Veveheaga 131

Tau Fakakite Fakamui, mo e Penetekoso 33 V.N.

NE FAI magaaho he taute e Iesu e tau fakatokatokaaga ke feleveia oti a ia mo e hana a tau aposetolo 11 ke he mouga i Kalilaia. Ne tala age foki ke he falu aposetolo e fakapotopotoaga ia, ti molea e 500 tagata ne fakapotopoto ai. Ko e fonoaga fiafia lahi ha anei he magaaho ne hau a Iesu mo e kamata ke fakaako a lautolu!

Ke he falu a mena foki kua fakamaama e Iesu ke he moto tagata kua foaki age he Atua e pule ki a ia ke he lagi mo e lalolagi. “Hanei, kia o atu a a mutolu,” he tomatoma e ia, “ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”

Manamanatu la ke he mena nei! Ko e tau tane, tau fifine, mo e tau fanau ne moua oti e poakiaga taha nei ke gahua auloa ke taute tutaki. To lali a lautolu ne totoko ke taofi ha lautolu a fakamatala mo e fakaako atu, ka e fakamafana e Iesu a lautolu: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” Ko e toe hifo a Iesu mo e hana tau tutaki ha ko e agaga tapu, ke lagomatai a lautolu ke fakamoli ha lautolu a fekafekauaga.

Ko e katoatoa, ne fakakite e Iesu a ia ko e moui ke he hana tau tutaki ko e 40 e aho mai he liu tu mai hana. Ke he tau fakakite nei ne fakaako e ia a lautolu hagaao ia ke he Kautu he Atua, ti peehi e ia ha lautolu a tau gahua ko e hana tau tutaki. Ko e taha magaaho ne fakakite a ia ke he matakainaga hana ko Iakopo mo e fakamoli ki a ia ne nakai talitonu he mogo fakamua na ko Ia moli ni ko e Keriso.

Ha ha i ai agaia e tau aposetolo i Kalilaia, ti hataki e Iesu a lautolu ke liliu ki Ierusalema. Ko e magaaho ne fakapotopoto a lautolu i ai, ne pehe a ia ki a lautolu: “Neke o kehe a lautolu i Ierusalema; ka kia tatali ai ke moua e mena ne talahau he Matua, ne fanogonogo a mutolu kia au. Ha ko e mena papatiso ni a Ioane ke he vai; ka ko mutolu, to papatiso a mutolu ke he agaga tapu, ka e nakai la mole e tau aho loga.”

Ko e magaaho fakamui ne liu a Iesu feleveia foki mo e hana tau aposetolo mo e takitaki kehe mai a lautolu he loto maaga ke hoko ki Petania, ne toka he papati he fahi uta he Mouga ko Olive. Ka ko e mena ke ofo ai, he pete ni he talahau oti e ia e tau mena ke he hana a fano kehe ke he lagi, kua talitonu agaia ni a lautolu ko e hana a Kautu to fakatu ke he lalolagi. Ti ko e mena ia ne huhu ai a lautolu: “Ko e Iki na e, ko e vaha nai kia ke liu fakafou mai ai e koe e kautu kia Isaraela?”

He nakai liu lali foki ke fakahako ha lautolu a nakai maama, ne tali fakaku ni e Iesu: “Nakai lata he iloa e mutolu e tau vaha mo e tau tau, kua toka tuai he Matua ke he hana pule ni.” Ti ko e magaaho ia, ne peehi foki e ia e gahua ha lautolu kua lata ke taute, ne pehe a ia: “Ka to moua e mutolu e malolo, ka haele hifo e agaga tapu ki luga ia mutolu; to eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.”

Hane kitekite agaia a lautolu, ti kamata a Iesu ke haele hake ke he lagi, ti galo a ia he aolu ki a lautolu. Mole e fakafaliu hana a tino, ne haele hake a ia ke he lagi ko e peresona fakaagaga. Hane onoono agaia e toko 11 ki luga he lagi, ne tokoua e tagata tane tapulu hina ne tutu fakalataha mo lautolu. Ne huhu e tau agelu nei ne faliu tino tagata: “Ko e tau tagata Kalilaia na e, ko e heigoa e mena ne tutu ai a mutolu, mo e kitekite atu ke he lagi? Ko Iesu hanā, kua ta hake ia mutolu ke he lagi, to liu mai foki pihia a ia, tuga hana haele atu ke he lagi ne kitekite a mutolu ki ai.”

Ko e puhala ne haele hake a Iesu he lalolagi ne nakai fai fakamavehe fakamatalahi mo e tau tagata tokologa ka ko e hana ni a tau tutaki fakamoli ne kitia. To liu mai ni a ia ke he puhala taha ia​—mo e nakai tokologa e tau tagata ne fakamavehe fakamatalahi a ia ka ko e hana ni a tau tutaki fakamoli ka iloa hana a liu haele mai mo e kamata hana a ha ha hinei ke he pule he Kautu.

Ne o hifo mai e tau aposetolo he Mouga ko Olive, mo e o atu ke he taha fahi he Pahua ko Ketarono, mo e liu huhu ki Ierusalema. Ne nonofo a lautolu i ai ha ko e omaoma ke he poaki ha Iesu. Ne hogofulu e aho he mole, he Galue faka-Iutaia he Penetekoso 33 V.N., ne fakapotopoto e kavi ke 120 he tau tutaki he poko tapa ki luga i Ierusalema, ne puke agataha ai e fale katoa he tomumu tuga ne matagi kua havili lahi mai. Ko e tau alelo tuga ne afi ne kitia kua nofo ki luga ha lautolu takitokotaha ti kamata e tau tutaki oti ke vagahau ke he tau vagahau kehekehe. Ko e agaga tapu a nei ne mavehe e Iesu to liligi hifo! Mataio 28:​16-20; Luka 24:​49-52; 1 Korinito 15:​5-7; Gahua 1:​3-15; 2:​1-4.

▪ Ko hai ne fakamavehe aki e Iesu e tau fakaakoaga he mouga i Kalilaia, mo e ko e heigoa e tau fakaakoaga nei?

▪ Ko e heigoa e fakamafanaaga ne foaki e Iesu ma e hana tau tutaki, mo e toe hifo fefe a ia mo lautolu?

▪ Fiha e leva he mole hana a liu tu mai he fakakite e Iesu a ia ke he hana tau tutaki, mo e ko e heigoa ne fakaako aki e ia a lautolu?

▪ Ko hai e tagata ne nakai ko e tutaki a ia he magaaho to mate a Iesu, ne fakakite e Iesu a ia ki ai?

▪ Ko e heigoa e tau fakapotopoto ua fakahiku ha Iesu mo e hana tau aposetolo, mo e ko e heigoa e tau mena tutupu he tau magaaho ia?

▪ To liu haele mai fefe a Iesu ke tuga mo e puhala ne haele hake a ia?

▪ Ko e heigoa ne hoko he Penetekoso 33 V.N.?