toma mo lautolu he magaaho ia. Pete ni kua fakamau e tau gutuhala, kua liu foki a Iesu tu ke he vahaloto ha lautolu mo e pehe: “Kia monuina a mutolu.” Ne fuluhi a ia ki a Toma mo e uiina e ia: “Ta mai a hau a matalima ki hinei, kikite foki ke he haku a tau lima; ta mai a foki hau a lima, mo e tuku ke he kahokaho haku; ti ua faliuliu a koe, ka kia talia fakatonu.”

“Hoku Iki na e, mo e hoku Atua na e!” he talahau fakalahi e Toma.

“Ma Toma na e, kua talia kia e koe ha kua kitekite mai a koe kia au?” he huhu e Iesu. “Uhoaki a lautolu nakai kitia, ka e talia ai ni.” Luka 24:11, 13-48; Ioane 20:19-29.

▪ Ko e heigoa e tau huhu he tagata kehe ke he tau tutaki tokoua ke he puhala ki Emau?

▪ Ko e heigoa he tagata kehe ne talahau ti velagia e tau loto he tau tutaki?

▪ Iloa fefe he tau tutaki ko hai e tagata kehe?

▪ Ko e magaaho ne liliu a Kaleopa mo e hana kapitiga ki Ierusalema, ko e heigoa e tau hokotaki fiafia ne logona e laua?

▪ Ko e heigoa e fakakite ke lima aki ha Iesu ke he hana tau tutaki, mo e ko e heigoa ne hoko he magaaho ia?

▪ Ko e heigoa ne tupu he valu e aho he mole he fakakite ke lima aki ha Iesu, mo e talitonu fefe a Toma he magaaho fakamui kua moui a Iesu?